ក្រសួងមហាផ្ទៃកម្ពុជា ថ្មីៗនេះបានសម្រេចផ្អាកសកម្មភាពសមាគមធាងត្នោត ដែលជាអង្គការអន្តរជាតិក្រៅរដ្ឋាភិបាលក្នុងស្រុកមួយ ចាប់ពីថ្ងៃទី២ ខែសីហា ដល់ថ្ងៃទី៣១ ខែធ្នូ ឆ្នាំ២០១១ ដោយបានលើកហេតុផលថា សមាគមមួយនេះមិនគោរពតាមលក្ខន្តិកៈដែលបានព្រមព្រៀងជាមួយក្រសួងមហាផ្ទៃ។
ការផ្អាកសកម្មភាពសមាគមធាងត្នោត បាននាំឲ្យមានប្រតិកម្មច្រើនពីក្រុមអង្គការសង្គមស៊ីវិលនៅកម្ពុជា ដោយកាលពីថ្ងៃទី១៣ ខែសីហា ឆ្នាំ២០១១ មានអង្គការសមាគមក្រៅរដ្ឋាភិបាលជាតិ និងអន្តរជាតិចំនួន ៤០ស្ថាប័ន បានរួមគ្នាចេញសេចក្ដីថ្លែងការណ៍ថ្កោលទោសចំពោះទង្វើរបស់រដ្ឋាភិបាល ដែលអនុវត្តផ្ទុយពីច្បាប់រដ្ឋធម្មនុញ្ញប្រទេសកម្ពុជា។
សេចក្ដីថ្លែងការណ៍បានចាត់ទុកការផ្អាកសកម្មភាពសមាគមធាងត្នោតរយៈពេល ៥ខែ ថា ជាការរំលោភលើសិទ្ធិសេរីភាពខាងបញ្ចេញមតិ និងសិទ្ធិបង្កើតសមាគមនៅកម្ពុជា ហើយថា ទង្វើរបៀបនេះជាសកម្មភាពគំរាមកំហែង ឬជាការបង្ក្រាបទៅលើអ្នកការពារសិទ្ធិមនុស្សនៅកម្ពុជា។
ក្រសួងមហារផ្ទៃ បានផ្អាកសកម្មភាពសមាគមធាងត្នោតមិនឲ្យបន្តបេសកកម្មរបស់ខ្លួននៅកម្ពុជា កាលពីថ្ងៃទី២ ខែសីហា ឆ្នាំ២០១១។
វិទ្យុអាស៊ីសេរីមិនអាចទាក់ទងប្រធានសមាគមធាងត្នោតដើម្បីសុំសេចក្ដីអត្ថាធិប្បាយជុំវិញការផ្អាកសកម្មភាពសមាគមដោយក្រសួងមហាផ្ទៃ បានទេ តាមទូរស័ព្ទ នៅថ្ងៃអាទិត្យទី១៤ ខែសីហា។ ប៉ុន្តែលោក អ៊ូ វីរៈ ប្រធានមជ្ឈមណ្ឌលសិទ្ធិមនុស្សកម្ពុជា ដែលស្ថិតក្នុងចំណោមអង្គការ-សមាគមក្រៅរដ្ឋាភិបាលជាតិអន្តរជាតិចំនួន ៤០ស្ថាប័ន នៅថ្ងៃអាទិត្យ ទី១៤ ខែសីហា ក្រៅពីបានសម្ដែងការសោកស្ដាយ មន្ត្រីសង្គមស៊ីវិលរូបនេះ ក៏បានចាត់ទុកការផ្អាកសកម្មភាពសមាគមធាងត្នោត ផ្ដើមដោយក្រសួងមហាផ្ទៃ បានធ្វើឡើងដោយមិនមានមូលដ្ឋានច្បាប់ច្បាស់លាស់។
លោក អ៊ូ វីរៈ បញ្ជាក់បន្ថែម ៖ «ថ្លែងការណ៍ថ្កោលទោសដោយយល់ថា ការសម្រេចដោយគ្មានមូលដ្ឋានច្បាប់បែបហ្នឹង គឺជារឿងមួយដែលមិនត្រឹមត្រូវ ហើយជាការគំរាមកំហែងមួយទៅដល់ការងាររបស់សង្គមស៊ីវិល អាចជាការគំរាមកំហែងមួយទៅលើប្រជាធិបតេយ្យទាំងស្រុងផងដែរ ហើយយើងឃើញថា ការរារាំងនូវសកម្មភាពអង្គការមួយនេះ គឺទាក់ទងការបណ្ដេញចេញប្រជាពលរដ្ឋមួយចំនួននៅក្នុងទីក្រុងភ្នំពេញ ហើយប្រហែលជាអាចទាក់ទងការព្យាយាមបណ្ដេញប្រជាពលរដ្ឋមួយចំនួនផ្សេងទៀតចេញពីលំនៅឋាន»។
លោកបន្តថា ក្រសួងមហាផ្ទៃ មុននឹងផ្អាក ឬបញ្ឈប់សកម្មភាពអង្គការ ឬសមាគមណាមួយ គួរតែមានកិច្ចពិភាក្សាជាមួយអង្គការពាក់ព័ន្ធជាមុនៗ នឹងចេញសេចក្ដីសម្រេចផ្អាកសកម្មភាពអង្គការ ឬសមាគមណាមួយកើតឡើង។
ទោះជាបែបនេះក្ដី មន្ត្រីជាន់ខ្ពស់ក្រសួងមហាផ្ទៃ បានអះអាងថា ការផ្អាកសកម្មភាពសមាគមធាងត្នោត ដោយសារតែសមាគមនេះមិនគោរពតាមលក្ខន្តិកៈ និងធ្វើការផ្លាស់ប្ដូរអ្នកគ្រប់គ្រងសមាគមមិនបានឲ្យក្រសួងមហាផ្ទៃដឹង ព្រមទាំងបានធ្វើសកម្មភាពលួចបើកសាខានៅតាមខេត្តក្រុងមួយចំនួនគ្មានច្បាប់អនុញ្ញាតត្រឹមត្រូវ។
លោក ខៀវ សុភ័គ មន្ត្រីនាំពាក្យក្រសួងមហាផ្ទៃ មានប្រសាសន៍ថា មូលហេតុក្រសួងផ្អាកសកម្មភាពសមាគមធាងត្នោតជាបណ្តោះអាសន្ន ក៏ព្រោះតែសមាគមនេះកន្លងមកបានធ្វើសកម្មភាពញុះញង់កម្លាំងពលរដ្ឋឲ្យតវ៉ាប្រឆាំងគម្រោងអភិវឌ្ឍន៍មួយចំនួនរបស់រដ្ឋាភិបាល។
លោកមានប្រសាសន៍បន្ថែមដូច្នេះ ៖ «អង្គការសមាគមធាងត្នោតហ្នឹងបានផ្លាស់ប្ដូរប្រធានសមាគមរបស់ខ្លួនចំនួនបីលើករួចមកហើយ ដែលឈ្មោះប្រធានសមាគមនេះខុសពីឈ្មោះប្រធានដែលមានចែងក្នុងលក្ខន្តិកៈរបស់ខ្លួន ដែលមានតម្កល់ទុកនៅក្រសួង។ ទី២ អង្គការសមាគមហ្នឹងក៏បានបើកសាខាមួយនៅខេត្តកំពត និងទី៣ ជាមូលហេតុមួយដែរ សមាគមធាងត្នោតបានធ្វើសកម្មភាពញុះញង់ប្រជាពលរដ្ឋប្រឆាំងនឹងគម្រោងអភិវឌ្ឍន៍របស់រាជរដ្ឋាភិបាល ដូចជានៅខេត្តកំពត និងនៅរាជធានីភ្នំពេញ គឺគាត់ទប់ស្កាត់ល្បឿននៃគម្រោងអភិវឌ្ឍន៍កសាងផ្លូវដែកកម្ពុជា។ បើសិនជាដៃគូអភិវឌ្ឍន៍របស់រាជរដ្ឋាភិបាលគេព្យួរគម្រោង ឬក៏គេបញ្ឈប់គម្រោងជួសជុល ការជួសជុលផ្លូវដែកមិនទទួលបានជោគជ័យនោះទេ»។
យ៉ាងណាក៏ដោយ ក្រុមអង្គការសង្គមស៊ីវិលបានចាត់ទុកការប្រើប្រាស់បច្ចេកទេសរដ្ឋបាលស្រពេចស្រពិលរបស់រដ្ឋាភិបាល ដើម្បីផ្អាកសកម្មភាពសមាគមធាងត្នោតថា ជាសញ្ញាប្រកាសអាសន្នមួយដែលរដ្ឋាភិបាលកម្ពុជា មានបំណងប្រើប្រាស់ច្បាប់ស្តីពីសមាគម និងអង្គការក្រៅរដ្ឋាភិបាល ដើម្បីរារាំងសកម្មភាពរបស់សមាគមមិនមែនរដ្ឋាភិបាលយ៉ាងច្បាស់ក្រឡែតនៅកម្ពុជា។
ក៏ប៉ុន្តែអ្នកនាំពាក្យក្រសួងមហាផ្ទៃ លោក ខៀវ សុភ័គ បានមានប្រសាសន៍ថា ក្រសួងមហាផ្ទៃមិនមែនបិទអង្គការនោះទេ គឺគ្រាន់តែផ្អាកសកម្មភាពបណ្តោះអាសន្ន ព្រោះកន្លងមកនៅក្នុងលក្ខន្តិកៈរបស់សមាគមធាងត្នោតនោះ ដាក់មកតម្កល់នៅក្រសួងមហាផ្ទៃផ្សេង ប៉ុន្តែនៅពេលអនុវត្តសមាគមនេះបានធ្វើផ្ទុយពីលក្ខន្តិកៈ ហើយជារឿយៗក្រសួងមហាផ្ទៃ ធ្លាប់បានណែនាំឲ្យធ្វើតាមលក្ខន្តិកៈរបស់ខ្លួន ប៉ុន្តែសមាគមនោះនៅតែមានៈមិនព្រមធ្វើតាម។
មន្ត្រីសង្គមស៊ីវិលបានឲ្យដឹងថា សមាគមធាងត្នោតរយៈពេលចុងក្រោយនេះ ធ្លាប់បានចូលរួមជួយគាំទ្រជាមួយអ្នកភូមិបឹងកក់ ហើយថែមទាំងបានជួយគូសវាសប្លង់ ជូនអ្នកភូមិបឹងកក់ សម្រាប់គម្រោងអភិវឌ្ឍន៍នៅនឹងកន្លែងក្នុងតំបន់បឹងកក់ ដែលអ្នកភូមិជាង ១.០០០គ្រួសារ បានតស៊ូតវ៉ាអស់ជាយូរឆ្នាំមកហើយនោះ៕