ស្ត្រីឈ្មោះ អៀង សាមេន ប្រជាពលរដ្ឋនៅភូមិថ្លុកដង្កោ ឃុំផ្ទះរ៉ុង ស្រុកភ្នំក្រវាញ ខេត្តពោធិ៍សាត់ បានថ្លែងប្រាប់វិទ្យុអាស៊ីសេរីនៅល្ងាចថ្ងៃ២៥ វិច្ឆិកា ថា ក្រឡាបញ្ជីតុលាការខេត្តគឺអ្នកស្រី យិន ផាណ្ណា បានទាមទារប្រាក់ពីគាត់ បើមិនដូច្នោះទេតុលាការមិនព្រមចុះអនុវត្តសាលក្រមបង្ខំឲ្យឈ្មោះ ពិន សារឿន រុះរើផ្ទះចេញពីដីរបស់អ្នកស្រីឡើយ។
អ្នកស្រី អៀង សាមេន បានបញ្ជាក់ថា ៖ «គាត់ទារពីខ្ញុំម្ដងហើយ លោកស្រី យិន ផាណ្ណា ហ្នឹងណា៎! ទារពីខ្ញុំថា លោកចៅក្រមហ្នឹងយក៣០ម៉ឺន(រៀល) ខ្ញុំឲ្យទៅ៣៨ម៉ឺនតាំងពីបុណ្យអុំទូកម៉្លេះ មករាប់ជើងមិនឈ្នះហើយ គាត់ចេះតែថា អាទិត្យនេះ អាទិត្យនោះ។ មកព្រឹកមិញគាត់ថា រឿងសល់ពីគេអ៊ីចឹង គាត់អត់ធ្វើទេ។ ខ្ញុំគ្រាន់តែឮលោកស្រី យិន ផាណ្ណា ខ្សឹបប្រាប់ខ្ញុំថា គាត់យក១ពាន់(ដុល្លារ) បើបាន១ពាន់ហ្នឹងគាត់នឹងចុះទៅរុះរើឲ្យ»។
ស្ត្រីឈ្មោះ អៀង សាម៉េន បានប្តឹងលែងលះប្តីគាត់ គឺលោក ពិន សារឿន។ សាលក្រមស្ថាពរលេខ១២ខ ចុះថ្ងៃទី១០ ខែកញ្ញា ឆ្នាំ២០០៨ បានសម្រេចឲ្យប្តីប្រពន្ធមួយគូនេះលែងលះគ្នា។ សាលក្រមសម្រេចប្រគល់ដីឲ្យភាគីដើមបណ្តឹង គឺអ្នកស្រី អៀង សាមេន ឯផ្ទះប្រគល់ឲ្យភាគីចុងចម្លើយ គឺលោក ពិន សារឿន ដែលនឹងត្រូវរុះរើចេញតាមការកំណត់នៃច្បាប់។ ការចុះអនុវត្តសាលក្រមត្រូវបានធ្វើឡើងម្តងរួចហើយ តែភាគីចុងចម្លើយសុំពន្យារពេល។
រយៈពេលជាងមួយឆ្នាំហើយភាគីចុងចម្លើយនៅតែមិនព្រមរុះរើ ទើបអ្នកស្រី អៀង សាមេន សុំឲ្យតុលាការចុះអនុវត្តសាលក្រមជាថ្មី តែក្រឡាបញ្ជីតុលាការខេត្តបានទាមទារប្រាក់ពីគាត់ទើបព្រមចុះទៅអនុវត្ត។
អ្នកស្រី យិន ផាណ្ណា បានបដិសេធការចោទប្រកាន់នេះ ដោយអ្នកស្រីមានប្រសាសន៍ថា ៖ «រឿងគាត់ហ្នឹងអនុវត្តសាលក្រម មកដល់ឥឡូវមេខ្ញុំមុនហ្នឹងគាត់រ៉ឺត្រែត (ចូលនិវត្តន៍) ដល់រ៉ឺត្រែតទៅរឿងគាត់វាដាច់មួយកំណាត់។ ដល់ដាច់មួយកំណាត់ទៅ ឥឡូវហ្នឹងវានៅចៅក្រមមកក្រោយ ជាចៅក្រមកម្មសិក្សា គាត់ដូចថាគាត់ស្ទាក់ស្ទើរ គាត់ធ្វើទៅខ្លាចខុស ដល់អ៊ីចឹងគាត់ថា គាត់ដូចជាមិនហ៊ាន ហើយដល់ប្រធានថ្មីក៏គាត់ថា អត់មានច្បាប់ចែងត្រង់ណាមកឲ្យអនុវត្តត្រឹមត្រូវទេ។ ដល់អ៊ីចឹងទៅ ខ្ញុំក៏មិនដឹងធ្វើម៉េចដែរ ខ្ញុំឲ្យគាត់ជួបជាមួយចៅក្រមខ្លួនឯង។ ត្រង់ថា ខ្ញុំទារប្រាក់គាត់១ពាន់ដុល្លារ ខ្ញុំអត់បានទារគាត់ទេ»។
ចំណែកចៅក្រម កុល បុណ្យ បានមានប្រសាសន៍ថា ៖ «រឿងសល់ពីលោក កុង សុខុម មក ខ្ញុំនឹងត្រៀមចាត់ការទៀត ហើយត្រង់ថា ខ្ញុំហ្នឹងទៅប្រាប់គេអីអ៊ីចឹងៗ ខ្ញុំអត់បានដឹងទេ យកល្អសួរគាត់ឯណោះទៅ។ ដល់អ៊ីចឹងៗខ្ញុំភ្ញាក់ផ្អើលដែរហ្នឹង ខ្ញុំមិនដែលធ្វើការងារថោកទាបអ៊ីចឹងទេ»។
មន្ត្រីសម្របសម្រួលអង្គការសិទ្ធិមនុស្ស អាដហុក ប្រចាំខេត្តពោធិ៍សាត់ អ្នកស្រី ង៉ែត ធាវី មានប្រសាសន៍ថា ការទាមទារលុយកាក់ពីប្រជាពលរដ្ឋជាអំពើខុសច្បាប់ តែអ្នកស្រីពុំបានទទួលព័ត៌មានណាមួយដែលបញ្ជាក់ថា តុលាការបានទាមទារប្រាក់ពីអ្នកស្រី អៀង សាម៉េន នោះទេ៕