ស្នងការរងប៉ូលិសខេត្តលោក ស៊ូវ៉ាន ខាំវ៉ាន់ មានប្រសាសន៍បញ្ជាក់ថា ក្រុមចោរមានគ្នាប្រមាណ ៥នាក់ ប្រើអាវុធវែងប្រភេទអាកា៤៧មួយដើម បាញ់ចំនួន២គ្រាប់កាលពីវេលាម៉ោង៩យប់ថ្ងៃអាទិត្យ ទី១៦ វិច្ឆិកា ឆ្នាំ២០០៨ ក៏ប៉ុន្តែពុំបណ្តាលឲ្យមានមនុស្សស្លាប់ក្នុងហេតុការណ៍ទាំងអស់នោះទេ។
លោក ស៊ូវ៉ាន ខាំវ៉ាន់ មានប្រសាសន៍ថា ៖ «វាប្លន់នេះមិនមែននៅក្នុងភូមិទេ វានៅដាច់ឆ្ងាយពីគេ នៅតាមចម្ការ វាមកឆ្មក់ មួយភ្លែតវាគេចខ្លួនទៅ យើងពិបាកកំណត់មុខសញ្ញា។ ចូលទៅវាបាញ់គំរាមពីរគ្រាប់ វ៉ៃជនរងគ្រោះម្នាក់របួស»។
ជនរងគ្រោះមានឈ្មោះ ហម ស្រស់ អាយុ៥៥ឆ្នាំ កសិកររស់នៅភូមិប៉ាតាងលើ ស្រុកលំផាត់ ខេត្តរតនគិរី ត្រូវក្រុមចោរប្លន់យកប្រាក់ចំនួន ៣០ម៉ឺនរៀលនិងគ្រឿងអលង្ការមានតម្លៃប្រមាណ៤ជី។
កាលពីខែតុលាមុននេះ អ្នកភូមិអូរសៀងឡែ ក្នុងស្រុកលំផាត់ ក៏ត្រូវក្រុមចោរប្រដាប់អាវុធបាញ់សម្លាប់នៅលើលំនៅ ហើយប្លន់យកទ្រព្យសម្បត្តិដូចគ្នាដែលធ្វើឲ្យប្រជាពលរដ្ឋនៅតំបន់នោះ មានការភ័យខ្លាច ជាពិសេសរដូវប្រមូលកសិផលដែលកសិករម្នាក់ៗទទួលបានប្រាក់រាប់រយពាន់និងខ្លះរាប់ម៉ឺនដុល្លារពីការលក់គ្រាប់សណ្តែកសៀង។
តាមអ្នកភូមិប៉ាតាង សុំមិនឲ្យបញ្ចេញឈ្មោះ និយាយឲ្យដឹងថា អ្នកភូមិភាគច្រើនរស់នៅតាមចម្ការឆ្ងាយៗពីភូមិដើម្បីប្រមូលផលកសិកម្មរបស់ខ្លួនដូច្នេះពួកគេមិនមានសុវត្ថិភាពទេ ៖ «ប៉ុន្មានដង ប៉ុន្មានលើកហើយ ឮតែចោរប្លន់ មានអាវុធមានអីហ្នឹង ប្រជាពលរដ្ឋទាំងខ្ញុំអី ព្រួយបារម្ភ។ ខែលក់សណ្ដែកអីហ្នឹងគេមកប្លន់ មានចោរប៉ុន្មានក្រុមនោះ តាមព័ត៌មានគេថា»។
ចាប់ពីថ្ងៃទីមួយនៃពិធីបុណ្យអុំទូករយៈពេលតែមួយសប្តាហ៍ប៉ុណ្ណោះ ខេត្តរតនគិរីមានផ្ទុះឡើងនូវអំពើប្លន់៥ករណីផ្ទួនៗគ្នាក្នុងនោះ ប្លន់បាញ់យកម៉ូតូពីរករណីប្លន់យកទ្រព្យសម្បត្តិពីរករណី និងជាពិសេស ប្លន់បាញ់សម្លាប់មនុស្សពីរនាក់មួយករណីយកបានប្រាក់ ២៦លានរៀលនិងមាសជាង ៧តម្លឹង និងសកម្មភាពក្មេងស្ទាវប៉ុនប៉ងចាប់រំលោភស្ត្រីអ្នកទេសចរណ៍បរទេសមួយករណី។
មន្រ្តីឃ្លាំមើលសិទ្ធិមនុស្សអង្គការ អាដហុក ខេត្តរតនគិរី លោក ប៉ែន ប៊ុណ្ណារ៍ បានហៅសកម្មភាពផ្ទុះឡើងនូវអំពើប្លន់យ៉ាងគំហុកនេះថា ជាសញ្ញាណនៃការកើនឡើងនូវជនល្មើសដែលហូរចូលពីបណ្តាខេត្តនានានិងទីក្រុងភ្នំពេញ។
លោកអំពាវនាវឲ្យប្រជាពលរដ្ឋនិងសមត្ថកិច្ចបង្កើនការប្រុងប្រយ័ត្នទាក់ទិនទៅនឹងមនុស្សចំណូលថ្មីនិងការគ្រប់គ្រងការចរាចរគ្រាប់កាំភ្លើង។
លោក ប៉ែន ប៊ុណ្ណារ៍ មានប្រសាសន៍ដូច្នេះថា ៖ «ទាំងអាវុធខុសច្បាប់ ទាំងអាវុធច្នៃហ្នឹង ព្រោះទាំងអស់ហ្នឹងជារូបភាពមួយដែលបង្កឲ្យបានជារូបប្លន់ រហូតដល់ឥឡូវនាំចូលគ្រាប់អាកាពីខេត្តកំពង់ចាមទៀត»។
យ៉ាងនេះក្តី របាយការណ៍ពីស្នងការដ្ឋានប៉ូលិសខេត្តរតនគិរី ឲ្យដឹងថា ជនពាក់ព័ន្ធក្នុងអំពើប្លន់ម៉ូតូ៣នាក់ ត្រូវបានចាប់ខ្លួននិងបញ្ជូនទៅតុលាការរួចហើយនិងរកឃើញម៉ូតូមួយគ្រឿងមកវិញ ហើយបច្ចុប្បន្នសមត្ថកិច្ចខេត្តកំពុងដាក់ចេញបទបញ្ជាតឹងរ៉ឹងក្នុងកិច្ចបង្រ្កាបនេះ៕