ប្រធានគណបក្សប្រឆាំង លោក សម រង្ស៊ី នៅថ្ងៃទី២ ខែវិច្ឆិកា បានថ្លែងទៅកាន់សមាជិកសមាជិកាគណបក្ស សម រង្ស៊ី ប្រមាណ ១ពាន់នាក់ពីប្រទេសបារាំង តាមសារអេឡិចត្រូនិក នៅក្នុងឱកាសពិធីខួចគម្រប់ខួប ១៥ឆ្នាំ នៃថ្ងៃបង្កើតគណបក្សរបស់ខ្លួនថា លោកនឹងវិលមកប្រទេសកម្ពុជាវិញ នៅមុនពេលបោះឆ្នោតជ្រើសរើសក្រុមប្រឹក្សាឃុំសង្កាត់ ខាងមុខនេះ។
លោក សម រង្ស៊ី បានមានប្រសាសន៍ថា សភាសហភាពអឺរ៉ុបប្រមាណ ២០០នាក់ តំណាងឲ្យចំនួន ២៧ប្រទេស បានធ្វើញត្តិគាំទ្រលោក ហើយគេនឹងធ្វើអន្តរាគមន៍មកលើរដ្ឋាភិបាលកម្ពុជា ដើម្បីឲ្យលោកត្រឡប់មកកម្ពុជា បំពេញតួនាទីដឹកនាំគណបក្សប្រឆាំងវិញ នៅពេលឆាប់ៗនេះ។
លោកមានប្រសាសន៍បន្ថែមថា ៖ «គេគាំទ្រជាឯកច្ឆន្ទ សេចក្ដីសម្រេចរបស់ពួកគេមួយ ថា សុំឲ្យសហភាពអឺរ៉ុបធ្វើអន្តរាគមន៍លើប្រទេសកម្ពុជា។ សេចក្ដីសម្រេចគេនេះមានឈ្មោះថា សេចក្ដីសម្រេចទាក់ទងទៅនឹងប្រទេសកម្ពុជា និងករណី សម រង្ស៊ី»។
ទោះជាមានការអះអាងពីមេដឹកនាំគណបក្សប្រឆាំង ដែលចង់វិលមកកម្ពុជាវិញនេះក្តី មន្ត្រីនាំពាក្យនៃទីស្ដីការគណៈរដ្ឋមន្ត្រី លោក ផៃ ស៊ីផាន ពុំមានការភ្ញាក់ផ្អើលអ្វីទេ ដោយលោកបានបញ្ជាក់ថា ករណីលោក សម រង្ស៊ី គឺជារឿងឆន្ទានុសិទ្ធិរបស់តុលាការ ហើយប្រទេសកម្ពុជា ជាប្រទេសប្រជាធិបតេយ្យ ដូច្នេះគ្មានប្រទេសណាលូកដៃមកលើតុលាការកម្ពុជាបានទេ។
លោក ផៃ ស៊ីផាន បន្តថា ៖ «ដូច្នេះលទ្ធិប្រជាធិបតេយ្យយកច្បាប់ជាធំ យកតុលាការជាធំ ដូច្នេះគ្មានប្រទេសណាមួយបម្រើគោលបំណងរបស់អ្នកណាមួយទេ»។
កាលពីល្ងាចថ្ងៃទី១ ខែវិច្ឆិកា នៅក្នុងដំណើរទស្សនកិច្ចរបស់លោកស្រីរដ្ឋមន្រ្តីក្រសួងការបរទេសអាមរិក ហ៊ីលឡារី គ្លិនតុន (Hillary Clinton) មកកម្ពុជា តំណាងរាស្រ្តគណបក្ស សម រង្ស៊ី បានទៅជួបលោកស្រី ដើម្បីស្នើសុំឲ្យលោក សម រង្ស៊ី ចូលស្រុកវិញផងដែរ។
លោក យឹម សុវណ្ណ បានបញ្ជាក់ថា លោកស្រី ហ៊ីលឡារី គ្លិនតុន បានឆ្លើយតបវិញថា លោកស្រីនឹងពិនិត្យមើលលើករណីលោក សម រង្ស៊ី ពីព្រោះប្រទេសកាន់របបប្រជាធិបតេយ្យ មិនអាចអវត្តមានមេដឹកនាំគណបក្សប្រឆាំងក្នុងការប្រកួតប្រជែងបោះឆ្នោតបានទេ។
កាលពីថ្ងៃទី២១ ខែតុលា កន្លងទៅ សភាសហភាពអឺរ៉ុប បានអនុម័តសេចក្ដីសម្រេចរបស់ខ្លួនចំពោះករណីលោក សម រង្ស៊ី ដោយស្នើឲ្យរដ្ឋាភិបាលកម្ពុជា ប្រគល់អភ័យឯកសិទ្ធិឲ្យលោក សម រង្ស៊ី ឡើងវិញ ដើម្បីឲ្យលោកអាចវិលទៅកម្ពុជា ចូលរួមការបោះឆ្នោតឃុំសង្កាត់ ឆ្នាំ២០១២ និងការបោះឆ្នោតសកលនៅឆ្នាំ២០១៣។
ការស្នើសុំនេះ ដោយសារតែលោក សម រង្ស៊ី ត្រូវបានតុលាការកម្ពុជា ចោទប្រកាន់ជាច្រើនករណី ហើយបានកាត់ទោសឲ្យលោកជាប់គុកចំនួន ១២ឆ្នាំ។
តំណាងរាស្ត្រមួយចំនួននៃសភាសហភាពអឺរ៉ុប បានចោទប្រកាន់តុលាការកម្ពុជាថា ការកាត់ទោសមេបក្សប្រឆាំងឲ្យជាប់គុករយៈពេល ១២ឆ្នាំនេះ ជាករណីនយោបាយសុទ្ធសាធ ហើយការកាត់ទោសនេះនឹងរារាំងមិនឲ្យលោក សម រង្ស៊ី ចូលរួមការបោះឆ្នោតសកលនៅឆ្នាំ២០១៣ ដែលអាចបណ្ដាលឲ្យគ្រោះថ្នាក់ដល់ដំណើរការនៃលទ្ធិប្រជាធិបតេយ្យនៅកម្ពុជា៕