ក៏ប៉ុន្តែ ថ្មីៗនេះនៅឯខេត្តរតនគិរី មន្ត្រីសិទ្ធិមនុស្សនៃអង្គការក្រៅរដ្ឋាភិបាលចំនួនពីរ បានប្ដឹងមន្ត្រីអាជ្ញាធរមូលដ្ឋានតាមផ្លូវតុលាការវិញ ក្នុងរឿងព្រហ្មទណ្ឌបទគំរាមកំហែង បរិហារកេរ្តិ៍ បំបិទសេរីភាពបំពេញការងាររបស់មន្ត្រីអង្គការសង្គមស៊ីវិលជាមួយប្រជាពលរដ្ឋ។
មន្ត្រីនៃមជ្ឈមណ្ឌលសិទ្ធិមនុស្សកម្ពុជាមួយរូប នឹងចូលខ្លួនទៅស្ថាប័នអយ្យកាតុលាការខេត្តរតនគិរី នៅថ្ងៃពុធ ទី២៤ ខែតុលា ឆ្នាំ២០១២ ខាងមុខនេះ ក្នុងនាមជាដើមបណ្ដឹងចោទប្រកាន់មន្ត្រីអាជ្ញាធរឃុំប៉ាតាង ចំនួនពីររូប។
អ្នកសម្របសម្រួលកម្មវិធីពង្រឹងអំណាចសហគមន៍ លោក ឈឹម សាវុធ បានធ្វើដំណើរមកដល់ខេត្តរតនគិរី ហើយ កាលពីរសៀលថ្ងៃច័ន្ទ ទី២២ ខែតុលា តាមដីកាកោះហៅរបស់ព្រះរាជអាជ្ញារងនៃតុលាការខេត្តរតនគិរី គឺលោក រស់ សារាំ។
លោក ឈឹម សាវុធ មានប្រសាសន៍បញ្ជាក់ថា លោកបានប្ដឹងមេឃុំប៉ាតាង គឺលោក គិ ចេន និងនាយនគរបាលប៉ុស្តិ៍ឃុំ លោក ប្លាង នា ពីបទបានប្រើប្រាស់កងនគរបាលប្រដាប់អាវុធ គំរាមកំហែង ពោលពាក្យអសុរោះ ប្រមាថ រារាំងសកម្មភាពលោកក្នុងភារកិច្ចអប់រំផ្សព្វផ្សាយច្បាប់ និងសិទ្ធិមនុស្សជូនប្រជាពលរដ្ឋ និងរំលោភលើសារាចរណែនាំរបស់ក្រសួងមហាផ្ទៃ ស្ដីពីគោលការណ៍អនុញ្ញាតជួបប្រជុំ រៀបចំសិក្ខាសាលា និងប្រារព្ធវេទិការបស់អង្គការសង្គមស៊ីវិល។
លោក ឈឹម សាវុធ៖ «មានប្រជាពលរដ្ឋច្រើន ដែលគាត់ចូលមកធ្វើសាក្សីឲ្យយើង ក្នុងហេតុការណ៍ហ្នឹង។ គាត់អ្នកនៅទីនោះផ្ទាល់ គាត់អ្នករងការគំរាមជាងខ្ញុំទៀត គេគំរាមកំហែង និងពាក្យអសុរោះច្រើនទៀត។ គោលបំណងដែលគេធ្វើនេះ ខ្ញុំគិតថា គឺជាការបិទបាំងរឿងស្អីមួយនៅតំបន់ហ្នឹង ហើយមិនចង់ឲ្យសង្គមស៊ីវិលជួបជាមួយប្រជាពលរដ្ឋ»។
ព្រះរាជអាជ្ញារង លោក រស់ សារាំ មានប្រសាសន៍បញ្ជាក់ថា ការកោះហៅដើមបណ្ដឹងនេះ គឺដើម្បីសាកសួរ និងស្វែងរកវត្ថុតាង ឬសាក្សីដាក់បន្ទុកក្នុងរឿងក្តីនេះ។ លោកបន្តថា ការសម្រេចចោទប្រកាន់ចុងចោទ ឬយ៉ាងណា លោកនឹងសម្រេចនៅពេលសាកសួរភាគីរឿងក្តីនេះចប់សព្វគ្រប់៖ «ការកោះហៅរបស់ខាងស្ថាប័នអយ្យកា ដើម្បីឲ្យមកបញ្ជាក់ពីជំហររបស់គាត់ប្ដឹង និងព័ត៌មានពាក់ព័ន្ធបណ្ដឹងរបស់គាត់។ ចុងចម្លើយ និងសាក្សីពាក់ព័ន្ធក្នុងរឿងក្តីហ្នឹង ខាងអយ្យកាបានកោះហៅមកសាកសួរអស់ហើយ»។
មេឃុំប៉ាតាង លោក គិ ចេន មានប្រសាសន៍ឲ្យដឹងដែរថា លោកបានចូលទៅបំភ្លឺជូនមន្ត្រីស្ថាប័នអយ្យកាម្តងហើយ កាលពីចុងខែកញ្ញា កន្លងទៅ ទាក់ទិនរឿងក្តីចោទប្រកាន់នេះ។ លោកអះអាងថា មិនបានគំរាមកំហែងមន្ត្រីសិទ្ធិមនុស្សនោះទេ ក៏ប៉ុន្តែលោកមិនអនុញ្ញាតឲ្យមន្ត្រីសិទ្ធិមនុស្សមកជួបប្រជុំជាមួយប្រជាពលរដ្ឋក្នុងមូលដ្ឋាន ដោយសារអង្គការនេះមិនបានសុំច្បាប់អនុញ្ញាតពីអាជ្ញាធរខេត្ត៖ «ខ្ញុំឆ្លើយជាមួយតុលាការ ខ្ញុំថាអត់មានអ៊ីចឹងឯណា យើងមានសិទ្ធិឯណាគំរាមកំហែង។ ប៉ូលិសគេកាន់កាំភ្លើង គេការពារ រកសុវត្ថិភាព គ្មានការអនុញ្ញាតផង ម៉េចក៏ឲ្យធ្វើការ»។
កាលពីខែកក្កដា អ្នកសម្របសម្រួលសមាគមការពារសិទ្ធិមនុស្សអាដហុក ខេត្តរតនគិរី លោក ប៉ែន ប៊ុណ្ណារ៍ ក៏បានដាក់ពាក្យប្ដឹងមេភូមិប៉ាតាង លោក ផែង ម៉ាំង ពីបទបរិហារកេរ្តិ៍ក្នុងរឿងក្តីជាមួយលោក ឈឹម សាវុធ នេះដែរ។ ស្ថាប័នអយ្យកាបានចេញដីកាកោះហៅលោកឲ្យចូលមកបំភ្លឺនៅការិយាល័យព្រះរាជអាជ្ញារង នៅថ្ងៃទី២៣ ខែតុលា ក៏ប៉ុន្តែលោកសុំពន្យារទៅខែវិច្ឆិកា ឆ្នាំ២០១២ វិញ។
យ៉ាងនេះក្តី មន្ត្រីសិទ្ធិមនុស្សទាំងពីរនាក់ បានអះអាងថា ករណីប្ដឹងនេះ លោកមិនទាមទារសំណង ឬផ្ដន្ទាទោសចុងចោទនោះទេ។ ប្រសិនតុលាការរកឃើញថា មន្ត្រីអាជ្ញាធរទាំងនោះពិតជាបានប្រព្រឹត្តដូចការចោទ លោកទាមទារឲ្យមន្ត្រីមូលដ្ឋានទទួលស្គាល់កំហុសជាផ្លូវការ និងចូលរួមសហការជាមួយអង្គការសង្គមស៊ីវិល អនុវត្តតាមគោលការណ៍ណែនាំរបស់ក្រសួងមហាផ្ទៃ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។