សកម្មជនសិទ្ធិមនុស្សចូលទៅបំភ្លឺតុលាការខេត្តតាកែវតាមការកោះហៅ
ដោយ ហ្សាការីយ៉ា
2009-06-08
សម្មជនសិទ្ធិមនុស្សម្នាក់នៃមជ្ឈមណ្ឌលសិទ្ធិមនុស្សកម្ពុជាប្រចាំនៅខេត្តតាកែវ បានចូលខ្លួនទៅបំភ្លឺនៅតុលាការខេត្ត តាមការកោះហៅរបស់ព្រះរាជអាជ្ញារងលោក សាយ ណារ៉ា ហើយ នៅព្រឹកថ្ងៃទី៨ មិថុនានេះ នៅក្នុងបណ្តឹងមួយដែលគេចោទថា បានផ្សព្វផ្សាយនូវព័ត៌មានមិនពិត នៅក្នុងជម្លោះមេដឹកនាំខ្មែរអ៊ិស្លាម ក្នុងឆ្នាំ២០០៨។
លោក ជាប ជៀវ មានប្រសាសន៍ឲ្យដឹងថា លោកបានឆ្លើយជូនលោកព្រះរាជអាជ្ញានូវអ្វីដែលលោកបានទទួលព័ត៌មានបានអំពីជម្លោះមេដឹកនាំសាសនាអ៊ិស្លាម ហៅថា ហាកឹម នៅក្នុងភូមិកំពង់យោល ស្រុកបុរីជលសា ខេត្តតាកែវ ដែលបានអូសបន្លាយជិតមួយឆ្នាំកន្លងមករង់ចាំខាងគណៈដឹកនាំជាន់ខ្ពស់នៃសាសនាអ៊ិស្លាមកម្ពុជាចុះទៅដោះសា្រយនោះ។
លោក ជាប ជៀវ បានបញ្ជាក់ថា លោកមិនបានផ្តល់ព័ត៌មានដល់វិទ្យុអាស៊ីសេរីខុសពីការពិតនោះទេ ៖ «ខ្ញុំឆ្លើយការពិត បែបបទទាំងឡាយណានេះ ខ្ញុំធ្វើតាមហេតុផល ខ្ញុំមានឯកសាររបស់ខ្ញុំ»។
ការកោះហៅមន្ត្រីសិទ្ធិមនុស្សនៅថ្ងៃនេះ ធ្វើឡើងដោយមានការឃ្លាំមើលពីអ្នកភូមិប្រមាណ ២០នាក់ ចូលរួមផងដែរ។
ប្រជាពលរដ្ឋឈ្មោះ យូ សុះ មានប្រសាសន៍ថា ប្រជាពលរដ្ឋពួកលោកមកកាន់តុលាការខេត្តតាកែវ នាព្រឹកថ្ងៃទី៨ មិថុនានេះ ដើម្បីបង្ហាញប្រាប់តុលាការឲ្យដឹងថា អ្វីដែលលោក ជាប ជៀវ ក៏ដូចជាប្រជាពលរដ្ឋមួយចំនួនផ្សេងទៀតបានផ្សព្វផ្សាយព័ត៌មានតាមវិទ្យុអាស៊ីសេរីជារឿងពិត មិនមែនជាការបរិហារកេរ្តិ៍បុគ្គលណាម្នាក់នោះទេ។
លោក យូ សុះ ថ្លែងដូច្នេះថា ៖ «វិទ្យុអាស៊ីសេរីផ្សាយហ្នឹងគឺព័ត៌មានពិត ដែលប្រជាពលរដ្ឋអ្នកផ្ដល់ឲ្យ។ ប្រជាពលរដ្ឋគ្មានចង់បានអីទេ គឺចង់បានសុំការបោះឆ្នោតប៉ុណ្ណឹង»។
ការផ្សព្វផ្សាយតាមវិទ្យុអាស៊ីសេរី កន្លងមក បាននិយាយថា តំណាងប្រជាពលរដ្ឋ គឺលោក នី សាន់ និងលោក ស៊ុប សេន បានចោទអ្នកដឹកនាំសាសនាអ៊ិស្លាម គឺ ហាកឹម រីម ម៉ាត់ ថា មានពាក់ព័ន្ធនឹងអំពើពុករលួយថវិការួម និងដឹកនាំមិនល្អ រីឯលោកហាកឹម រីម ម៉ាត់ ច្រានចោលព័ត៌មានទាំងនោះ ហើយបានធ្វើការប្ដឹងបកទៅ លោក នី សាន់ និង ស៊ុប សេន។
ជាមួយគ្នានេះ មន្រ្តីស៊ើបអង្កេតរបស់មជ្ឈមណ្ឌលសិទ្ធិមនុស្សកម្ពុជា ក៏ដូចជាមន្រ្តីស៊ើបអង្កេតនៃសមាគមសិទ្ធិមនុស្ស អាដហុក បានហៅការកោះហៅសកម្មជនសិទ្ធិមនុស្សសាកសួរដូច្នេះ ថាជាការគំរាមកំហែងក្នុងការបញ្ចេញមតិ។
លោក ចាន់ សូវ៉េត មានប្រសាសន៍ដូច្នេះ ៖ «សកម្មជនសិទ្ធិមនុស្ស បើនិយាយជារួមទៅគឺយើងមិនបានគិតពីផលប្រយោជន៍ កម្រៃ ឬក៏អំណាចទេ គឺយើងធ្វើកិច្ចការងារដើម្បីចូលរួមជាដៃគូអភិវឌ្ឍន៍ជាមួយរាជរដ្ឋាភិបាល ក្នុងន័យស្ថាបនា ចូលរួមជួយជាអ្នកនាំពាក្យសម្រាប់ប្រជាពលរដ្ឋអ្នករងគ្រោះដែលទទួលរងការរំលោភសិទ្ធិ»។
ព្រះរាជអាជ្ញាតុលាការខេត្តតាកែវ លោក សាយ ណារ៉ា មិនធ្វើអត្ថាធិប្បាយលើករណីជម្លោះនោះឡើយ។ ជាមួយគ្នានេះ លោកបានបង្ហើបថា ថ្ងៃទី២៣ មិថុនា ខាងមុខ អ្នកយកព័ត៌មានវិទ្យុអាស៊ីសេរីពីររូបនិងសកម្មជនសិទ្ធិមនុស្សមួយរូបផ្សេងទៀត នឹងត្រូវតុលាការខេត្តតាកែវ កោះហៅសាកសួរពីបទផ្សាយព័ត៌មានមិនពិត។
សូមជម្រាបថា មួយរយៈចុងក្រោយនេះ បណ្ដឹងស្តីពីបទបរិហារកេរ្តិ៍និងការផ្សាយព័ត៌មានមិនពិត កំពុងផ្តោតមកលើក្រុមអ្នកសារព័ត៌មាន អ្នកតំណាងរាស្រ្តគណបក្សប្រឆាំង និងមន្រ្តីអង្គការសង្គមស៊ីវិលយ៉ាងច្រើនផុសផុល។
ប្រភពពីក្រុមសិទ្ធិមនុស្ស បានអះអាងថា ការប្តឹងផ្តល់ពីបទនេះ មានចំនួន ១០ករណីហើយ។ ប្រភពដដែលបានរិះគន់ថា នេះជាសញ្ញាវិលទៅរកភាពថយក្រោយនៃសេរីភាពក្នុងការបញ្ចេញមតិ៕
អត្ថបទដែលទាក់ទង
ទីភ្នាក់ងារព័ត៌មានកម្ពុជានិងវៀតណាមបង្កើនកិច្ចសហប្រតិបត្តិការ
អ្នកកាសែតជាប់ឃុំម្នាក់បន្តប្ដឹងឧទ្ធរណ៍ក្នុងរឿងក្ដីជាមួយសយសុភាព
មន្រ្តីជាន់ខ្ពស់ខ្មែរខ្វែងគំនិតគ្នាក្នុងការលើកលែងទោស ហង្ស ចក្រា
ព្រះមហាក្សត្រស្នើសុំឲ្យពិនិត្យមើលលទ្ធភាពក្នុងការដោះលែង ហង្ស ចក្រា
អតីតអ្នកកាសែតម្នាក់ត្រូវផ្តន្ទាទោសឲ្យជាប់គុក២ឆ្នាំពីបទផ្សាយព័ត៌មានមិនពិត
កាសែតសេរីភាពថ្មីផ្អាកការបោះពុម្ពផ្សាយព្រោះបញ្ហាថវិកា
សង្គមស៊ីវិលអំពាវនាវឲ្យអ្នកកាសែតប្រុងប្រយ័ត្នក្នុងការសរសេរព័ត៌មាន
អ្នកកាសែតម្នាក់ត្រូវឃាត់ខ្លួនពីបទផ្សាយព័ត៌មានមិនពិត
ក្រុមអ្នកកាសែតជួបពិភាក្សាអំពីក្រមសីលធម៌អ្នកសារព័ត៌មាន
មតិ
អ្នកអាចបញ្ចេញមតិដោយបំពេញទម្រង់ខាងក្រោមនេះក្នុងទម្រង់ជាអក្សរសុទ្ធ។. មតិត្រូវតែអនុញ្ញាតដោយអ្នកសម្របសម្រួលនិងមិនបង្ហាញភ្លាមៗនៅលើទំព័រនេះទេ។ សូមអញ្ជើញត្រឡប់មកបើកទំព័រនេះម្ដងទៀតដើម្បីមើលថាតើមតិរបស់អ្នកត្រូវបានចុះផ្សាយឬអត់។
មើលមតិទាំងអស់.