ប្រធានមជ្ឈមណ្ឌលសិក្សានិងអភិវឌ្ឍន៍កសិកម្មកម្ពុជា (CEDAC) បណ្ឌិត យ៉ងសាំង កុមារ មានប្រសាសន៍ប្រាប់វិទ្យុអាស៊ីសេរីនៅរសៀលថ្ងៃ១០ វិច្ឆិកាថា ឆ្នាំនេះ ទោះបីជាក្នុងទូទាំងប្រទេសកម្ពុជាគ្រោះធម្មជាតិពុំកើតមានក៏ដោយ ក៏ទិន្នផលស្រូវមានការកើនឡើងបន្តិចបន្តួចប៉ុណ្ណោះ បើប្រៀបធៀបនឹងកាលពីឆ្នាំកន្លងទៅ។
បណ្ឌិត យ៉ងសាំង កុមារ មានប្រសាសន៍ដូច្នេះថា ៖ «ស្រូវជាទូទៅ ឆ្នាំនេះ ហើយឆ្នាំកន្លងមក មិនសូវជាខុសគ្នាទេ ប្រហាក់ប្រហែលគ្នា»។
បណ្ឌិត យ៉ងសាំង កុមារ មានប្រសាសន៍ផងដែរថា តាមការសិក្សាស្រាវជ្រាវបង្ហាញថា កម្ពុជាអាចក្លាយជាប្រទេសមួយ ដែលមានសក្តានុពលក្នុងការផលិតស្រូវប្រចាំតំបន់ ប្រសិនបើរាជរដ្ឋាភិបាលមានគោលនយោបាយបង្រៀនកសិករឲ្យចេះជ្រើសរើសពូជស្រូវនិងរៀបចំប្រព័ន្ធធារាសាស្ត្រឲ្យបានប្រសើរជាងបច្ចុប្បន្ន។
លោកបណ្ឌិត យ៉ងសាំង កុមារ មានប្រសាសន៍បន្ថែមដូច្នេះថា ៖ «បើសិនជាយើងធ្វើដូចបច្ចុប្បន្ន ជាពិសេសការវិនិយោគជាសាធារណៈលើវិស័យកសិកម្មនៅមានកម្រិតដូចបច្ចុប្បន្នហ្នឹងយើងទៅអត់រួចទេ មានន័យថា យើងត្រូវធ្វើម៉េចបង្កើនការងារផ្សព្វផ្សាយដល់កសិករឲ្យបានទូលំទូលាយទូទាំងប្រទេស បង្កការងារឲ្យគាត់ចេះផលិត ចេះជ្រើសរើសទុកដាក់ពូជដើម្បីបានពូជស្រូវល្អៗសម្រាប់ធ្វើ ព្រោះពូជជាកត្តាមួយដើម្បីបង្កើនទិន្នផល ហើយជាពិសេសទៀត ធ្វើម៉េចយើងគាំទ្រក្នុងការរៀបចំឲ្យមានដំណើរការឲ្យបានល្អនូវប្រព័ន្ធធារាសាស្រ្ដនៅតាមតំបន់ដែលមានសក្ដានុពលមួយចំនួនហ្នឹង»។
អនុប្រធានគណៈកម្មាធិការជាតិគ្រប់គ្រងគ្រោះមហន្តរាយ លោក ញឹម វណ្ណដា មានប្រសាសន៍ថា ថ្វីត្បិតតែនៅពាក់កណ្តាលរដូវនាឆ្នាំនេះ តំបន់មួយចំនួនប្រទះគ្រោះរាំងស្ងួត តែដោយមានការជួយជ្រោមជ្រែងកែច្នៃពីក្រសួងកសិកម្មដោយនៅចុងរដូវមានអំណោយផលពីប្រព័ន្ធសម្ពាធទាប ដែលគ្របដណ្តប់មកលើតំបន់ភាគខាងត្បូងនៃប្រទេសកម្ពុជា បណ្តាលឲ្យមានភ្លៀងធ្លាក់មកជាប់គ្នាផងនោះ ធ្វើឲ្យទិន្នផលស្រូវឆ្នាំនេះទទួលផលបានលើសផែនការ។
លោក ញឹម វណ្ណដា មានប្រសាសន៍ថា ៖ «ផែនការបង្កបង្កើនផលស្រូវឆ្នាំនេះ គឺបានលើសផែនការ ហើយទិន្នផលក៏បានច្រើន ប៉ុន្តែលើកលែងតែវាចុះតម្លៃបន្តិច។ រីឯដំណាំរួមផ្សំ យើងឃើញថា ប្រជាជនសម្រេចបានលទ្ធផលល្អ»។
របាយការណ៍ថ្មីៗបានឲ្យដឹងថា យ៉ាងហោចណាស់ក៏មានតំបន់ខ្លះនៃខេត្តចំនួន៣ គឺកំពង់ចាម បន្ទាយមានជ័យ និងព្រះវិហារ រងទឹកជំនន់បណ្តាលមកពីទឹកភ្លៀងបង្កឲ្យខូចខាតផលដំណាំរបស់ប្រជាពលរដ្ឋយ៉ាងធ្ងន់ធ្ងរផងដែរ។
ទោះបីជាយ៉ាងនេះក្តី លោក ញឹម វណ្ណដា មានប្រសាសន៍ថា ប្រទេសកម្ពុជានឹងទទួលបានទិន្នផលស្រូវ ៧លានតោន បើគិតរហូតដល់ចុងឆ្នាំ២០០៨។ តួលេខនេះបង្ហាញថា ទិន្នផលស្រូវកើនឡើងបើធៀបទៅនឹងឆ្នាំ២០០៧ដែលទទួលបាន ៦,៧លានតោននោះ៕