ថ្លែងនៅក្នុងសាលាក្តីខ្មែរក្រហម កាលពីថ្ងៃអង្គារ ទី១ ខែកញ្ញាម្សិលមិញ លោក ទេព សុខ ដែលអះអាងថា ជាអតីតសិស្សផ្នែកគណិតវិទ្យារបស់ជនជាប់ចោទ កាំង ហ្កេកអ៊ាវ ហៅ ឌុច មួយរូបក្នុងចំណោម២រូប កាលពីចុងទសវត្សរ៍ឆ្នាំ១៩៦០ បានផ្តល់សក្ខីកម្មអំពីអត្តចរិតរបស់ជនជាប់ចោទ កាំង ហ្កេកអ៊ាវ ហៅ ឌុច ថា ៖ «នៅពេលដែលខ្ញុំដឹងថា លោក កាំង ហ្កេកអ៊ាវ ហៅ ឌុច ជាប្រធានស-២១ នៅពេលគេចាប់គាត់មកកាត់សេចក្ដីនៅពេលនេះ ខ្ញុំសោកស្ដាយជាខ្លាំងចំពោះគាត់ ដែលមានគុណធម៌ពីដើមមក ហើយក្លាយទៅជាជនឧក្រិដ្ឋទៅវិញ ខ្ញុំសោកស្ដាយខ្លាំង»។
នៅថ្ងៃដដែល លោក ជុំ ម៉ី ដែលជាអតីតអ្នកទោសនៅគុកទួលស្លែងមួយរូប និយាយថា លោកមិនអាចទទួលយកបានទេអំពីសក្ខីកម្មដែលផ្តល់ដោយអតីតមិត្តភ័ក្តិនិងកូនសិស្សរបស់ ឌុច ដែលថា ឌុច មានចរិតស្លូតបូតនោះ។
លោក ជុំ ម៉ី ថ្លែងយ៉ាងដូច្នេះ ៖ «មានតែសរសើរ ឌុច ហ្នឹង ពីរឿងបង្រៀនកូនសិស្សហ្នឹងបានល្អ ឌុច ចេះធ្វើសហករណ៍ ផ្ដល់សៀវភៅឲ្យកូនសិស្ស អ្នកទីទ័លក្រស្អីៗ សមមិនសម? ហើយយកអាហ្នឹងមកលុបលាងប្រជាជន ១៦.០០០នាក់នៅទួលស្លែងបាន ឬមិនបាន? ខ្ញុំមិនអាចទទួលយកបានទេ។ ឌុច ស្លូតបូត? ឬក៏សាក្សីដាក់បន្ទុកទៅលើ ឌុច វាស្លូតបូតពេក? ស្លូតបូតហើយ អស់ ១៦.០០០នាក់ ស្លូតបូតយ៉ាងម៉េច? អ៊ីចឹងបានស្ដាយ បើសិនណាបើកសិទ្ធិឲ្យមេធាវីខ្ញុំសួរសាក្សីដែលមកបំភ្លឺអត្តចរិត ឌុច ហ្នឹង ឲ្យមេធាវីខ្ញុំសួរតែមួយម៉ាត់ពីរម៉ាត់ ខ្ញុំអស់ចិត្តហើយ»។
គួររំឭកថា នៅក្នុងសាលាក្តីខ្មែរក្រហម កន្លងមកនេះ ជនជាប់ចោទ កាំង ហ្កេកអ៊ាវ ហៅ ឌុច អតីតមេគុកមន្ទីរស-២១ ឬគុកទួលស្លែងនៃរបបខ្មែរក្រហម តែងសម្តែងការសោកស្តាយនូវទង្វើនិងការទទួលខុសត្រូវរបស់ខ្លូនចំពោះការដឹកនាំការធ្វើទារុណកម្មនិងការសម្លាប់មនុស្សនៅគុកទួលស្លែងប្រមាណពី១ម៉ឺន៤ពាន់នាក់ ទៅ ២ម៉ឺននាក់៕