ប្រជាពលរដ្ឋឈ្មោះ ប៊ុន រឿន មានទីលំនៅនៅឃុំឈើតុំ ស្រុកក្រគរ មានប្រសាសន៍ប្រាប់វិទ្យុអាស៊ីសេរីនៅព្រឹកថ្ងៃ១៩ ធ្នូថា ជារៀងរាល់យប់ឡានដឹកឈើប្រណីតដូចជា គ្រញូង បេង នាងនួន និងធ្នង់ បានដឹកចេញតាមច្រកផ្លូវលេខ២៨បាណក-ក្រគរ មិនដែលខាន ព្រោះពួកគេបានបង់ប្រាក់ឲ្យអាជ្ញាធរមានសមត្ថកិច្ចគ្រប់ជំនាញរួចរាល់ហើយ។
លោក ប៊ុន រឿន មានប្រសាសន៍ដូច្នេះ ៖ «គ្រញូងចេញមួយយប់ៗឡើង៤-៥គ្រឿងៗ(ឡាន) រាល់តែយប់។ បើអ៊ីចឹងសោះ ឈើដែលយើងកែច្នៃធ្វើជើងម៉ាអង្គុយហ្នឹងហេតុអីបានព័ទ្ធចាប់ ហើយឈើគ្រញូងដែលចេញ៥-១០គ្រឿងរាល់យប់ហ្នឹងម៉េចក៏គេមិនចាប់? និយាយរួមទៅតាំងពីឆ្នាំ២០០៨មករហូតមកទល់នឹងពេលឥឡូវ មិនដែលឃើញចាប់ឈើគ្រញូងឯណាបានមួយផង នៅតំបន់ស្រុកក្រគរ ខេត្តពោធិ៍សាត់ហ្នឹង»។
បុរសអ្នកបើកបរឡានតាក់ស៊ីម្នាក់ដែលសុំមិនបញ្ចេញឈ្មោះបន្ថែមថា ៖ «ដល់ពេលខ្ញុំសួរទៅថា យ៉ាងម៉េចបានអស់លោកឡានចេញលោកឯងមិនមើល? គេថា ទេគេបង់ហើយ។ ចុះខ្ញុំដឹកគ្រែមួយយកប្រគេនលោកអីខ្ញុំបង់ឲ្យដែរ? គេថា ទេឲ្យតែដឹក អាហ្នុងហើយគេហៅថាឈើ គេនិយាយអ៊ីចឹង»។
នាយសង្កាត់រដ្ឋបាលព្រៃឈើស្រុកក្រគរ គឺលោក គឹម កេតថាវី បានបដិសេធការចោទប្រកាន់របស់ប្រជាពលរដ្ឋដែលថា រដ្ឋបាលព្រៃឈើបានប្រព្រឹត្តអំពើពុករលួយនេះ។ លោកមានប្រសាសន៍ថា ពុំមានបញ្ហានេះកើតឡើងទេ ប៉ុន្មានថ្ងៃជាប់ៗគ្នានេះសង្កាត់រដ្ឋបាលព្រៃឈើស្រុកក្រគរ ចាប់បានឡានដឹកឈើរបស់ឈ្មួញខិលខូចជាបន្តបន្ទាប់។ លោកមន្ទិលថា ក្រុមឈ្មួញបំផុសព័ត៌មានដើម្បីជាការសងសឹកចំពោះការចាប់ឈើរបស់ពួកគេ។
លោក គឹម កេតថាវី មានប្រសាសន៍ថា ៖ «ឥឡូវនេះខ្ញុំចាប់តាំងពីឡានវីហ្គោ ក៏ខ្ញុំចាប់បានដែរ ខ្ញុំចាប់បានច្រើនករណី។ អ៊ីចឹងធម្មតាវាប៉ះពារអ្នករកស៊ី គេបង្កើតព័ត៌មានក៏មានដែរ»។
ជំទប់ទី២ឃុំឈើតុំ គឺលោក រឿន វ៉ាន់ មានប្រសាសន៍ថា ការដឹកឈើប្រណីតចេញពីតំបន់នេះបានកើតមានជាច្រើនឆ្នាំមកហើយដោយពុំមានការទប់ស្កាត់ឲ្យបានគត់ម៉ត់ទេ។ លោកមន្ទិលថា អាចមានការឃុបឃិតពីអាជ្ញាធរមានសមត្ថកិច្ចគ្រប់ជំនាញទើបឈ្មួញអាចធ្វើសកម្មភាពបានដោយសេរីយ៉ាងដូច្នេះ។
លោក រឿន វ៉ាន់ បានឲ្យដឹងដូច្នេះ ៖ «រឿងដឹកឈើប្រណីតខុសច្បាប់ហ្នឹង វាសឹងតែថាតាំងពីយូរមកហើយ គឺគេដឹកចេញរាល់តែថ្ងៃមិនដែលអាក់ខានឯណា ឲ្យតែខាងវិទ្យុអាស៊ីសេរីផ្សាយអ៊ីចឹងទៅ ផ្អាកបានតែពីរបីថ្ងៃ ឬមួយក៏បួនដប់ថ្ងៃគេដំណើរការទៀតហើយ»។
សហគមន៍ព្រៃឈើចំនួន២នៅស្រុកក្រគរបានបញ្ជាក់ថា ការកាប់ព្រៃយ៉ាងអនាធិបតេយ្យកំពុងកើតមានក្នុងតំបន់ព្រៃដែលរាជរដ្ឋាភិបាលបានសម្បទានឲ្យក្រុមហ៊ុនឯកជនដែលជាតំបន់ត្រួតស៊ីគ្នាជាមួយព្រៃសហគមន៍អស់រយៈពេលជាច្រើនខែមកហើយ ពុំមានសមត្ថកិច្ចណាចុះមកបញ្ឈប់ឡើយ៕