ការខកខាននេះកើតមានឡើងដោយសារតែតំណាងសហគមន៍និងតំណាងក្រុមមន្ត្រីអាជ្ញាធរទាំងនោះមិនមានប័ណ្ណចូលរួមពិធី ហើយក្រុមការពារសន្តិសុខធ្វើការរឹតបន្តឹងការពារមិនអនុញ្ញាតឲ្យជនណាគ្មានប័ណ្ណចូលទៅក្នុងបរិវេណប្រារព្ធពិធីនោះឡើយ។
យ៉ាងនេះក្ដីញត្តិទាំងអស់របស់មន្ត្រីមូលដ្ឋាននិងសហគមន៍មួយច្បាប់បានដាក់ជូនអាជ្ញាធរខេត្តកាលពីរសៀលថ្ងៃពុធ (១៧ មីនា) បន្ទាប់ពីអភិបាលខេត្តបញ្ជាក់ថា ញត្តិគួរប្រគល់ជូនថ្នាក់ខេត្តដើម្បីធ្វើការដោះស្រាយ។
តំណាងសហគមន៍ចំនួន ១២ក្រុមមកពីស្រុកចំនួន ៦នៅខេត្តរតនគិរី លោក ម៉ា ប៊ុនឃុន មានប្រសាសន៍ថា អ្នកភូមិរាប់ពាន់គ្រួសារមានការសោកស្ដាយមិនបានប្រគល់ញត្តិផ្ទាល់ដល់លោកនាយករដ្ឋមន្ត្រី ៖ «សហគមន៍នីមួយៗដែលបញ្ជូនឲ្យតំណាងសហគមន៍ទាំងអស់ហ្នឹង គេសង្ឃឹមថា បានជួបនាយករដ្ឋមន្ត្រីផ្ទាល់។ ក្នុងការដាក់ញត្តិនៅសាលាខេត្តខ្ញុំអត់សង្ឃឹមថា បានជាផ្លូវការទេ»។
តំណាងអាជ្ញាធរមូលដ្ឋានក្នុងស្រុកទាំង៦ ដែលគ្រោងដាក់ញត្តិទៅលោកនាយករដ្ឋមន្ត្រីដែរនោះ លោក កែវ ឡុត មានប្រសាសន៍ដែរថា ៖ «ខាងខេត្តគេថា មិនទាន់អាចទេ គេនឹងព្យាយាមដាក់ជូនទៅតាម(លេខា)របស់គាត់»។
នៅក្នុងសន្ទរកថាលោក ហ៊ុន សែន នៅខេត្តរតនគិរី នៅថ្ងៃ១៨ មីនា នេះ មិនបានថ្លែងដល់អ្វីដែលទាក់ទិនរឿងរ៉ាវដីធ្លី ព្រៃឈើនិងផលប៉ះពាល់ដោយសារវារីអគ្គិសនីដែលអ្នកភូមិនិងមន្ត្រីមូលដ្ឋានស្រុកទាំង៦ ប៉ុនប៉ងផ្ញើសារជូនលោកទេ ពោលគឺលោកមានប្រសាសន៍បញ្ជាក់តែពីសារសំខាន់នៃផ្លូវដែលទើបសាងសង់រួចថា នឹងផ្ដល់ប្រយោជន៍សម្រាប់ប្រជាពលរដ្ឋភាគឦសាននិងប្រទេសក្នុងតំបន់ត្រីកោណអភិវឌ្ឍន៍ មានប្រទេសកម្ពុជា វៀតណាម និងលាវ និងជួយជំរុញឲ្យមានការអភិវឌ្ឍវិស័យអគ្គិសនី ដើម្បីទាញយកថាមពលអគ្គិសនីប្រើប្រាស់ក្នុងប្រទេសនិងលក់ចេញទៅប្រទេសជិតខាង។
អភិបាលខេត្តរតនគិរី លោក ប៉ាវ ហមផាន កាលពីថ្ងៃពុធ (១៧ មីនា) មានប្រសាសន៍បញ្ជាក់ថា ញតិ្តទាមទារទាំងអស់គួរដាក់ចូលមកអាជ្ញាធរខេត្តដើម្បីធ្វើការដោះស្រាយ។
មន្ត្រីផ្នែកគាំពារមតិនៃអង្គការអនុផលព្រៃឈើ មានមូលដ្ឋាននៅខេត្តរតនគិរី លោក ជុំ ឈាន មានប្រសាសន៍ទាក់ទិនករណីនេះដែរថា ៖ «នេះជាវិធីសាស្ត្រដែលល្អមួយក្រោយពីគាត់បានទទួលសារពីខាងសហគមន៍ហ្នឹង។ មានសង្ឃឹមថា ចៅហ្វាយខេត្តនឹងចូលរួមធ្វើការដោះស្រាយ»។
មុនមួយថ្ងៃនៃដំណើរទស្សនកិច្ចលោក ហ៊ុន សែន មកកាន់ខេត្តរតនគិរី លោក អ៊ឹម ឈុនលឹម ទេសរដ្ឋមន្ត្រីនិងជារដ្ឋមន្ត្រីក្រសួងរៀបចំដែនដី នគរូបនីយកម្មនិងសំណង់ បានធ្វើពិធីចុះបញ្ជីដីកម្មសិទ្ធិសមូហភាពសហគមន៍ជនជាតិដើមភាគតិច ភូមិល្អឺនក្រែន ឃុំអូរជុំ ជាភូមិទី១ដែលបានចុះបញ្ជីដីធ្លីមុនគេបង្អស់លើផ្ទៃដីជាង ៩០០ហិកតារនៅខេត្តរតនគិរី ដែលជាផ្នែកមួយនៃគោលនយោបាយលើកស្ទួយនិងគាំទ្រសហគមន៍ជនជាតិដើមភាគតិច។
ក្រុមសហគមន៍អ្នកដាក់ញត្តិបញ្ជាក់ថា ពួកគេនឹងរកឱកាសបញ្ជូនញត្តិទៅខុទ្ទកាល័យលោក ហ៊ុន សែន ម្តងទៀត ប្រសិនអាជ្ញាធរខេត្តមិនបានដោះស្រាយបញ្ហារបស់ពួកគាត់៕