លោក អ៊ូ ជៀនអ៊ី អ្នកគាំទ្រសកម្មដល់គណបក្សសមរង្ស៊ី នៅរដ្ឋធានីវ៉ាស៊ីនតោន មានប្រសាសន៍ឲ្យវិទ្យុអាស៊ីសេរីដឹងបន្ថែមថា ៖ «បំណងគឺប្រឆាំងនឹងរដ្ឋសភាខ្មែរដកអភ័យឯកសិទ្ធិឯកឧត្ដម សម រង្ស៊ី ហើយនិងប្រឆាំងនឹងយួនឈ្លានពានទឹកដីខ្មែរ រំលោភទឹកដីខ្មែរយកស្រែអ្នកស្រុកហ្នឹងណា៎! គឺធ្វើនៅគ្រប់ស្ថានទូតនៅថ្ងៃសៅរ៍ ទី២៨ ខែវិច្ឆិកានេះ ចាប់ផ្ដើមពីម៉ោង១១។ ខ្ញុំទទួលភារៈជាអ្នករៀបចំអញ្ជើញទាំងអស់ មនុស្សដែលយល់ថា រដ្ឋសភាដកអភ័យឯកសិទ្ធិខុសហ្នឹង សូមអញ្ជើញចូលរួមទាំងអស់»។
ចំណែកសមាជិក សមាជិកានិងយុវជននៃគណបក្សសមរង្ស៊ី នៅប្រទេសកាណាដាវិញ ក៏គ្រោងនឹងនាំគ្នាធ្វើបាតុកម្មអហិង្សាក្នុងបំណងដូចគ្នានេះដែរ តែធ្វើនៅមុខអគារសភាជាតិនៃប្រទេសកាណាដា ធ្វើនៅថ្ងៃដូចគ្នាគឺថ្ងៃសៅរ៍ ទី២៨ ខែវិច្ឆិកា ឆ្នាំ២០០៩នេះ នៅទីក្រុងអូតាវ៉ា ប្រទេសកាណាដា ចាប់ពីម៉ោង១១ព្រឹក ដល់ម៉ោង៣រសៀល ដូចគ្នានឹងនៅវ៉ាស៊ីនតោនដែរ ស្នើឲ្យសភាកាណាដាជួយធ្វើអន្តរាគមន៍ឲ្យមានយុត្តិធម៌ចំពោះលោក សម រង្ស៊ី ផង។
សូមរំឭកជូនថា រដ្ឋសភាកម្ពុជាកាលពីថ្ងៃទី១៦ ខែវិច្ឆិកា ឆ្នាំ២០០៩កន្លងមកនេះ បានសម្រេចព្យួរអភ័យឯកសិទ្ធិសភាពីរូបលោក សម រង្ស៊ី ដើម្បីផ្តល់ឱកាសឲ្យតុលាការខេត្តស្វាយរៀងស៊ើបអង្កេតករណីបណ្តឹងរបស់អាជ្ញាធរស្រុកចន្រ្ទាដែលប្តឹងចោទថា លោក សម រង្ស៊ី បានបំផ្លាញទ្រព្យសម្បត្តិសាធារណៈ គឺចំពោះការដែលលោកបានដកបង្គោលកាលពីថ្ងៃទី២៥ ខែតុលា ខែមុននេះ ដកចេញពីដីស្រែរបស់ពលរដ្ឋខ្មែរនៅឃុំសំរោង ក្នុងស្រុកចន្រ្ទា ខេត្តស្វាយរៀង ដែលអាជ្ញាធរខេត្តខ្មែរនិងវៀតណាមអះអាងថា នោះជាបង្គោលបណ្តោះអាសន្នខណ្ឌព្រំដែនខ្មែរនិងវៀតណាម។
គណៈកម្មាធិការព្រំដែនកម្ពុជានៅប្រទេសបារាំងផ្ដោតការយកចិត្តទុកដាក់លើករណីសមរង្ស៊ី
គណៈកម្មាធិការព្រំដែនកម្ពុជាដែលមានទីស្នាក់ការនៅប្រទេសបារាំង បានចេញសេចក្តីរាយការណ៍ផ្តោតអំពីបញ្ហាដែលលោក សម រង្ស៊ី រងការចោទពីបទថាបានប្រព្រឹត្តបទឧក្រិដ្ឋដោយការបំផ្លាញសម្បត្តិសាធារណៈនិងបានគំរាមដល់សន្តិសុខជាតិ។
សេចក្តីថ្លែងការណ៍នោះចុះថ្ងៃទី២៣ ខែវិច្ឆិកាកន្លងមកថ្មីៗនេះ រិះគន់ចំពោះការចោទដោយប្រើពាក្យបំផ្លាញសម្បត្តិសាធារណៈនោះ ថាមិនសមរម្យទេ ព្រោះថា បង្គោលតម្រុយនោះឋិតនៅក្នុងដីស្រែរបស់កសិករខ្មែរ ហើយដែលខ្មែរម្ចាស់ដីធ្លាប់បានតវ៉ារឿងបោះបង្គោលលើដីគាត់ តែពុំមានការដោះស្រាយពីអាជ្ញាធរឃុំនិងស្រុក។ ដីនោះជាដីឯកជនដែលម្ចាស់ដីអាចមានសិទ្ធិដកបង្គោលនោះចេញបាន តែបើថា ដីនោះអាជ្ញាធរបានដកហូតទុកជាសម្បត្តិសាធារណៈ ក៏គ្មានសំណងស្របច្បាប់ឲ្យដល់ម្ចាស់ដីនៅឡើយដែរ។
ចំពោះពាក្យដែលចោទថា គំរាមដល់សន្តិសុខជាតិ គណៈកម្មាធិការព្រំដែនកម្ពុជាបញ្ជាក់ថា នៅក្នុងប្រទេសមួយដែលមានច្បាប់គ្រប់គ្រង គេត្រូវបញ្ជាក់ឲ្យច្បាស់អំពីអ្វីទៅដែលហៅថា សន្តិសុខជាតិ ទើបគេអាចប្រមាណបានអំពីលក្ខណៈនិងទំហំនៃការគំរាមជាយថាហេតុដល់សន្តិសុខជាតិនោះ។
គណៈកម្មាធិការព្រំដែនកម្ពុជាបានលើកជាសំណួរថា ការដកបង្គោលបណ្តោះអាសន្ននោះ តើលោក សម រង្ស៊ី បង្កគ្រោះថា្នក់ដល់ប្រជាជនខ្មែរ ឬបង្កចលាចលក្នុងស្រុកដែលអាចកើតជាសង្គ្រាមផ្ទៃក្នុង ឬក៏សង្រ្គាមកម្ពុជានិងវៀតណាមឬទេ? លោក សម រង្ស៊ី និងសហការី បានទៅពិនិត្យបង្គោលនោះតាមការអញ្ជើញរបស់ពលរដ្ឋដែលជាអ្នកតវ៉ា ហើយពុំមានកាន់កាំបិត ពូថៅ ឬកាំភ្លើង សម្រាប់គំរាមនរណាម្នាក់ឡើយ។
ដោយសង្ខេប លោកបណ្ឌិត ឌី ការ៉េត អនុប្រធានគណៈកម្មាធិការព្រំដែនកម្ពុជា សរសេរក្នុងសេចក្តីថ្លែងការណ៍ដដែលនោះថា ការកាត់ទោសលោក សម រង្ស៊ី ពិតជានឹងធ្វើឡើងនាពេលខាងមុខនេះ។ គណៈកម្មាធិការព្រំដែនកម្ពុជាបញ្ជាក់ថា នេះហើយជាទម្ងន់នៃការសង្កត់ដឹកនាំរបស់ក្រុងហាណូយលើរបបលោក ហ៊ុន សែន បក្សប្រជាជនកម្ពុជា។
វិទ្យុអាស៊ីសេរីនៅមិនទាន់ទទួលបានសេចក្តីថ្លែងការណ៍ពីខាងរដ្ឋាភិបាលកម្ពុជាប្រតិកម្មតបចំពោះការចោទប្រកាន់នេះនៅឡើយទេមកទល់នឹងព្រឹកថ្ងៃព្រហស្បតិ៍នេះ៕