ស្នងការខេត្តបន្ទាយមានជ័យ លោក ហ៊ុន ហៀង មានប្រសាសន៍ថា របាយការណ៍ តាមស្រុក បណ្តោះឤសន្ន ៣ថ្ងៃចូលឆ្នាំខ្មែរ គ្រោះថ្នាក់ចរាចរណ៍ បានកើតមាន ដោយសារ ល្បែងគប់ទឹក បណ្តាលឱ្យមនុស្សរងរបួសធ្ងន់ ពីរនាក់ គ្មានអ្នកស្លាប់ទេ ។
លោក ហ៊ុន ហៀង បានឱ្យដឹងថា ៖ «គេចទឹក ទៅប៉ះម៉ូតូ បុកគោយន្តគេ របួសបាក់ជើង ខ្លួនឯង ។ ទីពីរទៀត គឺលេងគប់ដែរ ប៉ុន្តែមិនដឹងថា គប់ទឹក ឬក៏ញាត់ស្អី ចូលក្នុងហ្នឹងទេ គឺថា គប់ទៅត្រូវភ្នែក របួសធ្ងន់ យើងបានបញ្ជូនទៅដល់ពេទ្យ» ។
នៅឯខេត្តកណ្តាល ស្នងការរងទទួលបន្ទុកសណ្តាប់ធ្នាប់ ចរាចរណ៍ផ្លូវគោក លោក មាស សារ៉េត មានប្រសាសន៍ថា គ្រោះថ្នាក់ចរាចរណ៍ ក្នុងខេត្តកណ្តាល មាន ៥ ករណី ស្លាប់ ១០នាក់ របួសធ្ងន់ ២០នាក់ របួសស្រាល ២០នាក់ ខូចរថយន្ត ៨គ្រឿង ម៉ូតូ ៣៨គ្រឿង រ៉ឺម៉កម៉ូតូ ១គ្រឿង កង់ ១គ្រឿង ។
លោកបានឱ្យដឹងពីមូលហេតុ ដែលនាំឱ្យមានគ្រោះថ្នាក់ចរាចរណ៍ ថា ៖ «អ្នកបើកបរយានយន្តមួយចំនួនមានជាតិស្រវឹង ចំនួន ៦០% ហើយ បើកមានល្បឿនលឿន បើកមានលក្ខណៈប្រជែង និងបើកជាជួរ ធ្វើឱ្យកើតមានគ្រោះថ្នាក់» ។
នៅឯខេត្តកំពង់ចាម តាមរបាយការណ៍ បណ្តោះឤសន្ន ពីស្នងការខេត្ត លោក នួន សាមិន មានប្រសាសន៍ថា គ្រោះថ្នាក់ចរាចរណ៍ បានកើតមានជាង ១០ករណី ខូចរថយន្ត ៣គ្រឿង និងម៉ូតូច្រើនគ្រឿង ៖ «ជាង ១០លើកហើយ ហើយបង្កឱ្យមានអ្នករងគ្រោះ ស្លាប់ ៤នាក់ របួសប្រហែលជា ជាង ៣០នាក់» ។
អភិបាលខេត្តកំពង់ស្ពឺ លោក កង ហ៊ាន មានប្រសាសន៍ថា គ្រោះថ្នាក់ចរាចរណ៍ ៣ថ្ងៃ ចូលឆ្នាំថ្មី តាមផ្លូវជាតិ និងផ្លូវលំ ក្នុងស្រុកមួយចំនួន ប្រមាណ ១០ករណី ។ លោកថា គ្រោះថ្នាក់នោះ គ្មានអ្នកស្លាប់ទេ រីឯ ការរាំកម្សាន្ត ក្នុងឱកាសចូលឆ្នាំថ្មីមានអ្នកបង្កអុកឡុក ២ករណី គ្មានអ្នករងរបួសដែរ ៖ «១០ករណីដែរ អត់មានស្លាប់ទេ មានតែរបួស មិនធ្ងន់ប៉ុន្មានទេ របួសស្រាលៗដែរទេ» ។
អធិការស្រុកកោះកុង ខេត្តកោះកុង លោក ហេង សុជាតិ មានប្រសាសន៍ថា ក្នុងស្រុកកោះកុងវិញ មានគ្រោះថ្នាក់ចរាចរណ៍ ក្រឡាប់រថយន្ត ២គ្រឿង រងរបួស ៤នាក់ គ្មានអ្នកស្លាប់ទេ ។
លោក ហេង សុជាតិ មានប្រសាសន៍ថា ៖ «ឡានទួរីស របួស ៤នាក់ ធ្ងន់បាក់ជើង ហើយនិង បែកក្បាល ហើយ មួយទៀត ឡានមកពីភ្នំពេញ ហើយ ឤណិកជនខ្មែរ នៅឤមេរិក ម៉ាក 4 Runner បានជាប់ហ្វ្រាំង ហើយក្រឡាប់ ធ្លាក់ទៅក្រោយ កំពិតដំបូលអស់ អត់មានរបួសអីទេ ឤហ្នឹង គាត់បើកម្នាក់ឯង» ។
ឯអភិបាលស្រុកស្រែអំបិល ខេត្តកោះកុងដែរ លោក ប៊ុន ឡឺត មានប្រសាសន៍ថា ៣ថ្ងៃ ចូលឆ្នាំខ្មែរ មានគ្រោះថ្នាក់ចរាចរណ៍ តែ ១ករណី បណ្តាលឱ្យមាន អ្នករងរបួសម្នាក់ និងខូចខាតម៉ូតូ ១គ្រឿង ៖ «អ្នកជិះម៉ូតូ បុកអ្នកធ្វើដំណើរ ឱ្យរបួស» ។
រីឯ ស្នងការក្រុងព្រះសីហនុវិញ លោក តាក់ វណ្ណថា មានប្រសាសន៍ថា ចូលឆ្នាំថ្មី ៣ថ្ងៃ ក្នុងក្រុងព្រះសីហនុ គ្មានគ្រោះថ្នាក់ចរាចរណ៍ បានកើតឡើងទេ ។
ប្រភពពីមន្ត្រីចរាចរណ៍ផ្លូវគោក ឱ្យដឹងថា រាល់គ្រោះថ្នាក់ចរាចណ៍ បណ្តាលមកពីស្ថានភាពផ្លូវកាន់តែប្រសើរច្រើន ហើយ អ្នកបញ្ជាយានយន្ត ធ្វេសប្រហែស មិនគោរពច្បាប់ចរាចរណ៍ និង មិនរៀនច្បាប់ចរាចរណ៍ ។ អ្នកបើកបរ ផឹកគ្រឿងស្រវឹង ប្រើល្បឿនហួសកំណត់ មិនប្រកាន់ស្តាំ ចៀសគ្នាមិនប្រុងប្រយ័ត្ន មិនចេះប្រើ ភ្លើងសញ្ញាឆ្លងកាត់ ជាដើម ៕