ការបង្ហាញនេះ បានធ្វើឡើងក្នុងកិច្ចប្រជុំមួយនៅឯក្រសួងកសិកម្ម ផ្ដោតលើលទ្ធផលបូកសរុបបញ្ចប់បណ្ដោះអាសន្ននៃការងារបង្កបង្កើនផលឆ្នាំ២០១២ និងឆ្នាំ២០១៣។ កិច្ចប្រជុំនេះ បានចូលរួមដោយប្រធានមន្ទីរកសិកម្មមកពី ២៤ខេត្ត-ក្រុង។
រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក ច័ន្ទ សារុន នៅថ្ងៃទី១៦ ខែមករា បានអះអាងថា កម្ពុជា នៅសល់ស្រូវចំនួនជាង ៤លាន ៧សែនតោន សម្រាប់ឆ្នាំ២០១២ ស្មើនឹងអង្ករចំនួនជាង ៣លានតោន។
លោកថា ចំនួនកើនឡើងនូវទិន្នផលស្រូវបែបនេះ គឺដោយសារតែកម្ពុជា បានពង្រីកផ្ទៃដីដាំដុះនៅឆ្នាំ២០១២ នៅគ្រាដែលទឹកជំនន់ទឹកភ្លៀង និងគ្រោះរាំងស្ងួត បានប៉ះពាល់ដល់ដំណាំស្រូវនៅខេត្តចំនួន១៤ កន្លងមកនេះ ប៉ុន្តែការស្ដារកសិកម្ម បានធ្វើឡើងទាន់ពេលវេលា។
លោក ច័ន្ទ សារុន បានមានប្រសាសន៍ថា អង្ករក្រអូបរបស់កម្ពុជា មាន សែនពិដោរ ផ្ការំដួល និងផ្ការមៀត ជាដើម កំពុងតែពេញនិយមនៅទីផ្សារសហរដ្ឋអាមេរិក និងសហភាពអឺរ៉ុប កន្លងមកនេះ៖ «សុំឲ្យយកចិត្តទុកដាក់លើបញ្ហាស្រូវក្រអូបនេះទាំងអស់គ្នា។ យើងចេញពីសេដ្ឋកិច្ចឆ្នាំងបាយសម្រាប់លក្ខណៈគ្រួសារ ទៅកាន់សេដ្ឋកិច្ចទីផ្សារ។ អីចឹងត្រូវគិតគូរពីរឿងនេះឲ្យបានមែនទែន។ អស់លោកប្រធានមន្ទីរកសិកម្ម អស់លោកប្រធាននាយកដ្ឋានដំណាំស្រូវ អគ្គនាយកដ្ឋានកសិកម្មត្រូវយកចិត្តទុកដាក់ពីបញ្ហានេះឲ្យមែនទែន»។
ប្រធាននាយកដ្ឋានផែនការ និងស្ថិតិ នៃក្រសួងកសិកម្ម រុក្ខាប្រមាញ់ និងនេសាទ លោក ហុង ណារឹត បានមានប្រសាសន៍ថា មន្ត្រីជំនាញកសិកម្មកន្លងមកបានអប់រំកសិករឲ្យចេះបត់បែនទៅតាមស្ថានការណ៍នៅមូលដ្ឋាននៅពេលរដូវខ្វះទឹក គឺងាកមកដាំបន្លែរួមផ្សំវិញ៖ «ហើយពិនិត្យឡើងវិញ និងត្រៀមបម្រុងនូវមធ្យោបាយ និងសម្ភារៈសម្រាប់គាំទ្រ និងអន្តរាគមន៍ជាយថាហេតុនៅរដូវប្រាំងយើងនេះ ហើយផុតរដូវប្រាំងឈានដល់ដើមរដូវវស្សានៅឆ្នាំក្រោយ សម្ភារៈមានម៉ាស៊ីនបូមបាចជាដើម ពូជស្រូវ ពូជបន្លែ»។
កន្លងមក ក្រសួងកសិកម្ម រុក្ខាប្រមាញ់ និងនេសាទ បានជំរុញឲ្យកសិករដាំដុះស្រូវពូជល្អចំនួន ១០ប្រភេទ ដែលមានគុណភាពខ្ពស់ និងផ្តល់ផលច្រើនសម្រាប់ការនាំចេញទៅទីផ្សារអន្តរជាតិ មានដូចជា សែនពិដោរ ជលសារ អ៊ីអែរ៦៦ ផ្ការំដួល ផ្ការំដេង ផ្ការមៀត ផ្កាច័ន្ទសែនស រាំងជ័យ ខា៤ និងខា៦។
ជាមួយគ្នានេះ មជ្ឈមណ្ឌលសិក្សា និងអភិវឌ្ឍន៍កសិកម្មកម្ពុជា ដឹកនាំដោយលោក យ៉ង សាំងកុមារ កំពុងតែជំរុញឲ្យកសិករបង្កើតសហគមន៍ម៉ាស៊ីនកិនស្រូវសរីរាង្គឲ្យបានចំនួនរវាង ៥០គ្រឿង ទៅ ១០០គ្រឿង ក្នុងរយៈពេល ១០ឆ្នាំ ចាប់ពីឆ្នាំ២០១២ ដល់ឆ្នាំ២០២២ នៅក្នុងស្រុកចំនួន៦០ ក្នុងខេត្តចំនួន១៣។
សហគមន៍ម៉ាស៊ីនកិនស្រូវសរីរាង្គនោះ គឺមានគោលដៅនាំចេញអង្ករសរីរាង្គដែលមានគុណភាពខ្ពស់ និងគ្មានជាតិគីមី ទៅទីផ្សារនៅសហរដ្ឋអាមេរិក និងសហភាពអឺរ៉ុប ជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។