មេដឹកនាំគណបក្សប្រឆាំងលោក សម រង្ស៊ី ដែលកំពុងស្ថិតនៅក្រៅប្រទេសកម្ពុជានោះ បានបដិសេធថា លោកនឹងមិនចូលខ្លួនក្នុងការឆ្លើយបំភ្លឺតាមការកោះហៅជាលើកដំបូងរបស់តុលាការខេត្តស្វាយរៀងនោះទេ ក្រោយពីតុលាការនេះចោទប្រកាន់ថា លោកបានបំផ្លាញទ្រព្យសម្បត្តិសាធារណៈក្នុងការដកបង្គោលតម្រុយព្រំដែនកម្ពុជាវៀតណាម និងញុះញង់ឲ្យមានការរើសអើងពូជសាសន៍នោះ។
លោក សម រង្ស៊ី ជាមេដឹកនាំនៃគណបក្សសមរង្ស៊ី ដែលកំពុងរស់នៅក្នុងប្រទេសបារាំង បានមានប្រសាសន៍ប្រាប់វិទ្យុអាស៊ីសេរីតាមទូរស័ព្ទមកថា ៖ «ខ្ញុំសុំគិតមើលសិន ព្រោះថា តុលាការហ្នឹងជាតុលាការដែលដែលធ្វើតាមបញ្ជាគណបក្សកាន់អំណាចសព្វថ្ងៃ ហើយគណបក្សកាន់អំណាចសព្វថ្ងៃគ្មានបំណងអ្វីក្រៅពីបំបិទមាត់ បំបាត់សិទ្ធិរបស់អ្នកស្នេហាជាតិដែលហ៊ានប្រឆាំងការលក់ទឹកដីខ្មែរឲ្យទៅបរទេសឈ្លានពាន»។
លោក ជូង ជូងី ជាមេធាវីការពារក្តីឲ្យលោក សម រង្ស៊ី នៃសំណុំរឿងនេះ បានមានប្រសាសន៍ថា លោកនឹងតំណាងឲ្យលោក សម រង្ស៊ី ទៅឆ្លើយបំភ្លឺជំនួសលោកទាំងការសាកសួរនិងការជម្រះក្តីនាពេលខាងមុខនេះ។
លោក ជូង ជូងី បានមានប្រសាសន៍ថា ៖ «ដូច្នេះនៅក្នុងករណីលោក សម រង្ស៊ី ចូលក្ដី មិនចូលក្ដី ខ្ញុំត្រូវតែចូលដើម្បីការពារសិទ្ធិកូនក្ដីរបស់ខ្ញុំ។ នៅពេលដែលកាត់ក្ដី ខ្ញុំនឹងចូលទៅការពារគាត់តាមផ្លូវច្បាប់»។
លោក ទ្បុង កេសភីរម្យ ជាចៅក្រមស៊ើបអង្កេតនៃតុលាការសាលាដំបូង ខេត្តស្វាយរៀង បានមានប្រសាសន៍ថា លោកមិនទាន់អាចបញ្ជាក់បានទេ នៅពេលដែលវិទ្យុអាស៊ីសេរីបានសាកសួរអំពីនីតិវិធីបន្ទាប់ថា តើនិងមានការចេញដីកាតាមចាប់ខ្លួនឬយ៉ាងណា នៅពេលដែលលោក សម រង្ស៊ី បានបដិសេធមិនព្រមមកបង្ហាញខ្លួនតាមការកោះហៅរបស់តុលាការនោះ។
លោក ទ្បុង កេសភីរម្យ បានបញ្ជាក់ថា ៖ «ទិសដៅខាងមុខ ខ្ញុំធ្វើម៉េចៗ ខ្ញុំមិនអាចជូនព័ត៌មានទៅលោកបានទេ!»។
ឯកសារដីកាបង្គាប់ឲ្យចូលខ្លួនដែលវិទ្យុអាស៊ីសេរីទទួលបាន ចុះថៃ្ងទី១៦ ខែធ្នូនេះ ឲ្យដឹងថា លោក ទ្បុង កេសភីរម្យ ជាចៅក្រមស៊ើបសួរនៃតុលាការខេត្តស្វាយរៀង បានបង្គាប់ឲ្យលោក សម រង្ស៊ី អាយុ ៦០ឆ្នាំ ជាតំណាងរាស្រ្តមណ្ឌលខេត្តកំពង់ចាម និងជាប្រធាននៃគណបក្សសមរង្ស៊ី ចូលខ្លួនទៅកាន់តុលាការនៅថ្ងៃទី៨ ខែធ្នូ ដើម្បីសាកសួរអំពីដំណើររឿងធ្វើឲ្យខូចខាតដោយចេតនានូវតម្រុយព្រំដែនលេខ១៨៥ និងការញុះញង់ឲ្យមានការរើសអើងពូជសាសន៍។
លោក ចាន់ សុវ៉េត ជាមន្រ្តីស៊ើបអង្កេតនៃអង្គការការពារសិទ្ធិមនុស្ស អាដហុក បានមានប្រសាសន៍អត្ថាធិប្បាយថា ៖ «ប្រហែលជាមានចេតនានយោបាយច្រើនជាង។ គួរតែយើងចេះជជែកគ្នា យើងមិនចាំបាច់ទៅប្ដឹងផ្ដល់គ្នាទេ!»។
សភាជាតិនៃប្រទេសកម្ពុជា កាលពីថៃ្ងទី១៦ ខែវិច្ឆិកាកន្លងទៅ បានលើកអភ័យឯកសិទ្ធិជាតំណាងរាស្រ្តពីលោក សម រង្ស៊ី ក្រោយពីលោក សម រង្ស៊ី បានដកបង្គោលតម្រុយព្រំដែនកម្ពុជាវៀតណាមចំនួន ៦ដើមនៅក្នុងភូមិកោះក្បានកណ្តាល ឃុំសំរោង ស្រុកចន្រ្ទា ខេត្តស្វាយរៀង កាលពីថៃ្ងទី២៥ ខែតុលាកន្លងទៅនេះ បន្ទាប់ពីអ្នកភូមិខ្មែរនៅតំបន់នោះជាច្រើននាក់ បានរៀបរាប់ប្រាប់លោក សម រង្ស៊ី អំពីទុក្ខលំបាកនៃការរងគ្រោះ ដោយការបាត់បង់ដីធ្លីបង្កបង្កើនផលចិញ្ចឹមជីវិត ដោយសារតែការព្រមព្រៀងរបស់រដ្ឋាភិបាលខ្មែរ ជាមួយនឹងវៀតណាមក្នុងការបោះបង្គោលព្រំដែននៅទីនោះ។
ជាមួយគ្នានេះដែរ ជំទប់ទី២ នៃឃុំសំរោង ខាងគណបក្សសមរង្ស៊ី លោក ពៅ ភាព និងលោកតាអាចារ្យគណៈកម្មការវត្តអង្គរំដេញចំនួន ២នាក់ ត្រូវបានតុលាការក្នុងខេត្តស្វាយរៀងនោះ កោះហៅសាកសួរជុំវិញសំណុំរឿងនេះនៅសប្តាហ៍ក្រោយ៕