ការអំពាវនាវខាងលើនេះបានធ្វើទ្បើងនៅក្នុងពិធីប្រមូលផ្តុំគ្នាដោយសន្តិវិធីនៅក្បែរពន្ធនាគារប៉េហ្ស៊ី ជាយទីក្រុងភ្នំពេញ ដើម្បីបង្ហោះប៉េងប៉ោងពណ៌សចំនួន១៧០០ប៉េងប៉ោងជានិមិត្តសញ្ញាថា ប៊ន សំណាង និង សុខ សំអឿន កំពុងជាប់ក្នុងពន្ធនាគារប៉េហ្ស៊ី ចំនួន១៧០០ថៃ្ងដោយអយុត្តិធម៌។
លោក វ៉ាន់ សូផាត នាយករងរបស់អង្គការសិទ្ធិមនុស្សលីកាដូទទួលបន្ទុកទំនាក់ទំនងនឹងការតស៊ូមតិដែលបានដឹកនាំការទាមទារខាងលើនេះបានមានប្រសាសន៍ក្នុងពិធីនោះថា ៖ «តុលាការកំពូលសុំឲ្យលោកកំណត់នូវថ្ងៃសវនាការលើករណីលោកទាំងពីរនេះឲ្យបានឆាប់ ហើយនិងដោះលែងលោកទាំងពីរនេះឲ្យមានសេរីភាពឡើងវិញ»។
គ្មានការរារាំងណាមួយពីសំណាក់អាជ្ញាធរនគរបាលចំពោះការប្រមូលផ្តុំគ្នាដោយសន្តិវិធីនៅក្បែរពន្ធនាគារប៉េហ្ស៊ីនោះទេ។
លោកស្រី នួន គឹមស្រ៊ី ម្តាយរបស់ ប៊ន សំណាង ដែលបានមកចូលរួមក្នុងការបង្ហោះប៉េងប៉ោងនៅព្រឹកថ្ងៃអង្គារនេះបានមានប្រសាសន៍ថា ៖ «ខ្ញុំក៏សូមព្រះមហាក្សត្រលោកជួយកូនខ្ញុំផង ហើយនិងសម្ដេចទាំងបី លោកមេត្តាជួយកូនចៅឲ្យរួចពីពន្ធនាគារផង»។
លោក វ៉ន ផុន ជាឪពុករបស់ សុខ សំអឿន បានមានប្រសាសន៍ថា ៖ «ខ្ញុំក៏សូមអំពាវនាវដល់លោកតុលាការកំពូលសូមលោកមេត្តាជួយយករឿងកូនរបស់ខ្ញុំនេះ ដើម្បីឡើងទៅកាត់ក្ដីនៅតុលាការកំពូល។ កូនរបស់ខ្ញុំអត់មានទោសពៃរ៍អ្វីផង ហើយនៅជាប់ក្នុងពន្ធនាគារហ្នឹងយូរពេក»។
រីឯលោក ជា មុនី ជាប្រធានសហជីពសេរីកម្មករកម្ពុជាដែលជាប្អូនបង្កើតរបស់លោក ជា វិជា្ជ បានមកចូលរួមក្នុងការទាមទារឲ្យអាជ្ញាធរនិងតុលាការដោះលែង ប៊ន សំណាង និង សុខ សំអឿន ឲ្យមានសេរីភាពវិញនោះ បានថ្លែងថា ៖ «អ៊ីចឹងហើយនៅពេលដែលលោក ហេង ពៅ ពេលដែលគាត់ចូលរួមសវនាការនៅសាលាដំបូង គាត់បានស្រែកហើយថា ពីរនាក់ហ្នឹងមិនមែនជាឃាតករសម្លាប់លោក ជា វិជ្ជា ទេ ហើយនេះគឺជាសាក្សីយ៉ាងសំខាន់»។
សូមរំឮកថា ប៊ន សំណាង និង សុខ សំអឿន ត្រូវបានតុលាការក្រុងភ្នំពេញបានកាត់ទោសឲ្យជាប់គុកម្នាក់ៗ២០ឆ្នាំក្រោមបទចោទប្រកាន់ថា ពួកគេបានបាញ់សម្លាប់លោក ជា វិជ្ជា មេដឹកនាំសហជីពសេរីកម្មករកម្ពុជា កាលពីថៃ្ងទី២២ ខែមករា ឆ្នាំ២០០៤។ ក្រោយមកតុលាការសាលាឧទ្ធរណ៍បានសម្រេចតម្កល់សាលក្រមនោះចាត់ទុកថាជាបានការក្នុងសវនាការសួរដេញដោលកាលពីខែមេសា ឆ្នាំ២០០៧កន្លងទៅ។
ការសម្រេចនោះហើយបានញ៉ាំងឲ្យមានប្រតិកម្មជាច្រើនពីសំណាក់សកម្មជនការពារសិទ្ធិមនុស្សជាតិនិងអន្តរជាតិ ព្រមទាំងអង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា បានទាមទារសុំឲ្យអាជ្ញាធរដោះលែងអ្នកទាំងពីរឲ្យមានសេរីភាពវិញដោយគ្មានលក្ខខណ្ឌ៕