ការអះអាងនេះធ្វើឡើងមុនមួយថ្ងៃនៃដំណើរទស្សនកិច្ចរបស់លោក ហ៊ុន សែន មកកាន់ខេត្តរតនគិរី ដើម្បីសម្ពោធកំណាត់ផ្លូវជាតិលេខ៧៨ នៅថ្ងៃទី១៨ ខែមីនា ឆ្នាំ២០១០នេះ។ ចំណែកញត្តិធ្វើឡើងដោយតំណាងអាជ្ញាធរមូលដ្ឋានក្នុងតំបន់ទន្លេសេសាន និងទន្លេស្រែពក រួមមានស្រុកចំនួន៦ ឃុំចំនួន២០ និងភូមិចំនួន៧៤ ក្នុងខេត្តរតនគិរី។
មេឃុំស្រែអង្គ្រង ស្រុកកូនមុំ លោក កែវ ឡុត មានប្រសាសន៍ថា ញត្តិនឹងត្រូវប្រគល់ជូនលោកនាយករដ្ឋមន្ត្រីតាមរយៈអភិបាលខេត្តនិងអ្នកតំណាងរាស្ត្រ ឬធ្វើឡើងដោយអ្នកតំណាងអាជ្ញាធរផ្ទាល់ ប្រសិនមានការអនុញ្ញាតឲ្យធ្វើទៅបាន។
លោក កែវ ឡុត បានបញ្ជាក់ថា ៖ «ក្នុងនាមអាជ្ញាធរយើងខ្ញុំ គឺធ្វើញត្តិគាំទ្រជាមួយសហគមន៍ ដាក់អមទៅជាមួយគ្នា»។
អភិបាលរងអណ្ដូងមាស អ្នកស្រី ក្លាន លៀម បញ្ជាក់ដែរថា ក្រុមអាជ្ញាធរមូលដ្ឋានធ្លាប់បានផ្ដល់សេចក្ដីរាយការណ៍ពីផលប៉ះពាល់របស់អ្នកភូមិតាមដងទន្លេជូនអាជ្ញាធរពាក់ព័ន្ធជួយដោះស្រាយច្រើនឆ្នាំហើយ តែមិនមានលទ្ធផល។
អ្នកស្រី ក្លាន លៀម បានថ្លែងថា ៖ «ទោះបីមានបញ្ហាយ៉ាងម៉េចយ៉ាងម៉ាក៏ដោយ ខ្ញុំក៏គាំទ្រលើសហគមន៍ដែលមានសិទ្ធិការពារតាមដងទន្លេសេសាន ការពារទាំងអស់គ្នា»។
តាំងពីឆ្នាំ១៩៩៦ រហូតមកទល់នឹងឆ្នាំ២០១០ ប្រទេសវៀតណាមបានសាងសង់ទំនប់វារីអគ្គិសនីប្រមាណ ៦កន្លែងនៅតាមដងទន្លេខាងលើនៃទន្លេសេសាន និងទន្លេស្រែពកនៃប្រទេសកម្ពុជា ហើយបន្ទាប់មកអ្នកភូមិបានរងផលប៉ះពាល់ទាំងជីវភាព សុខភាព អាយុជីវិត ដីស្រែចម្ការរ ផលដំណាំ សត្វពាហនៈ ជ្រូកមាន់ទា ផ្ទះសម្បែង ចំណែកត្រីនិងជីវចម្រុះ បរិស្ថានធនធានធម្មជាតិ និងគុណភាពទឹកទន្លេ ត្រូវបានបំផ្លាញ។
តំណាងអ្នកភូមិរស់នៅតាមដងទន្លេបញ្ជាក់ថា អ្នកភូមិស្នើសុំឲ្យមានការទទួលខុសត្រូវពីភាគីអ្នកសាងសង់ទំនប់ពីផលប៉ះពាល់នេះ ហើយក៏ស្នើសុំឲ្យមានការសិក្សានិងដោះស្រាយផលប៉ះពាល់ជាក់លាក់ជាមួយអ្នកភូមិ ប្រសិនរាជរដ្ឋាភិបាលអនុញ្ញាតឲ្យមានការសាងសង់ទំនប់វារីអគ្គិសនីនៅស្រុកសេសានបន្ថែមទៀត ៖ «ពួកខ្ញុំចង់ឲ្យក្រុមហ៊ុនហ្នឹងទទួលខុសត្រូវពីអាយុជីវិតរបស់សហគមន៍។ មុននឹងគាត់បើកទឹកមក សូមឲ្យគាត់ជូនដំណឹងជាមុន»។
វិទ្យុអាស៊ីសេរីមិនអាចសុំការអធិប្បាយពីអភិបាលខេត្តរតនគិរី លោក ប៉ាវ ហមផាន បានទេ នៅថ្ងៃទី១៧ ខែមីនា ឆ្នាំ២០១០ ទាក់ទិននឹងករណីនេះ។ កាលពីថ្ងៃពុធកន្លងទៅ លោកមានប្រសាសន៍ថា លោកមិនចង់ឲ្យមានការដាក់ញត្តិជូនប្រមុខរាជរដ្ឋាភិបាលក្នុងឧកាសសម្ពោធផ្លូវទេ។ ញត្តិគួរផ្ដល់មកអាជ្ញាធរខេត្ត។
គេមិនដឹងថា តើគម្រោងដាក់ញត្តិជូនលោកនាយករដ្ឋមន្ត្រីនាពិធីសម្ពោធផ្លូវអាចនឹងធ្វើបានតាមការគ្រោងទុកឬយ៉ាងណាទេ ក៏ប៉ុន្តែប្រធានក្រុមការងារមូលដ្ឋានអង្គការទន្លេបី អ្នកស្រី ណាង ណយ មានប្រសាសន៍ថា ៖ «ទាំងសហគមន៍ ទាំងអាជ្ញាធរ ដែលពួកគាត់បានមកជួបជុំគ្នានៅទីនេះ ដើម្បីសរសេរញត្តិដាក់ជូនទៅសម្ដេចនាយក។ ផុសឡើងនូវឆន្ទៈរបស់ពួកគាត់ទាំងអស់»។
តាមការគ្រោងទុកប្រជាពលរដ្ឋរស់នៅតាមដងទន្លេ និងសហគមន៍ជនជាតិដើមភាគតិច កំពុងមានបញ្ហាដីធ្លីនៅខេត្តរតនគិរី ក៏កំពុងស្វែងរកលទ្ធភាពប្រគល់ញត្តិសុំឲ្យលោកនាយករដ្ឋមន្ត្រីបានដឹង និងជួយអ្នកភូមិដូចគ្នា នៅថ្ងៃទី១៨ ខែមីនា ថ្ងៃសម្ពោធផ្លូវនោះ៕