លោក រឿង បូរ អធិការប៉ូលិស ស្រុកភ្នំស្រុក បានថ្លែងនៅព្រឹកថ្ងៃអាទិត្យ ទី២៣ ខែវិច្ឆិកាថា លោក ឃីវ កៅរី អាយុ៣៤ឆ្នាំ កំពុងដេកព្យាបាលនៅមន្ទីរពេទ្យស្រុក បន្ទាប់ពីជនល្មើសឯកសណ្ឋានកងទ័ពម៉ាស់បិទមុខបាញ់ប្រហារដោយកាំភ្លើងខ្លីចំនួន២គ្រាប់នៅក្នុងផ្ទះ ដែលស្ថិតនៅភូមិកំពីងពួយ ឃុំភ្នំដី ស្រុកភ្នំស្រុក ខែត្របន្ទាយមានជ័យ។
លោក រឿង បូរ បានមានប្រសាសន៍ថា ៖ «តាមរូបភាពដែលយើងសន្និដ្ឋានដំបូងថាប្លន់ ប៉ុន្តែដល់យើងមើលហេតុការណ៍ដែលវាធ្វើទៅ វាមិនមែនប្លន់ អាហ្នឹងវាដូចជាគំនុំ ក៏ប៉ុន្តែខ្ញុំជឿថា ប្រហែលអាចមានគំនុំខ្លះ ដែលទាក់ទងនឹងរឿងប្រជែងគ្នារកស៊ីត្រីរកអី ប៉ុន្តែមុខសញ្ញានោះវាពាក់ម៉ាស់ ប៉ុន្តែស្លៀកពាក់ឯកសណ្ឋានកងទ័ព។ បាញ់ចំជើងទាំងពីរ ខាងស្ដាំត្រូវភ្លៅ ប៉ុន្តែចុងជើងខាងឆ្វេងត្រូវក្រោមភ្លៅបន្តិច ត្រូវកំភួនជើង»។
អ្នកស្រី វិន សុខៃ ភរិយាជនរងគ្រោះបានបញ្ជាក់ថា ហេតុការណ៍ប្រហារលើប្តីរបស់អ្នកស្រីទំនងជារឿងទំនាស់ក្នុងការរកស៊ីពីគ្រួសារអ្នកស្រីដែលជាអ្នកទិញកង្កែប ត្រី និងអន្ទង់លក់ ហើយថា ជនល្មើសមិនមានចេតនាបាញ់សម្លាប់ប្តីរបស់លោកស្រីទេ ចំណែកទ្រព្យសម្បត្តិនៅក្នុងផ្ទះ ក៏ជនល្មើសមិនបានយកអ្វីទាំងអស់។
លោកស្រីបានថ្លែងថា ៖ «ប្ដីខ្ញុំគោលបំណងចង់រត់ចេញមកឲ្យផុត ដល់ពេលគិតឃើញថា បើសិនជាចេញមក នៅខ្ញុំនៅក្នុងនោះ ខ្លាចវាធ្វើបាបក្នុងនោះ គាត់ក៏មិនហ៊ានចេញ គាត់ឈរនៅមុខទ្វារវាបាញ់ទៅ។ វាបាញ់មួយគ្រាប់មុនអត់ត្រូវទេ ដល់វាបាញ់ទាំងពីរនាក់ យកភ្លៅទាំងពីរ ត្រូវទាំងពីរនាក់។ ខ្ញុំដឹកត្រី ដឹកអន្ទង់ កង្កែប ទិញទៅលក់ប៉ោយប៉ែត ដឹកពីភ្នំស្រុកទៅ ពីធ្នង់ ពីសំរោងមក»។
អធិការនគរបាលស្រុកភ្នំស្រុកបានថ្លែងថា សមត្ថកិច្ចកំពុងធ្វើការស្រាវជ្រាវរកមុខសញ្ញាជនល្មើស បើទោះបីករណីនោះជារឿងគំនុំក៏ដោយ។
គួរបញ្ជាក់ទៀតថា ទាក់ទងនឹងអំពើប្លន់ កាលថ្ងៃទី១៩ ខែវិច្ឆិកា ឆ្នាំ២០០៨ ក្រុមចោរប្លន់មួយក្រុមមានគ្នាជិត ១០នាក់ ស្លៀកពាក់ឯកសណ្ឋានកងយោពលខេមរភូមិន្ទប្រដាប់ដោយអាវុធអាកានិងកាំភ្លើងខ្លី បានធ្វើសកម្មភាពប្លន់ទៅក្រុមគ្រួសារមួយនៅភូមិក្បាលដំរី ឃុំបន្ទាយឆ្មារ សុ្រកថ្មពួក ខែត្របន្ទាយមានជ័យ។
នៅខែត្របន្ទាយមានជ័យដែរ នៅរយៈពេលចុងក្រោយនេះ គេកត់សម្គាល់ថា សកម្មភាពប្លន់ប្រដាប់អាវុធ បានកើតមានឡើងជាបន្តបន្ទាប់ ក្នុងនោះកាលពីថ្ងៃទី១៩ ខែសីហា នៅឃុំគោកល្មៀត ជិតច្រកបឹងត្រកួន ១ករណី នៅថ្ងៃទី២០ ខែតុលា ឆ្នាំ២០០៨ មានការប្លន់នៅផ្សារថ្មីស្ថិតក្នុងភូមិគំរូ ស្រុកថ្មពួក មួយករណីទៀត ដែលមានបា្រក់សរុបជាង ៧ម៉ឺនដុល្លារ៕