ប្រជាពលរដ្ឋរស់នៅឃុំញ៉ាង ស្រុកអណ្ដូងមាស ខេត្តរតនគិរី នៅថ្ងៃចន្ទទី ១៨ ខែកក្កដា ឆ្នាំ ២០១១ ឲ្យដឹងថា ម៉ូតូចំនួនបីគ្រឿងជាមធ្យោបាយដឹកជញ្ជូនឈើ និងកំណាត់ឈើបីដើមរបស់ពលរដ្ឋវៀតណាម ត្រូវបានប្រជាសហគមន៍ស្ទាក់ចាប់បានក្នុងទឹកដីខ្មែរ នៅចម្ងាយប្រមាណ ៤ គីឡូម៉ែត្រពីប៉ុស្តិ៍នគរបាលការពារព្រំដែន ផាកតាម។
ប្រជាពលរដ្ឋប្រមាណ ១០០ នាក់រស់នៅភូមិញ៉ាង ភូមិតាំងសេ និងភូមិលោម ដែលមានភូមិសាស្ត្រជាប់ និងប្រទេសវៀតណាម កាលពីថ្ងៃទី ១៦ ខែកក្កដា ឆ្នាំ២០១១ គឺជាអ្នកស្ទាក់ចាប់បានម៉ូតូ និងវត្ថុតាងបទល្មើសព្រៃឈើឆ្លងដែននេះដោយសារអ្នកភូមិខឹងសម្បារជាមួយតម្រួតព្រំដែនប៉ុស្តិ៍នៅតំបន់នោះ បានកាប់រំលំដើមឈើរាប់សិបដើមលើកំណាត់ផ្លូវប្រមាណមួយគីឡូម៉ែត្រ ដើម្បីរារាំងមិនឲ្យអ្នកភូមិចូលព្រៃ ហើយទុកឱកាសឲ្យពលរដ្ឋវៀតណាមដឹកជញ្ជូនឈើខុសច្បាប់បានងាយស្រួល។
អ្នកភូមិតាំងលោម លោក កាឡាន ហ្លាន មានប្រសាសន៍ថា មន្ត្រីប៉ូលិសការពារព្រំដែន ប៉ុស្តិ៍ ផាតាម ឃុបឃិតឲ្យពលរដ្ឋវៀតណាមដឹកជញ្ជូនដោយម៉ូតូឆ្លងដែនតាមប៉ុស្តិ៍ព្រំដែន ជាច្រើនឆ្នាំមកហើយ បើទោះបីជាអ្នកភូមិព្យាយាមផ្ដល់ដំណឹង និងសុំកិច្ចអន្តរាគមន៍ទប់ស្កាត់យ៉ាងណាក្ដី ក៏សកម្មភាពកាប់ ឈើនៅតែបន្តកើតមាន។
លោកបន្តថា ដោយសារហេតុផលនេះ អ្នកភូមិក៏បាននាំគ្នាចូលព្រៃកាប់ឈើដូចគ្នា ដើម្បីលក់យកប្រាក់ចិញ្ចឹមជីវិត ក៏ប៉ុន្តែ កងកម្លាំងប៉ូលិសការពារព្រំដែនបានរារាំង ៖ «យួនធ្វើឈើបាន ចាប់ម៉ូតូយួនបីគ្រឿង ហើយទាំងឈើទាំងអី។ មនុស្សហ្នឹងគេចាប់អត់ទាន់គេរត់»។
តំណាងសហគមន៍ទាំងបីភូមិ លោក រម៉ាម ហ៊ាម មានប្រសាសន៍ថា អ្នកភូមិរាប់សិបនាក់ បាននាំគ្នាទៅតវ៉ានៅប៉ុស្តិ៍ការពារព្រំដែន ផាកតាម ឲ្យបើកផ្លូវនោះឡើងវិញ ដើម្បីប្រជាពលរដ្ឋធ្វើដំណើរចេញចូលទៅលក់ផលិតផលរបស់អ្នកភូមិ ជាមួយប្រជាពលរដ្ឋវៀតណាម ដែលមានភូមិស្រុកជាប់គ្នានោះ។ ក៏ប៉ុន្តែ មន្ត្រីការពារព្រំដែនមិនយល់ព្រម។
លោក រម៉ាម ហ៊ាម ៖ «ខាងមេប៉ុស្តិ៍ហ្នឹង គាត់ធ្វើឈើធ្វើអីជាមួយពួកបងប្អូនយើងខាងវៀតណាម ដែរអ៊ីចឹងបង។ ដល់អ៊ីចឹងបងប្អូនតវ៉ាៗ ថាម៉េចពួកខ្ញុំដឹកអត់បាន ម៉េចបើយួនដឹកបាន»។
វិទ្យុអាស៊ីសេរី នៅថ្ងៃច័ន្ទទី ១៨ ខែកក្កដា ឆ្នាំ ២០១១ មិនអាចទាក់ទងនាយនគរបាលប៉ុស្តិ៍ការពារព្រំដែន ផាតាម ដើម្បីផ្ដល់ឱកាសឆ្លើយតបការចោទប្រកាន់របស់អ្នកភូមិបានទេ។
ស្នងការរងប៉ូលិសខេត្តរតនគិរី ទទួលបន្ទុកកិច្ចការព្រំដែន លោក ស៊ូ វ៉ាន់ខាំវ៉ាន់ មានប្រសាសន៍ថា អ្នកភូមិនៅតំបន់នោះបានប្រើប្រាស់ផ្លូវព្រៃនោះ ដើម្បីដឹកជញ្ជូនផលិតផលខុសច្បាប់ឆ្លងដែន ទើបក្រុមតម្រួតបិទផ្លូវ ហើយឲ្យអ្នកភូមិឆ្លងកាត់តាមច្រកប៉ុស្តិ៍ត្រួតពិនិត្យវិញ។
លោកបដិសេធថា ម៉ូតូបីគ្រឿង ដែលអ្នកភូមិរឹបអូសនោះ គឺជាម៉ូតូពលរដ្ឋវៀតណាមចេញចូលរកស៊ីជាមួយអ្នកភូមិនៅតំបន់នោះជាធម្មតា។ មិនមានដឹកឈើដូចការចោទនោះឡើយ «ចន្លោះហ្នឹងគឺប្រជាពលរដ្ឋគាត់ចេញចូលៗ អត់មានពីណាគ្រប់គ្រងបទល្មើស។ គាត់ឧស្សាហ៍យកទៅតាមហ្នឹងដែរប្រជាពលរដ្ឋហ្នឹងណា! ដល់អញ្ចឹងយើងបិទផ្លូវហ្នឹង។ មិនថាខាងណាល្អខាងណាអាក្រក់ទេ បានគេសហការគេជួយទប់ស្កាត់ខ្ញុំក៏អរមែនទែន។ យ៉ាងណាក៏ដោយ យើងត្រូវសហការគ្នាហ្នឹងហើយ»។
អភិបាលស្រុកអណ្ដូងមាស លោក នង ដារិទ្ធ មានប្រសាសន៍ទទួលស្គាល់ថា កន្លងទៅនេះ បាតុភាពក្នុងការលួចកាប់ឈើអនាធិបតេយ្យនៅតំបន់នោះ ធ្វើឲ្យមានជម្លោះរវាងតម្រួតព្រំដែន សមត្ថកិច្ចមូលដ្ឋាន និងប្រជាពលរដ្ឋនៅតំបន់នោះទៀតផង។
លោកបន្តថា នឹងចាត់ឲ្យមានការស្រាវជ្រាវពីសេចក្ដីចោទប្រកាន់របស់អ្នកភូមិ ដើម្បីរាយការណ៍ជូនអាជ្ញាធរខេត្តធ្វើការដោះស្រាយ ៖ «ព្រោះគាត់អត់ស៊ីដែរ ចេះរកអីតែឯងអញក៏រកដែរ ហើយអាហ្នឹងកើតសង្គ្រាមអញ្ចឹង។ បាញ់គ្នាទៀតឯណោះ រវាងប៉ុស្តិ៍រដ្ឋបាល និងប៉ុស្តិ៍ព្រំដែនវាដាក់គ្នាទៀតណោះ។ ដកអស់មួយពីរហើយហ្នឹង»។
កាលពីឆ្នាំ ២០១០ និងក្នុងឆ្នាំ ២០១១ អ្នកភូមិរស់នៅក្នុងឃុំញ៉ាងស្រុកអណ្ដូងមាស បានផ្ដល់សេចក្ដីរាយការណ៍ពីពលរដ្ឋវៀតណាមចូលមកកាប់ឈើក្នុងដីខ្មែរ និងរកឃើញគំនរឈើក្នុងព្រៃព្រមទាំងរឹបអូសបានរណាយន្តតូចៗ សម្រាប់អារច្រៀកឈើ ឧបករណ៍ដឹកជញ្ជូនឈើ រួមទាំងឃាត់ខ្លួនពលរដ្ឋវៀតណាមបានមួយចំនួន ដែលបានចូលមកក្នុងដីខ្មែរកាប់ឈើ។
ករណីដូចគ្នាក្រុមសមត្ថកិច្ចនៅតំបន់នោះក៏បានទទួលស្គាល់ ហើយបានអប់រំដោះលែង និងប្រគល់វត្ថុតាងល្មើសទៅវិញ ដើម្បីជាកិច្ចសហការមិត្តភាពប្រទេសទាំងពីរ៕