លោក សម រង្ស៊ី មេដឹកនាំគណបក្សប្រឆាំងត្រូវបានគណៈកម្មាធិការអចិន្ត្រៃយ៍រដ្ឋសភាលើកអភ័យឯកសិទ្ធិសភាក្នុងកិច្ចប្រជុំមួយកាលពីថ្ងៃទី២៦ កុម្ភៈកន្លងទៅនេះ។
ការសម្រេចនេះគឺបានធ្វើឡើងតាមសំណើរបស់ក្រសួងយុត្តិធម៌ទាក់ទងនឹងរឿងក្តីមួយដោយសារតែលោកមិនព្រមបង់ពិន័យតាមការសម្រេចរបស់គណៈកម្មាធិការជាតិរៀបចំការបោះឆ្នោតនិងក្រុមប្រឹក្សាធម្មនុញ្ញចំនួនទឹកប្រាក់១០លានរៀលពីបទបរិហារកេរ្តិ៍មេដឹកនាំគណបក្សប្រជាជនកម្ពុជានាអំឡុងយុទ្ធនាការបោះឆ្នោតជាតិកន្លងទៅនេះ។
លោក សុក សំអឿន ប្រធានអង្គការក្រុមអ្នកច្បាប់ការពារសិទ្ធិកម្ពុជាបានមានប្រសាសន៍ថា ការលើកអភ័យឯកសិទ្ធិលោក សម រង្ស៊ី នោះ គឺមិនស្របនឹងរដ្ឋធម្មនុញ្ញ។
លោក សុក សំអឿន បានឲ្យដឹងថា ៖ «បើសិនជាស្របតាមបទបញ្ជាផ្ទៃក្នុងក៏ដោយ បានន័យថាច្បាប់របស់សភា ផ្ទៃក្នុងរបស់សភា ក៏ប៉ុន្តែបើសិនជាធ្វើច្បាប់បែបហ្នឹង ហើយបកស្រាយបែបហ្នឹងក៏វាអត់ត្រូវជាមួយរដ្ឋធម្មនុញ្ញដែរ»។
លោកបានមានប្រសាសន៍បន្តដែរថា ការធ្វើដូច្នេះនឹងបណ្តាលឲ្យប៉ះពាល់ដល់ដំណើរការប្រជាធិបតេយ្យ ៖ «អ៊ីចឹងថ្ងៃក្រោយឲ្យតែសភានេះអ៊ីចឹង វាអាចធ្វើអីផ្ដេសផ្ដាសបាន បើសិនជាអ៊ីចឹងខ្ញុំថាវាផ្ទុយនឹងលិទ្ធិប្រជាធិបេតយ្យ»។
គួរបញ្ជាក់ថា នៅក្នុងមាត្រា៨០នៃរដ្ឋធម្មនុញ្ញបានចែងថា តំណាងរាស្ត្រមានអភ័យឯកសិទ្ធិ។ តំណាងរាស្រ្តរូបណាក៏ដោយមិនអាចត្រូវបានចោទប្រកាន់ ចាប់ខ្លួន ឃាត់ខ្លួនឬឃុំខ្លួន ដោយហេតុផលពីការសម្តែងយោបល់ឬបញ្ចេញមតិក្នុងការបំពេញមុខងាររបស់ខ្លួនសោះឡើយ។
ការចោទប្រកាន់ ការចាប់ខ្លួន ការឃាត់ខ្លួនឬការឃុំខ្លួនសមាជិកណាមួយនៃរដ្ឋសភានឹងអាចធ្វើទៅកើតលុះត្រាតែមានការយល់ព្រមពីរដ្ឋសភា ឬពីគណៈកម្មាធិការអចិន្ត្រៃយ៍របស់រដ្ឋសភាក្នុងចន្លោះសម័យប្រជុំនៃរដ្ឋសភា វៀរលែងតែក្នុងករណីបទល្មើសជាក់ស្តែង។ ក្នុងករណីខាងក្រោមនេះក្រសួងមានសមត្ថកិច្ចត្រូវធ្វើសេចក្តីរាយការណ៍ជូនរដ្ឋសភាឬជូនគណៈកម្មាធិការអចិន្រ្តៃយ៍របស់រដ្ឋសភាជាបន្ទាន់ដើម្បីសម្រេច។
ក្នុងមាត្រារបស់រដ្ឋធម្មនុញ្ញក៏បានបញ្ជាក់ដែរថា សេចក្តីរបស់សម្រេចគណៈកម្មាធិការអចិន្រ្តៃយ៍របស់រដ្ឋសភាត្រូវដាក់ជូនសម័យប្រជុំរដ្ឋសភាខាងមុខដើម្បីអនុម័តតាមមតិភាគច្រើនពីរភាគបីនៃសមាជិករដ្ឋសភាទាំងមូល។
ក្នុងករណីទាំងអស់ខាងលើនេះ ការឃុំខ្លួន ការចោទប្រកាន់តំណាងរាស្រ្តណាមួយត្រូវផ្អាក ប្រសិនបើរដ្ឋសភាបានបញ្ចេញមតិឲ្យផ្អាក តាមមតិភាគច្រើន បីភាគបួននៃចំនួនសមាជិករដ្ឋសភាទាំងមូល។
លោក អ៊ូ វីរៈ ប្រធានមជ្ឈមណ្ឌលសិទ្ធិមនុស្សកម្ពុជាបានមានប្រសាសន៍ថា ការសម្រេចរបស់គណៈកម្មាធិការអចិន្រ្តៃយ៍របស់រដ្ឋសភាលើរូបលោក សម រង្ស៊ី នាពេលនេះ គឺជាការគំរាមកំហែងមួយ។
លោក អ៊ូ វីរៈ បានមានប្រសាសន៍ថា ៖ «ករណីហ្នឹងវាផ្ដល់ឱកាសឲ្យបុគ្គលមួយក្រុមនៃគណៈអចិន្រ្តៃយ៍ហ្នឹងទៅជាក្រុមដែលមានអំណាចទៅលើភាពទុកចិត្តរបស់សភាឬមួយការការពាររបស់សមាជិកសភា អាហ្នឹងធ្វើឲ្យក្លាយទៅជាការគំរាមកំហែងដល់សេរីភាពរបស់សភា សមាជិកសភា ក្នុងការបំពេញតួនាទីទៅហើយ»។
លោក អ៊ូ វីរៈ បានបញ្ជាក់ដែរថា ក្រៅពីការរំលោភច្បាប់ទង្វើនេះក៏អាចជាការរំលោភដល់គោលការណ៍ប្រជាធិបតេយ្យ។
លោក អ៊ូ វីរៈ បានបញ្ជាក់ថា ៖ «យើងឃើញថា ...ទី១ ខុសហ្នឹង វាធ្វើអ៊ីចឹងអត់ត្រឹមត្រូវទេ ទី២ រឿងប្រជាធិបតេយ្យស្រុកខ្មែរ យើងឃើញថាមិនសូវជាធ្វើតាមប្រព័ន្ធច្បាប់និងគោលនយោបាយត្រឹមត្រូវ ច្រើនតែធ្វើតាមកាលៈទេសៈ ហើយការសម្រេចចិត្តឬមួយក៏ការសម្រេចចិត្តរបស់មួយក្រុមតូច ឬមួយក៏បុគ្គលម្នាក់អីអ៊ីចឹង ជឿថាពាក់ព័ន្ធហើយ បានន័យ ប្រជាធិបតេយ្យអត់មានស្ថិរភាពទេ»។
រីឯលោក សុន ឆ័យ អ្នកតំណាងរាស្ត្រគណបក្សសមរង្ស៊ីបានមានប្រសាសន៍ថា ការសម្រេចនោះគឺជារឿងដ៏អាក្រក់មួយសម្រាប់ប្រវត្តិសាស្រ្តសភាខ្មែរ ៖ «រឿងត្រឹមបញ្ហាបង់ប្រាក់ប៉ុណ្ណេះ មិនធ្លាក់ថ្នាក់ដល់ទៅដកអភ័យឯកសិទ្ធិតំណាងរាស្រ្ដ វាធ្វើឲ្យតំណាងរាស្រ្ដហ្នឹងថោក។ ថោកមិនមែនតែតំណាងរាស្រ្ដបក្សប្រឆាំងទេ តំណាងរាស្រ្ដ១២៣តែម្ដង ទាំងសម្ដេច ហេង សំរិន ផង អភ័យឯកសិទ្ធិគាត់ក៏ថោកជាមួយយើងដែរ ព្រោះតែរឿងប៉ុណ្ណឹង ដកអភ័យឯកសិទ្ធិតំណាងរាស្រ្ដលេងសើច»។
ប៉ុន្តែលោក ជាម យៀប អ្នកតំណាងរាសស្រ្តនិងជាមន្រ្តីគណបក្សប្រជាជនកម្ពុជាវិញ បានមានប្រសាសន៍ចំពោះការសម្រេចនោះថា ៖ «អង្គប្រជុំគណៈអចិន្រ្តៃយ៍ គ្រាន់តែថាមិនសម្រេចឯណាដូចនេះនោះទេ គឺថាដែលដាក់ចូលក្នុងរបៀវារៈនៃសម័យប្រជុំ គឺសុំព្យួរអភ័យឯកសិទ្ធិ មិនទាន់បានប្រជុំ មិនទាន់បាននេះឯណា ប៉ុន្តែឯកឧត្ដម សម រង្ស៊ី គាត់ភ័យខ្លួនគាត់ទេ»។
ទោះជាយ៉ាងណាក៏ដោយ លោកបណ្ឌិត ឈឹម ផលវរុន នាយកវិទ្យាស្ថានពលរដ្ឋវិជ្ជាបានមានប្រសាសន៍ថា ករណីការសម្រេចរបស់គណៈកម្មាធិការអចិន្រ្តៃយ៍របស់រដ្ឋសភាលើរូបលោក សម រង្ស៊ី នាពេលនេះ គឺជាភាពមិនច្បាស់លាស់នៃច្បាប់ខ្មែរនៃពេលបច្ចុប្បន្ន។
លោកបណ្ឌិត ឈឹម ផលវរុន បានមានប្រសាសន៍ថា ៖ «បទបញ្ញត្តិរដ្ឋធម្មនុញ្ញហ្នឹង ការលើកអភ័យឯកសិទ្ធិហ្នឹងវាមានហេតុផលច្បាស់លាស់មួយ ប៉ុន្តែនីតិវិធីគឺបានកំណត់ច្បាស់ គឺការសម្រេចដោយប្រជុំពេញអង្គនៃរដ្ឋសភា ប៉ុន្តែនៅក្នុងមាត្រារដ្ឋធម្មនុញ្ញក៏បានរំលេចនូវពាក្យក្នុងករណីដែលសភាវ៉ាកង គឺពេលហ្នុងភារកិច្ចទាំងអស់ត្រូវផ្ដល់ឲ្យគណៈកម្មាធិការអចិន្រ្តៃយ៍សភា។ ប៉ុន្តែឃ្លាប្រយោគរបស់រដ្ឋធម្មនុញ្ញពុំបានបញ្ជាក់ឲ្យច្បាស់ថា តើការសម្រេចរបស់គណៈកម្មាធិការអចិន្រ្តៃយ៍របស់រដ្ឋសភាអាចសម្រេចដកអភ័យឯកសិទ្ធិកម្រិតណាហ្នឹង គឺអត់មាននិយាយ»។
លោក ឈឹម ផលវរុន ក៏បានសម្តែងទស្សនៈថា សភាជាតិគួរតែដោះស្រាយបញ្ហាមិនច្បាស់លាស់បែបនេះសម្រាប់ពេលក្រោយៗទៀត។
នៅពេលនេះជម្លោះរវាងលោក សម រង្ស៊ី និងគណៈកម្មាធិការជាតិរៀបចំការបោះឆ្នោតបានបញ្ចប់ទៅហើយក្រោយពេលដែលលោក សម រង្ស៊ី បានសម្រេចតាមការផាកពិន័យនោះ ហើយគណៈកម្មាធិការជាតិរៀបចំការបោះឆ្នោតក៏បានទម្លាក់ពាក្យបណ្តឹងទៅតុលាការផងដែរ ប៉ុន្តែបញ្ហានោះត្រង់ថាតើលោក សម រង្ស៊ី អាចនឹងទទួលបានអភ័យឯកសិទ្ធិសភាវិញដែរឬទេ ហើយនៅពេលណា?។
លោកស្រី ជា វណ្ណាត អ្នកវិភាគនយោបាយប្រទេសកម្ពុជាបានមានប្រសាសន៍ថា ការផ្តល់អភ័យឯកសិទ្ធិសភាជូនប្រធានគណបក្សប្រឆាំងវិញ គឺជាការចាំបាច់ដែលនឹងអាចបង្ហាញពីភាពវិជ្ជមាននៃដំណើរការអនុវត្តរបបសេរីពហុបក្សក្នុងប្រទេសកម្ពុជានោះ។
លោកស្រី ជា វណ្ណាត បានឲ្យដឹងថា ៖ «ពីព្រោះថាយើងចេះតែថាប្រទេសកម្ពុជាលទ្ធិប្រជាធិបតេយ្យនៃពហុភាព មានគណបក្សជំទាស់ ក៏ប៉ុន្តែបើសិនណាជាដំណើរការគណបក្សជំទាស់ហ្នឹងរអាក់រអួលពេក ក៏យើងមិនអាចមានអំណះអំណាងថា យើងវាលទ្ធិប្រជាធិបតេយ្យសេរីពហុភាពដែរ»៕