ការលើកឡើងនេះ នៅបន្ទាប់ពីក្រសួងមហាផ្ទៃ បានចេញលិខិតជូនដំណឹងជាផ្លូវការថា ក្រសួងមហាផ្ទៃ មិនអាចទទួលយកសំណើរបស់គណបក្សប្រឆាំង ចំពោះការសុំឲ្យផ្លាស់ប្ដូរសមាសភាព គ.ជ.ប នោះបានទេ ដោយសារតែសំណើនេះ អាចធ្វើឲ្យប៉ះពាល់ដល់ស្ថិរភាពនយោបាយនៅកម្ពុជា។
ប្រធានគណបក្ស សម រង្ស៊ី ស្ដីទី និងប្រធានគណបក្ស សិទ្ធិមនុស្ស បានដាក់លិខិតទៅក្រសួងមហាផ្ទៃជាថ្មីទៀត ស្នើសុំជួបលោកឧបនាយករដ្ឋមន្ត្រី ស ខេង ឬតំណាងរបស់លោក ដើម្បីពិភាក្សាស្ដីពីការផ្លាស់ប្ដូរសមាសភាពគណៈកម្មាធិការជាតិរៀបចំបោះឆ្នោត។
ប្រធានគណបក្ស សិទ្ធិមនុស្ស លោក កឹម សុខា និងជាអនុប្រធានចលនាសម្ព័ន្ធប្រជាធិបតេយ្យសង្គ្រោះជាតិ បានឲ្យដឹងថា នៅថ្ងៃទី១៣ កញ្ញា លោកបានធ្វើលិខិតរួមគ្នាជាមួយលោក គង់ គាំ ប្រធានគណបក្ស សម រង្ស៊ី ស្ដីទី ទៅក្រសួងមហាផ្ទៃ ក្នុងគោលបំណងពិគ្រោះយោបល់ ពិភាក្សារកការឯកភាពជាតិ ដើម្បីធ្វើឲ្យការបោះឆ្នោតប្រព្រឹត្តិទៅដោយសេរី ត្រឹមត្រូវ និងយុត្តិធម៌។ លោក កឹម សុខា អះអាងថា ការជួបគ្នាផ្ទាល់ប្រសើរជាងការឆ្លើយឆ្លងគ្នាតាមលិខិត។
មន្ត្រីនាំពាក្យក្រសួងមហាផ្ទៃ លោក ខៀវ សុភ័គ មានប្រសាសន៍ថា ក្រសួងមហាផ្ទៃបានទទួលលិខិតស្នើសុំរបស់គណបក្សទាំងពីរហើយ នៅថ្ងៃទី១៣ កញ្ញា នេះ។ លោក ខៀវ សុភ័គ បញ្ជាក់ថា ក្រសួងកំពុងរៀបចំបែបបទដាក់ទៅរដ្ឋមន្ត្រីក្រសួងមហាផ្ទៃស្ដីទី ដើម្បីសម្រេចចំពោះការស្នើសុំនោះ។
ការដាក់លិខិតទៅក្រសួងមហាផ្ទៃ ដើម្បីស្នើសុំជួបរដ្ឋមន្ត្រីក្រសួងមហាផ្ទៃ ឬអ្នកតំណាងនោះ នៅបន្ទាប់ពីលោកឧបនាយករដ្ឋមន្ត្រី ស ខេង និងជារដ្ឋមន្ត្រីក្រសួងមហាផ្ទៃ បានចេញលិខិតបដិសេធមកគណបក្សប្រឆាំងវិញ កាលពីថ្ងៃទី៧ កញ្ញា ចំពោះលិខិតស្នើសុំរបស់គណបក្ស សម រង្ស៊ី និងគណបក្ស សិទ្ធិមនុស្ស ដែលដាក់ទៅក្រសួងមហាផ្ទៃ កាលពីថ្ងៃទី៣០ សីហា ស្នើឲ្យផ្លាស់ប្ដូរសមាសភាព គ.ជ.ប។
លិខិតរបស់លោកឧបនាយករដ្ឋមន្ត្រី ស ខេង ចុះថ្ងៃទី៧ កញ្ញា បានឆ្លើយតបថា ការស្នើសុំផ្លាស់ប្ដូរសមាសភាព គ.ជ.ប ថ្នាក់ជាតិ និងថ្នាក់ខេត្តនោះ នឹងនាំឲ្យមានភាពជាប់គាំងក្នុងការបង្កើត គ.ជ.ប ដែលភាពជាប់គាំងនេះ នឹងមិនអាចធានាឲ្យការបោះឆ្នោតប្រព្រឹត្តិទៅបានឡើយ។ ម្យ៉ាងទៀត នឹងធ្វើឲ្យប៉ះពាល់ដល់ស្ថិរភាពនយោបាយ សង្គម និងការអភិវឌ្ឍប្រទេសជាតិ។
ប្រធានគណៈកម្មាធិការអព្យាក្រឹត្យ និងយុត្តិធម៌ ដើម្បីការបោះឆ្នោតដោយសេរីនៅកម្ពុជា លោកបណ្ឌិត ហង្ស ពុទ្ធា បានលើកឡើងថា ការស្នើសុំផ្លាស់ប្ដូរសមាសភាព គ.ជ.ប នេះ ជាការប្រជែងគ្នាមួយឆ្ពោះទៅរកការបោះឆ្នោត រវាងគណបក្សជំទាស់ និងគណបក្សកាន់អំណាច។
លោក ហង្ស ពុទ្ធា បានបន្តថា ករណីនេះ ត្រូវតែមានគណៈកម្មការឯករាជ្យដាច់ដោយឡែកមួយ ដើម្បីធ្វើការវាយតម្លៃទៅលើការងាររបស់ស្ថាប័ន គ.ជ.ប ពីព្រោះថា តាមរដ្ឋធម្មនុញ្ញ គ.ជ.ប ត្រូវអនុវត្តការងារប្រកបដោយសេរី និងយុត្តិធម៌ ប៉ុន្តែការអនុវត្តការងារកន្លងមក គ.ជ.ប មិនទាន់អនុវត្តការងារឯករាជ្យ និងល្អនៅឡើយ។
ទោះបីជាយ៉ាងណាក៏ដោយ លោក កឹម សុខា បានអះអាងថា លោកនឹងទាមទារទាល់តែមានការយល់ព្រមផ្លាស់ប្ដូរសមាសភាព គ.ជ.ប ពីព្រោះថា ការបោះឆ្នោតកន្លងមក មានភាពមិនប្រក្រតីជាច្រើន ចំពោះការរៀបចំការបោះឆ្នោត។ បើសិនជាក្រសួងមហាផ្ទៃ ឬរដ្ឋាភិបាល មិនព្រមផ្លាស់ប្ដូរសមាសភាព គ.ជ.ប ទេ គណបក្សប្រឆាំងរបស់លោកនឹងពិចារណាចំពោះការចូលរួមបោះឆ្នោត នៅអាណត្តិទី៥ ឆ្នាំ២០១៣ ខាងមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។