លោក សម រង្ស៊ី ជាមេដឹកនាំគណបក្សប្រឆាំងនៅក្នុងប្រទេសកម្ពុជា បានមានប្រសាសន៍តាមទូរស័ព្ទពីប្រទេសបារាំងមកថា ៖ «បញ្ហាបាត់បង់ដីធ្លី ស្រែចម្ការ ផ្ទះសម្បែងដោយសារការរឹបអូសពីសំណាក់អ្នកមានអំណាច អ្នកមានលុយ ហើយថ្មីៗនេះខ្ញុំបានធ្វើជាសាក្សីដោយសារការរឹបអូសពីអាជ្ញាធរនៃប្រទេសជិតខាងនៅតាមព្រំប្រទល់ដែន ពិសេសព្រំដែនជាមួយប្រទេសវៀតណាម។ ខ្ញុំមានជំនឿថា អាចនឹងជួយ ពីព្រោះថា ទ្វីបអឺរ៉ុប សភាអឺរ៉ុប មានឥទ្ធិពលខ្លាំងណាស់»។
លោក ទិត សុធា ជាមន្រ្តីទីប្រឹក្សារបស់រដ្ឋាភិបាលកម្ពុជា និងជាក្រុមអ្នកនាំពាក្យអង្គភាពប្រតិកម្មព័ត៌មានរបស់ទីស្តីការគណៈរដ្ឋមន្រ្តីប្រទេសកម្ពុជា បានមានប្រសាសន៍ថា នោះជាចេតនានិងទង្វើមួយដើម្បីបំភាន់មតិជាតិនិងអន្តរជាតិនៅទីនោះ។
លោក ទិត សុធា មានប្រសាសន៍ដូច្នេះថា ៖ «រាល់ការលើកឡើងរបស់ឯកឧត្ដម សម រង្ស៊ី គ្រោងនឹងលើកនៅក្នុងកិច្ចប្រជុំសភាអឺរ៉ុបហ្នឹង យើងដឹងហើយថា អ្វីដែលលោក សម រង្ស៊ី ធ្វើ គឺបានរំលោភច្បាប់ ដូច្នេះគឺជាការបំប៉ោងព័ត៌មានមិនពិតមួយប្រាប់សហគមន៍អឺរ៉ុប ទទួលយកព័ត៌មានមិនពិតដែលមិនមានភាពសុចរិត»។
កិច្ចប្រជុំសភានៃសហភាពអឺរ៉ុបនោះ នឹងប្រព្រឹត្តទៅរយៈពេលមួយថៃ្ងនៅក្នុងទីក្រុងប្រុស្សែល (Brussels) ប្រទេសប៊ែលហ្សិក ដែលមានតំណាងអង្គការការពារសិទ្ធិមនុស្សនៅក្នុងប្រទេសកម្ពុជាមួយចំនួននឹងចូលរួមផង។ សភានៃសហភាពអឺរ៉ុបនោះ មានប្រទេសចំនួន២៧ជាសមាជិកនឹងចូលរួម។
ក្រុមអង្គការសង្គមស៊ីវិលចំនួន៤ នៅថៃ្ងអង្គារ ទី១៧ ខែវិច្ឆិកានេះ បានចេញសេចក្តីថែ្លងការណ៍មួយ ថ្កោលទោសការលើកអភ័យឯកសិទ្ធិតំណាងរាស្រ្តរបស់លោក សម រង្ស៊ី ដោយបានរិះគន់ថា នោះគឺជាការបន្តប្រើប្រាស់តុលាការដើម្បីបំភិតបំភ័យ និងធ្វើឲ្យចុះខ្សោយនៃក្រុមអ្នកនយោបាយប្រឆាំងនៅកម្ពុជា។ អង្គការទាំង៤នោះរួមមាន មជ្ឈមណ្ឌលសិទ្ធិមនុស្សកម្ពុជា មណ្ឌលអប់រំច្បាប់សហគមន៍ អង្គការឃ្លាំមើលការបោះឆ្នោតដោយសេរី និងអព្យាក្រឹតនៅកម្ពុជា ឬនិចហ្វិក និងអង្គការការពារសិទ្ធិមនុស្សក្រៅរដ្ឋាភិបាលលីកាដូ។
លោក សម រង្ស៊ី ជាមេដឹកនាំបក្សប្រឆាំងធំជាងគេនៅកម្ពុជា បានរងការលើកអភ័យឯកសិទ្ធិជាតំណាងរាស្រ្តកាលពីថៃ្ងទី១៦ ខែវិច្ឆិកាថ្មីៗនេះ ដើម្បីប្រឈមមុខនឹងការកោះហៅសួរចម្លើយ និងចោទប្រកាន់ក្រោមបទព្រហ្មទណ្ឌបំផ្លាញទ្រព្យសម្បតិ្តសាធារណៈ។ លោកបានរងការប្តឹងចោទថា ដកបង្គោលតម្រុយព្រំដែនចំនួន៦បង្គោល រវាងកម្ពុជានិងវៀតណាម នៅក្នុងឃុំសំរោង ស្រុកចន្រ្ទា ខេត្តស្វាយរៀង កាលពីថៃ្ងទី២៥ ខែតុលា កន្លងទៅនេះ។
រដ្ឋមន្រ្តីក្រសួងយុត្តិធម៌លោក អង្គវង្ស វឌ្ឍានា បានប្រកាសឲ្យដឹងកាលពីថៃ្ងច័ន្ទ (១៦ វិច្ឆិកា) ថ្មីៗនេះថា តុលាការខេត្តស្វាយរៀង គ្រោងនឹងចេញដីកាកោះហៅលោក សម រង្ស៊ី មកសាកសួរនាពេលឆាប់ៗនេះ ក្នុងការស៊ើបអង្កេតនិងចោទប្រកាន់៕