សម្ដេចក្រុមព្រះបានមានព្រះបន្ទូលបន្ថែមថា ព្រះអង្គបានសង្កេតឃើញថា អ្នករាជានិយម អ្នកជាតិនិយមមានសំឡេងច្រើនណាស់នៅក្នុងព្រះរាជាណាចក្រកម្ពុជានេះ តែស្ថិតនៅក្នុងភាពរប៉ាត់រប៉ាយ ដែលព្រះអង្គមានទិសដៅប្រមែប្រមូល ៖ «ខ្ញុំមានទិសដៅប្រមែប្រមូលអ្នករាជានិយមឡើងវិញ ដែលគណបក្សហ៊្វុនស៊ិនប៉ិចក្តី គណបក្សជាតិនិយមក្តី ពុំមានលទ្ធភាពដោយអវត្តមាន ខ្ញុំប្រមែប្រមូលនូវកម្លាំងអស់ទាំងនេះ ទិសដៅទីពីរ យើងប្រមែប្រមូលបានហើយ គឺយកសំឡេងទាំងនេះទៅចូលរួមចំណែកក្នុងការបម្រើប្រទេសជាតិឡើងវិញ»។
ព្រះអង្គបានមានព្រះបន្ទូលទៀតថា គណបក្សរាជានិយមហ៊្វុនស៊ិនប៉ិចបច្ចុប្បន្ននេះ មិនមែនជាគណបក្សហ៊្វុនស៊ិនប៉ិច ដែលប្រសូត្រចេញមកពីចលនាតស៊ូដែលបង្កើតដោយព្រះបិតារបស់ព្រះអង្គ ដែលជាអតីតព្រះមហាក្សត្រ គឺព្រះបាទ នរោត្តម សីហនុ នៅឆ្នាំ១៩៨១ នោះទេ ៖ «មានអ្នកខ្លះគេយករឿងសោកនាដកម្មយ៉ាងឈឺចាប់យ៉ាងខ្លោចផ្សាបំផុត ថ្ងៃ២២ វិច្ឆិកា កន្លងនេះ យកទៅប្រើ ខ្ញុំបើមានកម្លាំងគ្រប់គ្រាន់នៅតែបន្តអ្វីមួយដែលជាផ្លូវកណ្ដាល លើកជាបញ្ហា ហើយលើកជាដៃគូពិតប្រាកដក្នុងការដោះស្រាយ»។
សម្ដេចក្រុមព្រះ នរោត្តម រាណឫទ្ធិ ត្រូវបានគណបក្សហ៊្វុនស៊ិនប៉ិច ធ្វើសន្និបាតដកចេញពីតំណែងកាលពីថ្ងៃទី១៨ ខែតុលា ឆ្នាំ២០០៦ ហើយបច្ចុប្បន្នព្រះអង្គជាទីប្រឹក្សាព្រះមហាក្សត្រ៕