សាក្សីនិយាយឲ្យដឹងថា ក្រុមចោរប្លន់ប្រដាប់អាវុធមួយក្រុមបានបាញ់សម្លាប់ម្ចាស់កសិដ្ឋានមួយកន្លែងនិងកូនប្រុសបង្កើតឲ្យស្លាប់ និងប្លន់យកមាសប្រាក់អស់ជាច្រើន កាលពីវេលាម៉ោងប្រមាណ៧យប់ថ្ងៃសៅរ៍ ទី១៥ វិច្ឆិកា ឆ្នាំ២០០៨។
ម្ចាស់កសិដ្ឋាន ឈ្មោះ ពៅ ម៉ៅ ត្រូវក្រុមចោរបាញ់មួយគ្រាប់ត្រូវក្រោមទ្រូងស្លាប់នៅក្រោមផ្ទះខណៈគាត់កំពុងអង្គុយហូបបាយចំណែកកូនប្រុស ឈ្មោះ ម៉ៅ ឌីស្កូ ត្រូវបាញ់ចំនួនពីរគ្រាប់ចំពោះទឹកពេលដែលគាត់ត្រឡប់ពីទិញអាហារហើយគាប់ជួនប្រទះក្រុមចោរកំពុងធ្វើសកម្មភាពក៏បាញ់មកលើគាត់តែម្តងហើយបានស្លាប់ពេលសង្រ្គោះដល់មន្ទីរពេទ្យ។
សាក្សីក្នុងហេតុការណ៍ជាក្មួយជនរងគ្រោះបញ្ជាក់ ៖ «ពីរនាក់ចុះមកឃើញពាក់អាវស ខោខ្មៅ អត់បិទមុខផង យកក្រមាចងក្បាល។ បាញ់ត្រូវកូនពៅគាត់ បាញ់ពេលខ្ញុំមកដល់ មិនទាន់ពន្លត់ម៉ូតូផងគេបាញ់»។
ចំណែកសាក្សីស្រី្តជាកម្មករបម្រើការងារក្នុងកសិដ្ឋានបញ្ជាក់បន្ថែម ៖ «គេសម្លុតខ្ញុំ ក្របួចខ្ញុំពីនោះមកដេញខ្ញុំឡើងលើផ្ទះ វាយកលុយ យកមាសខ្ញុំអស់ហើយ វាវ៉ៃខ្ញុំមួយស្វ័យកាំភ្លើងហើយដាក់មួយដៃ»។
កសិដ្ឋានដែលកើតហេតុឋិតនៅចម្ងាយពីទីរួមខេត្តប្រមាណ១៥គីឡូម៉ែត្រជាប់ដងផ្លូវជាតិលេខ៧៨ក្នុងភូមិចម្ការល្ហុង ឃុំតាអង ស្រុកកូនមុំ បើតាមសមត្ថកិច្ចកងរាជអាវុធហត្ថស្រុកបញ្ជាក់ថា ក្រុមចោរប្លន់មានគ្នាប្រមាណពី៣ទៅ៥នាក់មានអាវុធអាកា៤៧ចំនួនពីរដើមនៅទីកើតហេតុសមត្ថកិច្ចរកឃើញសំបកគ្រាប់ចំនួនបីគ្រាប់ និងគ្រាប់មិនទាន់ផ្ទុះមួយ។ ជាមួយនោះដែរក្រុមចោរបានបន្សល់ស្បែកជើងផ្ទាត់មួយគូរនៅក្បែរនោះដែរ។
មេបញ្ជាការកងរាជអាវុធហត្ថស្រុកកូនមុំ លោក ទុយ គឹមហ៊ួន មានប្រសាសន៍បញ្ជាក់ថា ក្រុមចោរបានធ្វើសកម្មភាពប្រមាណ៣០នាទីប្លន់បាញ់សម្លាប់រួចប្រើដំបងនិងខ្នងពូថៅវាយគំរាមភរិយាម្ចាស់កសិដ្ឋាននិងកម្មករដោះយកគ្រឿងអលង្ការ និងបង្ខំឲ្យបង្ហាញទីលាក់ទ្រព្យសម្បត្តិ ហើយឡើងលើផ្ទះរើកកាយពុះបំបែកទូយកទ្រព្យសម្បត្តិបន្ថែមទៀតទើបនាំគ្នារត់គេចខ្លួន។
លោក ទុយ គឹមហ៊ួន បានមានប្រសាសន៍ថា ៖ «អ្នកដែលបានមើលឃើញច្បាស់ វាជួតក្បាលក្រមា មួយទៀតរត់ថយទៅក្រោយ អាពីរនាក់រត់ចុះមក បាញ់អាអូន។ កាំភ្លើងពីរដើម»។
ក្រោយហេតុការណ៍ប៉ូលិសបានឃាត់ខ្លួនជនសង្ស័យម្នាក់ ឈ្មោះ រុន ដែលធ្លាប់មានទំនាក់ស្គាល់ម្ចាស់កសិដ្ឋានហើយតែប៉ុន្មានម៉ោងនៃការកើតហេតុបុរសនោះមានវត្តមាននៅទីនោះ ក៏ប៉ុន្តែស្នងការរងប៉ូលិសខេត្តរតនគិរី លោក សូវ៉ាន់ ខាំវ៉ាន់ មិនធ្វើអត្ថាធិប្បាយពិស្តារទាក់ទិនទៅនឹងការឃាត់ខ្លួនបុរសសង្ស័យនោះទេក្រោមហេតុផលថាកំពុងស៊ើបអង្កេត។
យ៉ាងនេះក្តីប្រភពស្និទ្ធនឹងគ្រួសារជនរងគ្រោះបង្ហើបឲ្យដឹងថា គ្រឿងអលង្ការជាមាសនិងផ្លាទីនជាង៧ដំឡឹងប្រាក់ប្រមាណ២៦លានរៀលត្រូវចោរប្លន់យកបាន។
នៅខេត្តរតនគិរីចាប់ពីថ្ងៃទីមួយនៃពិធីបុណ្យអុំទូកឆ្នាំនេះអំពើប្លន់កើតមាន៤ករណីផ្ទួនៗគ្នាក្នុងនោះប្លន់បាញ់យកម៉ូតូពីរគ្រឿងពីរករណី ប្លន់យកប្រាក់មួយករណីប្លន់បាញ់សម្លាប់មួយករណីនិងសកម្មភាពក្មេងស្ទាវប៉ុនប៉ងចាប់រំលោភស្ត្រីអ្នកទេសចរណ៍បរទេសមួយករណី ក្នុងនោះប៉ូលិសចាប់បានជនពាក់ព័ន្ធប្លន់ម៉ូតូបីនាក់និងរកឃើញម៉ូតូមួយគ្រឿងមកវិញ។
មន្ត្រីឃ្លាំមើលសិទ្ធិមនុស្សអង្គការអាដហុកខេត្តរតនគិរីអំពាវនាវឲ្យប្រជាពលរដ្ឋបង្កើនការប្រុងប្រយ័ត្នទុកដាក់ទ្រព្យសម្បត្តិលុយកាក់ដែលបានមកពីការប្រមូលផលសណ្តែកសៀងនារដូវប្រមូលផលនេះ៕