ចៅសង្កាត់ទន្លេបាសាក់ លោក ខាត់ ណារិទ្ធ មានប្រសាសន៍ថា ធនាគារកាណាឌីយ៉ា បានបញ្ឈប់ការដោះស្រាយដើម្បីឲ្យអ្នករស់នៅសហគមន៍រីករាយ ដែលនៅសល់ក្នុងសហគមន៍នោះឲ្យចាកចេញពីផ្ទះនោះហើយ។
លោក ខាត់ ណារិទ្ធ ថ្លែងដូច្នេះថា ៖ «ឥឡូវខាងក្រុមហ៊ុនគេផ្អាកហើយ គេទុកឲ្យសាលារាជធានីភ្នំពេញធ្វើការ។ ចាប់ផ្អាកតាំងពីថ្ងៃហ្នឹងទៅហើយ»។
ការចាប់ផ្តើមដោះស្រាយនេះ បានធ្វើឡើងនៅគ្រាដែលអ្នកភូមិនិងសិស្សសាលាបានទៅតវ៉ានៅមុខធនាគារកាណាឌីយ៉ា ក្រោយពីគ្រឿងចក្រក្រុមហ៊ុនសាងសង់ផ្ទះវីឡាបុរីឧទ្យានបាសាក់ ដែលគាំទ្រថវិកាពីធនាគារកាណាឌីយ៉ា បានលុបទឹកបឹងក្រោយផ្ទះអ្នកភូមិនិងប្រើកម្មករច្រើនរយនាក់បិទរបងស័ង្កសី ក្រោយផ្ទះអ្នកស្រុកកាលពីថ្ងៃ២៥ ខែមេសា។
អនុប្រធានភូមិ៨ ក្រុម៤៦A នៃសហគមន៍រីករាយ លោក ស៊ឹម វៃ មានប្រសាសន៍ថា ការចរចាមិនឯកភាពគ្នា អ្នកខ្លះទារអភិវឌ្ឍនៅកន្លែង ខ្លះទារប្រាក់ថ្លៃខ្ពស់ជាងសមត្ថភាពក្រុមហ៊ុនឲ្យ ៖ «ដោះស្រាយយ៉ាងម៉េច បើម្នាក់ៗរឹងទទឹងពេក។ ខ្ជិល បើទារសុទ្ធតែបីបួនម៉ឺន[ដុល្លារ]ឯណោះ នរណាមានលុយដោះស្រាយ បើគេដោះស្រាយបន្តិចបន្តួច ឥឡូវស្រេចលើសាលាក្រុងម្ចាស់ក្រុមហ៊ុនគេ»។
សាស្រ្តាចារ្យគណិតវិទ្យានៃវិទ្យាល័យព្រះស៊ីសុវត្ថិ រស់នៅសហគមន៍រីករាយ លោក ចាន់ ប៊ុនថុល មានប្រសាសន៍ថា ក្បាលដីខ្លះជាង ១០ម៉ែត្រ និងជម្រៅជាង ៣០ ទៅ ៧០ម៉ែត្រ ឲ្យតម្លៃ ២ម៉ឺនដុល្លារ គ្មានអ្នកណាយល់ព្រមទេ ទើបគាត់កំណត់ លក់ដី ជាម៉ែត្រការ៉េវិញ ៖ «ខ្លះគេដាក់ ៥ម៉ឺន ៧ម៉ឺន[ដុល្លារ] អ៊ីចឹងទៅ ចំណែកខ្ញុំ ខ្ញុំដាក់ជាការ៉េ មួយការ៉េ ៤០០(ដុល្លារ)»។
លោក ចាន់ ប៊ុនថុល ចោទថា ក្រោយពីការចរចាមិនឯកភាពគ្នា មានរបាយការណ៍ពីអាជ្ញាធរចោទមកលើក្រុមអ្នកតវ៉ា រឿងដីធ្លីនោះទៀត។ មិនតែប៉ុណ្ណោះ មានអ្នកស្រុកឈឺច្រើនពីការជះក្លិនស្អុយនៃទឹកដក់ក្រោមផ្ទះនិងបង្គន់ដែលដីខ្សាច់លុបលូជិត គ្មានកន្លែងបង្ហូរចេញក្រៅ ក្រោយធនាគារបំពានយកដី ដោយការចាក់ខ្សាច់លុបបឹងក្រោយផ្ទះអ្នកភូមិរីករាយមក ៖ «ពីមុខពីក្រោយអីហ្នឹង បាំងទាំងអស់ អត់ខ្យល់ចេញចូលអី ហើយគាត់បូមខ្សាច់មកលិចបង្គន់លិចអីស្អុយ ឥឡូវខ្ញុំឈឺ»។
វិទ្យុអាស៊ីសេរីបានព្យាយាមសុំការបំភ្លឺពីខាងធនាគារកាណាឌីយ៉ា និងអាជ្ញាធរក្រុងភ្នំពេញ ប៉ុន្តែមិនអាចទាក់ទងបានឡើយជុំវិញបញ្ហានេះ។
អាជ្ញាធរភូមិ៨ និងតំណាងសហគមន៍រីករាយ បានឲ្យដឹងថា ប្រមាណ៥៤គ្រួសារកំពុងរស់នៅក្នុងដីជម្លោះសហគមន៍រីករាយនោះ។ ក្នុងនោះមានគ្រួសារ ប្រមាណ៣០ ជាប់ពាក់ព័ន្ធនឹងការតវ៉ាដីជាមួយធនាគារកាណាឌីយ៉ា ក្រៅពីនោះមានជាប់ពាក់ព័ន្ធនឹងក្រុមអ្នកទិញដីដទៃទៀត។ ទើបការសម្រុះសម្រួលគ្នារកវិធីកណ្តាលមានការលំបាកបានជាអាជ្ញាធរសង្កាត់ និងធនាគារកាណាឌីយ៉ាបញ្ឈប់ការដោះស្រាយ បង្វែឲ្យសាលារាជធានីភ្នំពេញដោះស្រាយវិញ។
ក្រុមការងារពិសេសនៃអង្គការសិទ្ធិមានលំនៅ កញ្ញា រចនា ថ្លែងថា ភាគីឯកជនគេយកដីធ្លីពីអ្នកទន់ខ្សោយបានងាយនិងតែងតែឈ្នះនោះ គឺកំណត់ប្រាក់ឲ្យចាកចេញ បើតវ៉ាច្រើនគេរកវិធីដោះស្រាយតាមរយៈការពន្យារពេលដោះស្រាយកាន់តែយូរនាំឲ្យមានការធុញទ្រាន់ ចុងក្រោយគេយកតុលាការមកចោទប្រកាន់អ្នកស្រុក ឬទៅលើជនក្រីក្រ៕