លោក ស៊ិន សុគន្ធា ជាមគ្គុទ្ទេសក៍ទេសចរណ៍ភាសាអង់គ្លេសមួយរូបដែលកំពុងនាំភ្ញៀវដើរទស្សនាអង្គរវត្តកាលពីព្រឹកថ្ងៃសៅរ៍ ទី២៣ ខែឧសភា បានមានប្រតិកម្មខ្លាំងៗថា លោកមិនយល់ព្រមទេចំពោះការដាក់ភ្លើងអគ្គិសនីនៅក្នុងប្រាសាទដែលធ្វើឲ្យខូចខាតដល់ថ្មប្រាសាទដ៏មានតម្លៃ ហើយក្នុងនាមលោកជាកូនខ្មែរមួយរូបគឺសូមជំទាស់នឹងទង្វើបែបនោះ។
លោក ស៊ិន សុគន្ធា បានឲ្យដឹងថា ៖ «ថ្មប្រាសាទរបស់ខ្មែរដែលមានអាយុរាប់កាលឆ្នាំមកហើយ ចេះមកដាប់អ៊ីចឹងវាអត់ត្រូវទេ។ លោកឃើញទេ នេះអាជ្ញាធរអប្សរាបានរៀបចំធ្វើមិនឲ្យប្រជាជនប៉ះ ព្រោះយល់ថាធ្វើឲ្យខូចថ្ម»។
ស្ត្រីអ្នកទេសចរណ៍ដែលនិយាយភាសាអង់គ្លេសមួយរូបបានសម្ដែងការភ្ញាក់ផ្អើលនៅពេលដែលឃើញជញ្ជាំងប្រាសាទត្រូវបានគេដាក់ភ្លើងអគ្គិសនីនិងមានកំណាត់ឈើខ្លីៗត្រូវបានគេដាក់បញ្ចូលទៅក្នុងរន្ធថ្មដែលមានប្រហោងដាប់ ដោយគាត់មានប្រសាសន៍ថា វាគឺអាក្រក់ណាស់ដែលប្រាសាទបូរាណចំណាស់រាប់រយឆ្នាំជាបេតិកភណ្ឌពិភពលោកត្រូវបានគេធ្វើដូច្នេះ។
ស្ត្រីដដែលបានបញ្ជាក់ថា ៖ "វាគឺអាក្រក់ណាស់ដែលមានការធ្វើបែបនេះមកលើបេតិកភណ្ឌពិភពលោកដែលគួរតែមានការការពារនិងថែរក្សាដ៏ត្រឹមត្រូវពីអង្គការយូណេស្កូ"។
ក៏ប៉ុន្តែមន្ត្រីអាជ្ញាធរអប្សរាទទួលបន្ទុកការពារប្រាសាទបូរាណនៅតំបន់អង្គរបានបដិសេធថា ការដាក់ភ្លើងបំភ្លឺពេលយប់នៅថែវអង្គរវត្តនោះ វាមិនបានធ្វើឲ្យខូចខាតដល់ប្រាសាទបូរាណទេ ហើយក៏គ្មានការដាប់ថ្មប្រាសាទដើម្បីដាក់អំពូលនិងខ្សែភ្លើងអគ្គិសនីដែរ។
លោក ប៊ុន ណារិទ្ធិ អគ្គនាយកអាជ្ញាធរអប្សរា បានមានប្រសាសន៍ថា អាជ្ញាធរអប្សរាមានគម្រោងសាកល្បងដាក់ភ្លើងអគ្គិសនីបំភ្លឺប្រាសាទនៅពេលយប់នាជ្រុងតូចមួយប៉ុណ្ណោះ ហើយមិនបានដាប់ថ្មីប្រាសាទដើម្បីចាប់អំពូលភ្លើងទេ ដោយក្រុមហ៊ុនស៊ូជីងជាអ្នកទទួលធ្វើបានយកឈើទៅដាក់ក្នុងរន្ធថ្មដែលមានស្រាប់ដោយមានអ្នកជំនាញរបស់អង្គការយូណេស្កូណែនាំផង។
លោក ប៊ុន ណារិទ្ធិ បានមានប្រសាសន៍ថា ៖ «អត់មានចោះអីទេ។ អ្នកធ្វើហ្នឹងគឺក្រុមហ៊ុនស៊ូជីង តែគេធ្វើក្រោមការដឹកនាំរបស់អាជ្ញាធរអប្សរាហើយដែលមានអ្នកបច្ចេកទេសណែនាំដោយអង្គការយូណេស្កូមកធ្វើ»។
ទោះយ៉ាងណាបុគ្គលិកគម្រោងរបស់អាល្លឺម៉ង់ដែលទទួលបន្ទុកអភិរក្សចម្លាក់ទេពអប្សរនៅថែវប្រាសាទនោះបានឡើងពិនិត្យហើយអះអាងថា ការដាក់អំពូលភ្លើងនោះបានធ្វើឲ្យបែកបំណែកជញ្ជាំងថ្មប្រាសាទបូរាណខ្លះនៅពេលដែលគេញាត់កំណាត់ឈើរឹងបញ្ចូលទៅក្នុងប្រហោងថ្ម។
សូមបញ្ជាក់ថា ក្រុមមគ្គុទេ្ទសក៍អង្គរអ្នកទេសចរណ៍បរទេសនិងប្រជាពលរដ្ឋខ្មែរមួយចំនួនបានសម្ដែងប្រតិកម្មមិនសប្បាយចិត្តជាងមួយឆ្នាំមកហើយចាប់តាំងពីមានការអនុញ្ញាតឲ្យដាក់អំពូលភ្លើងហ្វាកម្លាំងរាប់រយវ៉ាត់បាញ់ចំកំពូលប្រាសាទអង្គរវត្តបំភ្លឺនាពេលយប់ ហើយមានការលក់សំបុត្រតាមរបៀបរាត្រីសមោសរផងនោះ៕