អាដហុកផ្លាស់មន្ត្រីចេញពីរតនគិរីដើម្បីបញ្ចប់រឿងក្ដីតុលាការ
ដោយ រដ្ឋាវិសាល
2009-08-06
មន្ត្រីសមាគមការពារសិទ្ធិមនុស្សនិងអភិវឌ្ឍន៍ (អាដហុក) ឲ្យដឹងនៅថ្ងៃព្រហស្បតិ៍ ទី៦ សីហា ឆ្នាំ២០០៩ ថា សកម្មជនរបស់សមាគមប្រចាំខេត្តរតនគិរី ០២នាក់ ត្រូវផ្លាស់ចេញពីខេត្តទៅបំពេញតួនាទីនៅតំបន់ឯទៀត។
ពិធីដង្ហែក្បួនទាមទារឲ្យបញ្ឈប់ការកាប់រានព្រៃឈើនិងការរំលោភយកដីធ្លីនៅខែត្ររតនគិរី កាលពីថ្ងៃ២៥ មិថុនា ២០០៩។
សកម្មជនទាំងពីរគឺ លោក ប៉ែន ប៊ុណ្ណារ៍ មន្ត្រីសម្របសម្រួលសមាគមអាដហុក ប្រចាំខេត្តរតនគិរី និងលោក ឆាយ ធី មន្ត្រីជំនួយការ។
អនុប្រធានផ្នែកស៊ើបអង្កេតនៃសមាគមអាដហុក លោក ចាន់ សុវ៉េត បញ្ជាក់ថា ៖ «យើងគប្បីបន្ទន់ឥរិយាបថខ្លះ វាជាសញ្ញាណមួយបញ្ជាក់ថា សមាគមអាដហុក គោរពច្បាប់ សមាគមអាដហុក នៅតែកោតសរសើរចំពោះសកម្មភាព ស្នាដៃរបស់លោក ប៉ែន ប៊ុណ្ណារ៍ ប្រសើរជាជាងអាជ្ញាធរដែលមានអំណាចរបស់ខ្លួន ហើយធ្វើឲ្យពលរដ្ឋស្អប់»។
ចៅក្រមស៊ើបអង្កេតលោក ថោ សារ៉ន បានចេញដីកាកោះហៅលោក ប៉ែន ប៊ុណ្ណារ៍ និង លោក ឆាយ ធី ឲ្យចូលខ្លួនបំភ្លឺកាលពីថ្ងៃទី៤ សីហា ឆ្នាំ២០០៩ ពីរឿងញុះញង់ប្រជាពលរដ្ឋនៅភូមិប៉ាតាង ស្រុកលំផាត់ ខេត្តរតនគិរី ដែលមានជម្លោះដីធ្លីជាមួយក្រុមហ៊ុន ឌីអឹម ហ្រ្គូប ហើយបានប្តឹងចាប់អ្នកភូមិ៤នាក់ដាក់ពន្ធនាគារ និង ៨នាក់ទៀត រត់គេចខ្លួនក្នុងបទចោទប្រកាន់ថា អ្នកភូមិរំលោភដីនិងកាប់បំផ្លាញដើមកៅស៊ូក្រុមហ៊ុន ប៉ុន្តែបានដោះលែងវិញ បន្ទាប់ពីអ្នកភូមិត្រូវបានក្រុមមន្ត្រីអាជ្ញាធរអំពាវនាវឲ្យចូលសារភាពទទួលកំហុស ហើយមួយចំនួនបានសារភាពថា សកម្មជនសិទ្ធិមនុស្សទាំងពីរជាអ្នកញុះញង់ពួកគេ។
ចៅក្រមស៊ើបអង្កេតតុលាការខេត្តរតនគិរី លោក ថោ សារ៉ន មានប្រសាសន៍ទាក់ទិនករណីនេះថា ៖ «បើសិនជាគាត់ចេញផុតពីទឹកដីរតនគិរី បានន័យថា ផុតពីដែនសមត្ថកិច្ចរបស់តុលាការរតនគិរីហើយ»។
ចំណែកលោក ប៉ែន ប៊ុណ្ណារ៍ មានប្រសាសន៍ពីអារម្មណ៍លោកជុំវិញការផ្លាស់ប្តូរនេះ ៖ «ទោះបីគេអាចគ្របលើយើងបាន ក៏ប៉ុន្តែក្រុមគេប្រាកដជាដឹងថា គេកំពុងតែធ្វើរឿងខុសឲ្យទៅជាត្រូវ»។
អ្នកសម្របសម្រួលអង្គការគាំទ្រសហគមន៍ជនជាតិដើមភាគតិច មានមូលដ្ឋាននៅខេត្តរតនគិរី លោក ទេព បូរិន បដិសេធមិនធ្វើអត្ថាធិប្បាយជុំវិញការផ្លាស់ប្តូរនោះទេ តែទទួលស្គាល់ថា លោក ប៉ែន ប៊ុណ្ណារ៍ បានបំពេញតួនាទីត្រឹមត្រូវក្នុងភារកិច្ចជាសកម្មជនគាំពារសិទ្ធិមនុស្សនៅមូលដ្ឋាន។
ចំណែកមន្ត្រីមជ្ឈមណ្ឌលអប់រំច្បាប់សម្រាប់សហគមន៍ លោក គិត ទូច ចាប់អារម្មណ៍យ៉ាងដូច្នេះ ៖ «អាជ្ញាធរហ្នឹងព្យាយាមធ្វើការលើកទឹកចិត្តការសហការតួអង្គសង្គម មានចរិតឈឺឆ្អាលបញ្ហាធនធានធម្មជាតិ ដី និងជនរងគ្រោះនៅតំបន់ភូមិភាគឦសាន បែរទៅជាដាក់សម្ពាធទៅលើអ្នកគ្រប់គ្រងខាងអង្គការអាដហុក»។
ដូចគ្នានេះដែរ តំណាងអ្នកភូមិជនជាតិដើមនៅខេត្តរតនគិរី លោក ជុ សាវ៉ាត បានបន្ថែម ៖ «គាត់ជួយដោះស្រាយជនជាតិភាគតិចយើងខ្ញុំ ដូចជាព្រៃឈើអី គាត់បានការពារ គាត់យកចិត្តទុកដាក់មែនទែន ខ្ញុំអត់ពីគាត់ ព្រួយបារម្ភណាស់»។
ដំណឹងបានឲ្យដឹងថា សមាគមអាដហុដ គ្រោងឲ្យលោក ប៉ែន ប៉ុណ្ណារ៍ ទទួលទៅបំពេញតួនាទីនៅឯការិយាល័យកណ្តាលនៃសមាគមអាដហុក ឯទីក្រុងភ្នំពេញ លោក ឆាយ ធី ត្រូវបំពេញតួនាទីនៅការិយាល័យសិទ្ធិមនុស្សខេត្តកណ្តាល ហើយអ្នកសម្របសម្រួលអាដហុកខេត្តមណ្ឌលគិរី លោក សំ សារិន នឹងមកជំនួសលោក ប៉ែន ប៊ុណ្ណារ៍ នៅខេត្តរតនគិរី៕
អត្ថបទដែលទាក់ទង
អ.ស.ប.អំពាវនាវឲ្យអាជ្ញាធររតនគិរីបញ្ឈប់ការយាយីដល់សកម្មជនសិទ្ធិមនុស្សនិងអ្នកសារព័ត៌មាន
ក្រុមសិទ្ធិមនុស្សស្នើឲ្យស៊ើបអង្កេតអំពើមិនត្រឹមត្រូវនៃអនុប្រធានតុលាការរតនគិរី
អ្នកភូមិនៅរតនគិរីនាំគ្នាផ្ដិតមេដៃស្នើសុំការវិលត្រឡប់នៃសកម្មជនសិទ្ធិមនុស្ស
សាលាឧទ្ធរណ៍បង្គាប់ឲ្យមានការស៊ើបអង្កេតបន្ថែមជុំវិញករណី ប៊ន សំណាង និងសុខ សំអឿន
អ្នកភូមិនៅរតនគិរីអះអាងថាមេភូមិមេឃុំបង្ខំពួកគេឲ្យទម្លាក់កំហុសលើអាដហុក
សមាគមអាដហុកសោកស្ដាយចំពោះការរំខានដល់ការងាររបស់ប៉ែន ប៊ុណ្ណារិ៍
មជ្ឈមណ្ឌលសិទ្ធិមនុស្សកម្ពុជាបារម្ភអំពីករណីផ្លាស់មន្ត្រីអាដហុកចេញពីរតនគិរី
មេធាវីទាមទារឲ្យលើកលែងការចោទប្រកាន់ចំពោះប៊ន សំណាង និងសុខ សំអឿន
មតិ
អ្នកអាចបញ្ចេញមតិដោយបំពេញទម្រង់ខាងក្រោមនេះក្នុងទម្រង់ជាអក្សរសុទ្ធ។. មតិត្រូវតែអនុញ្ញាតដោយអ្នកសម្របសម្រួលនិងមិនបង្ហាញភ្លាមៗនៅលើទំព័រនេះទេ។ សូមអញ្ជើញត្រឡប់មកបើកទំព័រនេះម្ដងទៀតដើម្បីមើលថាតើមតិរបស់អ្នកត្រូវបានចុះផ្សាយឬអត់។
មើលមតិទាំងអស់.