លោក ឆាំង យុ នាយកមជ្ឈមណ្ឌលឯកសារកម្ពុជាបានថ្លែងនៅថ្ងៃចន្ទនេះថា ការរំលោភសិទ្ធិមនុស្សធ្ងន់ធ្ងរនៅក្នុងសតវត្សរ៍ទី២០ និងដើមសតវត្សរ៍ទី២១នេះ គឺបានបណ្តាលឲ្យស្លាប់រង្គាលមនុស្សជាង១០០លាននាក់ ដែលក្នុងនោះគឺមានមនុស្សនៅកម្ពុជា ប្រមាណ២លាននាក់បានស្លាប់រវាងឆ្នាំ១៩៧៥ រហូតដល់ឆ្នាំ១៩៧៩ ក្នុងរបបខ្មែរក្រហម។
លោក ឆាំង យុ មានប្រសាសន៍ថា ៖ «ខ្ញុំថា ដោយសារការខ្វះការទទួលខុសត្រូវ នៅក្នុងសង្គមយើង រវាងជាបុគ្គល ជាស្ថាប័ន ជារដ្ឋ និងជាសហគមន៍អន្តរជាតិ ដោយសារថា យើងគិតហើយថា អំពើប្រល័យពូជសាសន៍នេះ វាជាការទទួលខុសត្រូវរបស់ប្រទេសមួយរបស់សង្គមមួយ មិនមែនជារឿងរបស់មនុស្សជាតិទូទៅ អាហ្នឹងមួយដែរ។ ហើយយើងគិតថា ការសម្លាប់មនុស្សម្នាក់ ២នាក់ ឬក៏ក្រុមមួយហ្នឹង វាជាករណីឧក្រិដ្ឋកម្មដែលកើតឡើងទូទៅ ក្នុងប្រទេសទូទាំងសកលលោក។ ប៉ុន្តែបើសិនជាយើងសម្លឹងមើលថា បើសិនជាធ្វើឡើងដោយសាររដ្ឋដោយចេតនា ទោះបីជាជនជាតិភាគតិចតែម្នាក់ក៏វាអាចឈានទៅដល់អំពើប្រល័យពូជសាសន៍ ដែលមានទ្រង់ទ្រាយធំដែរ»។
លោក ឆាំង យុ បានថ្លែងបន្តថា ការចងក្រងឯកសារស្តីពីការស្លាប់មនុស្សនៅកម្ពុជា រួមទាំងនៅទូទាំងសកលលោកនោះផង គឺជាវិធីមួយដែលអាចជួយឲ្យមានកិច្ចប្រឹងប្រែងរួម ដើម្បីការពារអាយុជីវិតមនុស្សនិងផ្តល់យុត្តិធម៌ដល់ជនរងគ្រោះ។
លោក ឆាំង យុ មានប្រសាសន៍បន្ថែមដូច្នេះថា ៖ «ហើយការចងក្រងឯកសារ វាជួយធ្វើឲ្យយើងមានការប្រាស្រ័យទាក់ទងគ្នា ការចែករំលែកការដកពិសោធន៍ ក៏ដូចជាវិធីសាស្រ្ដ ហើយក៏ដូចជាការការពារដែរ។ ហើយឯកសារជាទូទៅ ប្រទេសក្រោយជម្លោះ យើងបាត់បង់ការទុកចិត្ត ជំនឿនៅក្នុងរដ្ឋាភិបាល ក៏ដូចជាការទទួលខុសត្រូវ ហើយឯកសារវាជួយស្ដារឡើងវិញ នូវការជឿជាក់ ការទុកចិត្ត ព្រោះវាជាឯកសារមិនអាចផ្លាស់ប្ដូរទៅតាមមនុស្សនិយាយ អ៊ីចឹងវាជារឿងសំខាន់។ ហើយការប្រមូលឯកសារ វាតម្រូវឲ្យមានវិធីសាស្រ្ដទៀត តែអ៊ីចឹងវាធ្វើឲ្យខូចតម្លៃនៃព័ត៌មានសម្រាប់ប្រើប្រាស់ដើម្បីរកយុត្តិធម៌ដែរ»។
សូមជម្រាបថា កិច្ចពិភាក្សារបស់មន្ត្រីសិទ្ធិមនុស្សដែលរៀបចំដោយមជ្ឈមមណ្ឌលឯកសារកម្ពុជានិងវិទ្យាស្ថានសហរដ្ឋអាមេរិកដើម្បីសន្តិភាពគឺធ្វើឡើងរយៈពេលមួយសប្តាហ៍ ចាប់ពីថ្ងៃទី៥ រហូតដល់ថ្ងៃទី១១ ខែតុលានេះ។
អ្នកសម្របសម្រួលកិច្ចប្រជុំ គឺ លោក អេង កុកថាយ បានឲ្យដឹងថា មន្ត្រីសិទ្ធិមនុស្សទាំងនោះគឺមកពីប្រទេសកម្ពុជា សហរដ្ឋអាមេរិក ប្រទេសយូហ្គោស្លាវី កាតាមេឡា ភូមា អ៊ីរ៉ាក់ អាហ្វហ្កានីស្ថាន និងប្រទេសអាហ្វ្រិកខាងត្បូង។
នៅអំឡុងកិច្ចប្រជុំ មន្ត្រីសិទ្ធិមនុស្សជាតិនិងអន្តរជាតិទាំងនោះ ក៏នឹងគ្រោងធ្វើទស្សនកិច្ចសារមន្ទីរឧក្រិដ្ឋកម្មប្រល័យពូជសាសន៍ទួលស្លែងនិងអតីតវាលពិឃាតមនុស្ស បឹងជើងឯក ផងដែរ។
ជាមួយគ្នានេះ មន្ត្រីសាលាក្តីខ្មែរក្រហមនិងមន្ត្រីសិទ្ធិមនុស្សក្នុងស្រុកមួយចំនួនទៀត ក៏បានចូលរួមកិច្ចប្រជុំនោះដែរ ក៏ប៉ុន្តែ គេមិនឃើញមានវត្តមានមន្ត្រីសិទ្ធិមនុស្សនៃរដ្ឋាភិបាលខ្មែរនោះឡើយ៕