អគ្គនាយកនៃអគ្គនាយកដ្ឋានចម្ការកៅស៊ូលោក លី ផល្លា ប្រតិកម្ម ៖ «ដីហ្នឹងដីរបស់រដ្ឋទេតើ! សុំឲ្យនិយាយការពិត កុំបផ្លើស។ ដោយសារពិបាកគ្រប់គ្រងពេក ខេត្តស្នើឲ្យក្រសួងលុបទៅ ដើម្បីបង្កើតអាជីវកម្មវិញទៅ ព្រោះស្មុគស្មាញណាស់»។
ប្រតិកម្មនេះឆ្លើយតបភ្លាមៗទៅនឹងមនុស្សប្រមាណ ៨០នាក់ ដែលកាលពីថ្ងៃច័ន្ទដើមសប្តាហ៍នេះ បាននាំគ្នាធ្វើដំណើរពីខេត្តរតនគិរីមកកាន់រដ្ឋសភា ទីស្តីការគណៈរដ្ឋមន្ត្រីនិងក្រសួងយុត្តិធម៌ដើម្បីធ្វើការតវ៉ាចំពោះអ្វីដែលពួកគេអះអាងថា ចម្ការកៅស៊ូក្រុមសាមគ្គីគ្រួសាររបស់ពួកគេត្រូវបានក្រុមហ៊ុនតាយសេង ដែលវិនិយោគចម្ការកៅស៊ូរដ្ឋ ប្រើឧបាយកលរឹបអូសដើម្បីគ្រប់គ្រង។
អ្នកយកព័ត៌មានវិទ្យុអាស៊ីសេរីបានស្រង់សេចក្តីតវ៉ានិងការចោទប្រកាន់យ៉ាងដូច្នេះ ៖ «គាត់បានក្លែងឯកសារដើម្បីបំភ័ន្ត បោកប្រាស់អាជ្ញាធរយកកៅស៊ូគ្រួសារខ្ញុំដោយស្របច្បាប់»។
ប្រធានការិយាល័យបច្ចេកទេសក្រុមហ៊ុនតាយសេង លោក ឱម ណាន ឆ្លើយតបចំពោះការចោទប្រកាន់ដូច្នេះថា ៖ «ឆែ ចាន់ មិនមែនឈ្មោះប្រធានក្រុមសាមគ្គីទេ អ្នកនោះឯងមកទិញកៅស៊ូហ្នឹង រកតែចាប់កម្មករដាក់គុក ចំនួន២នាក់ទៀត»។
អាជ្ញាធរខេត្តរតនគិរីសម័យរដ្ឋកម្ពុជាបានសម្រេចរក្សាទុកចម្ការកៅស៊ូបន្សល់ទុកពីសម័យមុនជាសម្បត្តិរដ្ឋ ហើយបានប្រគល់សិទ្ធិឲ្យក្រុមសាមគ្គី ៣៤ក្រុម ផលិតជ័រលក់ឲ្យរដ្ឋ ហើយរហូតដល់ឆ្នាំ១៩៩៧ រដ្ឋាភិបាលបានវិនិយោគចម្ការកៅស៊ូរដ្ឋទាំងអស់ជិត ៣.០០០ហិកតារនៅខេត្តរតនគិរី ទៅឲ្យក្រុមហ៊ុនតាយសេង ក្នុងនោះរាប់បញ្ចូលក្រុមសាមគ្គីទាំង៣៤ក្រុម ក្នុងលក្ខខណ្ឌលក់ជ័រទៅឲ្យក្រុមហ៊ុនដែលមានភារកិច្ចបង់ពន្ធសម្រាប់ការវិនិយោគនេះ។
មន្ត្រីស៊ើបអង្កេតនៃអង្គការលីកាដូ លោក អំ សំអាត បញ្ចេញទស្សនៈជុំវិញបញ្ហានេះ ៖ «យើងលក់របស់រដ្ឋ អ្នកទិញក៏ខុស អាជ្ញាធរត្រូវតែធ្វើការស៊ើបអង្កេត ប៉ុន្តែប្រជាពលរដ្ឋដែលរងគ្រោះ ត្រូវតែមានដំណោះស្រាយសមរម្យសម្រាប់ពួកគាត់»។
មន្ត្រីគ្រប់គ្រងស្ថិតិចម្ការកៅស៊ូរដ្ឋខេត្តរតនគិរី នៃក្រសួងកសិកម្ម លោក ហែម សុផល បញ្ជាក់ថា ក្រុមសាមគ្គីត្រូវបានក្រសួងប្រកាសរំសាយនិងរៀបចំកម្មករជាមួយមេក្រុមសាមគ្គីជាភូមិផលិតក្រោមការគ្រប់គ្រងដោយក្រុមហ៊ុនវិញ។
រដ្ឋលេខាធិការទីស្តីការគណៈរដ្ឋមន្រ្តី លោក ប៊ុន អ៊ុយ បញ្ជាក់ ៖ «ស៊ីញ៉េនេះចេញពីក្រសួងកសិកម្មទៅសម្ដេច ហើយសម្ដេចលោកចារហើយ បានយកមកធ្វើ ស.ជ.ណ.វិញ»។
មន្រ្តីប៉ូលិសខេត្តរតនគិរីមានប្រសាសន៍ថា សមាជិកក្រុមសាមគ្គីបានគំរាមប្រើអំពើហិង្សាលើមន្រ្តីណាដែលចុះមករារំាងក្រុមសាមគ្គី ហើយកាលពីថ្ងៃទី១០ តុលា សមាជិកក្រុមសាមគ្គីប្រមាណ ៣០នាក់បានដុតកម្ទេចរថយន្តមួយគ្រឿងដែលពួកគេប៉ុនប៉ងបើកសម្រុកចេញពីការរារាំងរបស់សមត្ថកិច្ចនាំជ័រកៅស៊ូប្រមាណ ២តោនទៅលក់នៅទីផ្សារសេរី។ ហើយក្នុងករណីនេះ មេខ្លោងក្រុមសាមគ្គី៦នាក់ត្រូវបានតុលាការចោទប្រកាន់ពីបទប៉ុនប៉ងប្រព្រឹត្តអំពើមនុស្សឃាត បំផ្លាញទ្រព្យសម្បត្តិរដ្ឋនិងបង្កអសន្តិសុខតាមផ្លូវសាធារណៈ៕