មេឃុំនៅព្រៃវែងរងការចោទថាគ្មានតម្លាភាពក្នុងការសាងសង់ផ្លូវមួយខ្សែ
ដោយ សុខ សេរី
2009-03-31
សមាជិកក្រុមប្រឹក្សាឃុំបន្លេចប្រាសាទ ស្រុកពាមរក៍ ខេត្តព្រៃវែង បានចោទប្រកាន់ថា មេឃុំបន្លេចប្រាសាទគ្មានតម្លាភាពនិងឃុបឃិតគ្នានៅក្នុងការសាងសង់ផ្លូវលំមួយខែ្សប្រវែងជាង១៥០០ម៉ែត្រដែលនឹងចំណាយថវិកាប្រមាណ៤២លានរៀលជាកញ្ចប់ថវិការបស់រដ្ឋាភិបាលកម្ពុជា។
ស្របពេលនេះដែរមេឃុំបន្លេចប្រាសាទដែលរងការចោទប្រកាន់ខាងលើនេះបានប្រតិកម្មថា ការចោទប្រកាន់នោះគឺជាបំភ្លើសពីការពិត។
លោក អ៊ុយ ពុទ្ធា ជាសមាជិកក្រុមប្រឹក្សាឃុំបន្លេចប្រាសាទ ស្រុកពាមរក៍ ខេត្តព្រៃវែង ខាងគណបក្សសមរង្ស៊ី បានមានប្រសាសន៍ចោទប្រកាន់ថា កញ្ចប់ថវិការបស់រដ្ឋាភិបាលកម្ពុជាចំនួន៤២លានរៀលសម្រាប់សាងសង់ផ្លូវជូនប្រជាពលរដ្ឋនៅក្នុងភូមិប្រវែងជាង១៥០០ម៉ែត្រនោះមិនបានធ្វើទ្បើងដោយតម្លាភាពទេ គឺមានតែមនុស្សមួយក្រុមបានចុះហត្ថលេខាដឹងឮ រីឯរូបលោកជាសមាជិកក្រុមប្រឹក្សាឃុំមិនត្រូវបានមេឃុំអនុញ្ញាតឲ្យចុះហត្ថលេខាដឹងឮទេ។
លោក អ៊ុយ ពុទ្ធា បានឲ្យដឹងថា ៖ «ការធ្វើហ្នឹងវាខុសពីនីតិវិធីដែលរាជរដ្ឋាភិបាលបានដាក់... វាធ្វើលឿនពេក ធ្វើឲ្យផ្លូវហ្នឹងអត់មានតម្លាភាព។ គេមិនឲ្យដោយសារខ្ញុំតវ៉ារឿងផ្លូវហ្នឹង ដែលអ្នកគេស៊ីញ៉េ៤នាក់ហ្នឹង»។
ទាក់ទងនឹងការចោទប្រកាន់ខាងលើនេះ លោក កង សុខាន់ ជាមេឃុំបន្លេចប្រាសាទ ស្រុកពាមរក៍ ខេត្តព្រៃវែង ខាងគណបក្សប្រជាជនកម្ពុជា បានមានប្រសាសន៍បំភ្លឺថា ការចោទនោះបានបំភ្លើសពីការពិត។
លោក កង សុខាន់ បានបញ្ជាក់ថា ៖ «រឿងបញ្ហាដែលធ្វើផ្លូវហ្នឹងគឺអ្នកដែលចុះហត្ថលេខាគឺមាន៤រូបដែលជាគណៈកម្មការគ្រប់គ្រងគម្រោង។ លោកម្នាក់ហ្នឹងគាត់មិនមែនគណៈកម្មការគម្រោងទេ គាត់គណៈកម្មការលទ្ធកម្ម ហើយគណៈកម្មការលទ្ធកម្មមានតួនាទីខាងដេញថ្លៃ ហើយគណៈកម្មការគ្រប់គ្រងគម្រោងមានតែ៤រូបទេដែលជាអ្នកសម្រេចថាអាចយកបានឬមិនបាន ហើយគម្រោងនោះក៏អត់ទាន់បានចុះហត្ថលេខាដែរមកដល់ថ្ងៃហ្នឹង»។
តំណាងក្រុមហ៊ុនម៉ៅការនៃក្រុមហ៊ុនឈ្មោះ ង៉ួន ម៉ូ បានថែ្លងថា ៖ «ក្រុមប្រឹក្សាឃុំហ្នឹងមានបានឯកភាពគ្នាមកមើលហើយអស់ហើយ។ ទៅឃុបឃិតយ៉ាងម៉េចបើមនុស្សមួយគំនរ ហើយផ្លូវហ្នឹងផ្លូវយើងដេញថ្លៃធ្វើមិនបាន។ ឥឡូវហ្នឹងសំណាងត្រង់ថាបានធូរបន្តិចប្រេងចុះថ្លៃតែប៉ុណ្ណឹងទេ។ ផ្លូវហ្នឹងវា៤២លានទាំងលូទាំងអី»។
លោក អួង ថន ជាជំទប់ទី២នៃឃុំបន្លេចប្រាសាទ ស្រុកពាមរក៍ ខេត្តព្រៃវែង ខាងគណបក្សសមរង្ស៊ីម្នាក់ទៀតបានមានប្រសាសន៍ថា ក្នុងសមាសភាពនៃក្រុមប្រឹក្សាឃុំចំនួនសរុប៧រូប លោកបានចុះហត្ថលេខាលើឯកសារសាងសង់ផ្លូវលំនោះផងដែរនៅគ្រាដែលមានសមាជិកមួយចំនួននៃក្រុមប្រឹក្សាឃុំនេះមិនត្រូវបានមេឃុំអនុញ្ញាតឲ្យចុះហត្ថលេខា។
លោក គល់ បញ្ញា នាយកប្រតិបត្តិនៃអង្គការ Comfrel ឃ្លាំមើលការបោះឆ្នោតដោយសេរីនិងយុត្តិធម៌នៅក្នុងប្រទេសកម្ពុជា បានមានប្រសាសន៍ថា ៖ «ព្រោះអីសមាជិកក្រុមប្រឹក្សាឃុំគេមានសិទ្ធិទិតៀនហើយទៅលើមេឃុំ ទៅលើជំទប់ទី១ ទី២ ព្រោះអីជំទប់ទី១ ទី២ក្ដី ឬក៏មេឃុំក្ដី តើមានតម្លាភាពទេ ការសម្រេចចិត្តហ្នឹងបានត្រឹមត្រូវទេ?»។
សូមរំឭកថា ប្រទេសកម្ពុជាបានរៀបចំការបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី១កាលពីឆ្នាំ២០០២កន្លងទៅ និងអាណត្តិទី២កាលពីខែមេសា ឆ្នាំ២០០៧កន្លងទៅនេះ ប៉ុន្តែគេសង្កេតឃើញថាភាពមិនចុះសម្រុងគ្នាឬការរើសអើងផ្នែកនយោបាយក្នុងចំណោមសមាជិកក្នុងក្រុមប្រឹក្សាឃុំសង្កាត់នានានៅកម្ពុជាបានថយចុះបើប្រៀបធៀបនឹងអាណត្តិដំបូងកាលពីឆ្នាំ២០០២កន្លងទៅ៕
អត្ថបទដែលទាក់ទង
បញ្ហាការថែរក្សាអនាម័យក្នុងអំឡុងពេលបុណ្យអុំទូក
សរុបតួលេខនៃអំពើចោរកម្មនិងគ្រោះថ្នាក់ផ្សេងៗក្នុងពេលបុណ្យអុំទូក
ព្រះសង្ឃមួយអង្គនៅព្រៃវែងរងការចោទថាចាប់រំលោភភរិយាគេ
ស្ថានភាពសន្តិសុខក្នុងឱកាសព្រះរាជពិធីបុណ្យអុំទូក
មនុស្ស២នាក់ស្លាប់នៅខែត្រមណ្ឌលគិរីដោយសារខ្យល់ព្យុះ
ខ្មែរកម្ពុជាក្រោមប្រារព្ធពិធីបុណ្យអុំទូក
ពិធីបុណ្យអុំទូកនៅបន្ទាយមានជ័យប្រព្រឹត្តទៅដោយរលូន
ពលរដ្ឋនៅកំពង់ធំត្អូញពីបញ្ហាការទារប្រាក់ក្នុងការធ្វើប័ណ្ណកម្មសិទ្ធិដី
ស្ថានភាពសន្តិសុខក្នុងថ្ងៃទី១នៃព្រះរាជពិធីបុណ្យអុំទូក
