ទាក់ទងនឹងបញ្ហានេះ អ្នកស្រីវេជ្ជបណ្ឌិត ពុង ឈីវកេក ប្រធានអង្គការលីកាដូ បានសម្ដែងការសោកស្តាយយ៉ាងខ្លាំង ព្រោះហេតុការណ៍នោះកើតឡើងបន្ទាប់ពីប្រមុខរដ្ឋាភិបាលចេញបញ្ជាឲ្យការពារសិទ្ធិពលរដ្ឋ កាលពីខែមុន ។
អ្នកស្រី ពុង ឈីវកេក មានប្រសាសន៍ដូច្នេះថា ៖ «ញុំក្រៀមក្រំ អាណិតអាសូរ ព្រោះអីរឿងដីធ្លីនេះយើងតែងតែឮថា ដកយកដីហើយចោទប្រកាន់ដាក់ក្នុងពន្ធនាគារ នៅក្នុងពន្ធនាគារមានការឈឺថ្កាត់រហូតដល់ស្លាប់អ៊ីចឹង គឺជាការរំលោភលើសិទ្ធិរបស់ជនដែលរងគ្រោះហ្នឹងធ្ងន់ធ្ងរណាស់ ។ តុលាការគួរតែស៊ើបអង្កេតឲ្យបានឆាប់ ហើយបើល្អធ្វើម៉េចកុំឲ្យនគរបាល ដែលបង្រ្កាបរឿងដីធ្លីហ្នឹងកុំឲ្យមានការចាប់ចងទៀត ។ ខ្ញុំមិនយល់រឿងហ្នឹង ព្រោះអីសម្ដេចនាយកបានមានប្រសាសន៍ច្បាស់លាស់ កាលថ្ងៃ ១៥ ខែមីនា ដែលពួកខ្ញុំ ១០អង្គការទៅជួបលោកនោះ លោកមានប្រសាសន៍ថា លោកលែងឲ្យចាប់អ៊ីចឹងហើយ រួចឥឡូវនៅតែឃើញចាប់ពីរឿងដីធ្លីហ្នឹងទៀត ។ រួចយកទៅដល់ដាក់ក្នុងពន្ធនាគារ មិនបានស៊ើបអង្កេតឲ្យបានឆាប់ដើម្បីដោះលែងចេញ ទុកដល់ស្លាប់អ៊ីចឹង ឥឡូវតើអ្នកណាទទួលខុសត្រូវរឿងអស់ហ្នឹង ?» ។
ចំណែកលោក អ៊ូ វីរៈ នាយកប្រតិបត្តិនៃមជ្ឈមណ្ឌលសិទ្ធិមនុស្សកម្ពុជា មើលឃើញថា ប្រព័ន្ធយុត្តិធម៌សព្វថ្ងៃ ពលរដ្ឋគ្មានជំនឿទេ ៖ «ប្រព័ន្ធយុត្តិធម៌ទាំងមូល អត់មានដែលស្វែងរកយុត្តិធម៌សម្រាប់ប្រជាពលរដ្ឋខ្មែរ ហើយក្នុងករណីដែលប្រជាពលរដ្ឋអ្នកក្រីក្រជាអ្នកប្រឈមនូវប្រព័ន្ធយុត្តិធម៌ខ្មែរយើង គឺអាជ្ញាធរអត់យកចិត្តទុកដាក់ ។ ហើយមានរឿងច្រើនណាស់ដែលជនជាប់ចោទ ដែលបានជាប់ឃុំឃាំងហួសពេលកំណត់ គ្មានដំណោះស្រាយយុត្តិធម៌ ចំពោះអ្នកដែលជាប់ចោទទាំងអស់នោះ ។ ហើយក្នុងករណីពន្ធនាគារនេះ វាមានបញ្ហាច្រើន ខ្ញុំដឹងថាអ្នកអត់មានលុយទៅសូកអ្នកយាម ឲ្យនាំរបស់របរ ឬមួយទឹកស្អាតយកទៅឲ្យអ្នកជាប់ចោទនោះ អ្នកនៅពន្ធនគារខ្លះផឹកទឹកអូរ ផឹកទឹកស្អុយ ទឹកកខ្វក់ ជាប្រភពនៃមូស ប្រភពនៃការចម្លងមេរោគ ។ ដូច្នេះក្នុងករណីទាំងអស់នេះ អត់មានយុត្តិធម៌ទាល់តែសោះ ពិសេសចំពោះជនជាប់ចោទមិនទាន់បានកាត់ក្ដីនៅឡើយ ។ ខ្ញុំឃើញថាបញ្ហាទាំងអស់នេះ ជាបញ្ហាតុលាការ ប៉ុន្តែក៏ជាតុលាការរបស់ប៉ូលិស និងមន្ត្រីពន្ធនាគារ ហើយខ្ញុំថាចុងបញ្ចប់គឺរដ្ឋាភិបាលទាំងមូលជាអ្នកទទួលខុសត្រូវ» ។
វិទ្យុអាស៊ីសេរី ពុំអាចទាក់ទងលោកឧត្តមសេនីយ៍ ហេង ហាក់ មេគុកព្រៃស ដើម្បីសុំសេចក្តីបញ្ជាក់ពីលោក ចំពោះករណីឃុំឃាំងយុវជន យ៉ាន់ សុគា ដែលមានជំងឺរលាកស្រោមខួរដ៏ធ្ងន់ធ្ងរ រហូតដល់បាត់បង់ជីវិតដោយសារមិនបានបញ្ជូនទៅកាន់មន្ទីរពេទ្យទាន់ពេលវេលានេះ បានឡើយ ៕