លោក ឯម អឿន មេឃុំត្រពាំងក្រហម ស្រុកកូនមុំ បញ្ជាក់ថា មន្ត្រីតុលាការខាងលើបានជួលកម្មករឲ្យធ្វើរបងហ៊ុមព័ទ្ធដីសាធារណៈរបស់រដ្ឋ ហើយអាជ្ញាធរស្រុកបានបញ្ជាឲ្យអាជ្ញាធរមូលដ្ឋានឃុំ ដាក់កម្លាំងរុះរើរបងនោះពីរលើករួចមកហើយ ប៉ុន្តែសកម្មភាពធ្វើរបងនៅតែបន្ត ដោយពុំមានខ្លាចក្រែងពីច្បាប់។
លោក ឯម អឿន បានបញ្ជាក់ដូច្នេះ ៖ «ចៅហ្វាយស្រុកគាត់ថា អត់បានទេកន្លែងហ្នឹង ស្រាប់តែឃើញ ថោ សារ៉ន គាត់ព័ទ្ធរបង»។
នៅថ្ងៃពុធ ទី៧ ខែតុលា ឆ្នាំ២០០៩ វិទ្យុអាស៊ីសេរី បានទៅដល់ទីដែលមានសេចក្តីរាយការណ៍ខាងលើ ស្ថិតតាមបណ្តោយផ្លូវជាតិលេខ៧៨ ក្នុងភូមិ៣ វាលឆ្កែហត់ ក្នុងស្រុកកូនមុំ សង្កេតឃើញបង្គោលរបងឈើថ្មីត្រូវបានកម្មករកាប់ពីព្រៃ ហើយហ៊ុមព័ទ្ធយកដីព្រៃនៅទីនោះតែម្តង។ ជាក់ស្តែងរបងទើបធ្វើបានជាង៣០០ម៉ែត្រពីផ្នែកម្ខាងនៃដីព្រៃនោះ។
កម្មករម្នាក់ឈ្មោះ ហួយ ណាក់ កំពុងមានវត្តមាននៅក្នុងរោងដែលធ្វើសម្រាប់កម្មករស្នាក់នៅឲ្យដឹងថា លោក ថោ សារ៉ន បានជួលពួកគេមកធ្វើរបងហ៊ុមព័ទ្ធព្រៃ តាមគម្រោងមានបណ្តោយក្បាលដី២៥០ម៉ែត្រ និងជម្រៅប្រមាណ១.០០០ម៉ែត្រ។
លោក ថោ សារ៉ន វិទ្យុអាស៊ីសេរី មិនអាចទាក់ទងសុំការបញ្ជាក់ពីបញ្ហានេះបាននៅឡើយ នៅរសៀលថ្ងៃពុធ ទី៧ តុលា ដោយលោកមិនទទួលទូរស័ព្ទ។
យ៉ាងនេះក្តី លោក លឿង ចាន់ធៀង អភិបាលស្រុកកូនមុំ មានប្រសាសន៍បញ្ជាក់ពីករណីនេះដែរថា ៖ «គាត់ចេះធ្វើអ៊ីចឹង ខ្ញុំទៅកាប់ឲ្យ ទាំងពួកកម្លាំងចម្រុះទៅអាររលំចោលទៀត។ ដីហ្នឹងមានដីកាដកហូតចេញពីខេត្តហើយ»។
លោក ឈឹម សាវុធ មន្ត្រីស៊ើបអង្កេតនៃមជ្ឈមណ្ឌលសិទ្ធិមនុស្សកម្ពុជា មានប្រសាសន៍ថា បានចុះធ្វើការអង្កេតករណីនេះរួចហើយ។ លោកទទួលស្គាល់ថា ពិតជាមានការទន្ទ្រានយកដីទ្រព្យសម្បត្តិរដ្ឋ ដែលជាប់ចោទទៅលើមន្ត្រីតុលាការខាងលើមែន។
លោក ឈឹម សាវុធ មានប្រសាសន៍ដូច្នេះ ៖ «ខាងរដ្ឋាភិបាល ខាងអាជ្ញាធរបានប្រកាសដកហូតតាំងពីឆ្នាំ២០០៥ មកម្ល៉េះ។ កំពុងតែធ្វើបច្ចុប្បន្ននេះ បង្ហាញឲ្យដឹងថា លោក ថោ សារ៉ន កំពុងតែរំលោភបំពានទៅលើដីធ្លីដែលជាសម្បត្តិសាធារណៈរបស់រដ្ឋ»។
កាលពីថ្ងៃទី២៤ ខែកញ្ញា ឆ្នាំ២០០៩ អង្គការសិទ្ធិមនុស្សលីកាដូ និងមជ្ឈមណ្ឌលសិទ្ធិមនុស្សកម្ពុជា បានចេញសេចក្តីថ្លែងការណ៍រួមគ្នា ទាមទារនិងផ្តល់អនុសាសន៍ សុំឲ្យឧត្តមក្រុមប្រឹក្សាអង្គចៅក្រម ផ្អាកការងារ និងស៊ើបអង្កេតទៅលើទង្វើមិនត្រឹមត្រូវរបស់លោក ថោ សារ៉ន ដែលត្រូវបានរកឃើញថា បានស្នើសុំដីជាថ្នូរនឹងការដោះលែងអ្នកភូមិជនជាតិដើម ដែលបានចាប់ឃុំខ្លួនដោយសារប្រឆាំងតវ៉ាការដណ្តើមដីពីក្រុមហ៊ុនឌី.អឹម.ហ្គ្រូប (DM Group)។
ដាក់ឱសានវាទឲ្យលោក ប៉ែន ប៊ុណ្ណារ៍ មន្ត្រីសម្របសម្រួលសមាគមអាដហុក ខេត្តរតនគិរី ចាកចេញពីខេត្ត និងប្រឈមមុខចោទពីបទញុះញង់ឲ្យមានភេរវកម្ម គំរាមចាប់លោក អ៊ូ វីរៈ ប្រធានមជ្ឈមណ្ឌលសិទ្ធិមនុស្សកម្ពុជា។ ប្រើប្រាស់រថយន្តដែលរឹបអូសបានដោយប៉ូលិសក្នុងអំឡុងពេលស៊ើបអង្កេតករណីប្លន់សម្លាប់មនុស្ស៣នាក់៕