រដ្ឋមន្ត្រីក្រសួងមហាផ្ទៃ លោក ស ខេង និងជាឧបនាយករដ្ឋមន្ត្រី នៅថ្ងៃទី២១ ខែកុម្ភៈ ឆ្នាំ២០១២ បានបញ្ជាឲ្យស្នងការនគរបាលនៅទូទាំងប្រទេសកម្ពុជា និងអគ្គស្នងការនគរបាលជាតិ មិនអនុញ្ញាតឲ្យកងកម្លាំងនគរបាលជាតិប្រើប្រាស់អាវុធនៅពេលដែលចុះទៅបង្ក្រាបកម្មកររោងចក្រ និងប្រជាពលរដ្ឋតវ៉ាទាមទារដីនោះទេ នៅថ្ងៃអនាគត ដើម្បីជៀសវាងការបាញ់សម្លាប់ ឬបង្ករបួសស្នាមធ្ងន់ធ្ងរដល់អ្នកតវ៉ាទាំងនោះ។
ការប្រើដំបងឆក់ និងខែលការពារខ្លួន ត្រូវបានអនុញ្ញាតឲ្យប្រើប្រាស់នៅពេលដែលចុះទៅបង្ក្រាបការតវ៉ាទាមទារដីធ្លី និងបាតុកម្មរបស់កម្មកររោងចក្រ។
បទបញ្ជានេះបានធ្វើឡើងដោយផ្ទាល់មាត់ចំពោះមុខអភិបាលខេត្តនានា ស្នងការនគរបាលខេត្ត និងអគ្គស្នងការនគរបាលជាតិ លោកនាយឧត្ដមសេនីយ៍ នេត សាវឿន នៅក្នុងសន្និបាតបូកសរុបស្ថានការណ៍សន្តិសុខឆ្នាំ២០១១ និងលើកទិសដៅសំរាប់ឆ្នាំ២០១២ នៅឯក្រសួងមហាផ្ទៃ នៅថ្ងៃទី២១ ខែកុម្ភៈ ឆ្នាំ២០១២។
លោក ស ខេង បានមានប្រសាសន៍ថា អាជ្ញាធរនគរបាលត្រូវតែស្វែងរកការពិតនៃឫសគល់នៃអំពើហិង្សាដែលបានផ្ទុះឡើង គឺមិនត្រូវកាន់ជើងភាគីក្រុមហ៊ុន ឬភាគីប្រជាពលរដ្ឋទេ។ អាជ្ញាធរនគរបាលត្រូវតែប្រកាន់ជំហរអព្យាក្រឹត ឬអាជ្ញាកណ្ដាល មិនត្រូវការពារក្រុមហ៊ុនដើម្បីលាភសក្ការៈនោះទេ។
លោក ស ខេង៖ «ប៉ុន្តែជាបឋម ទោះជាយ៉ាងណាក៏ដោយ យើងឈរលើផលប្រយោជន៍របស់ប្រជាពលរដ្ឋជាមុន ហើយយើងក៏មានគោលនយោបាយដើម្បីគាំទ្រការវិនិយោគទាំងឡាយផងដែរ។ យើងឈរលើសច្ចភាពមួយច្បាស់លាស់ តម្លាភាព។ យើងមានកាតព្វកិច្ចរក្សាសន្តិសុខ សណ្ដាប់ធ្នាប់សាធារណៈ តែយើងគ្មានសិទ្ធិបាញ់លើប្រជាជនទេ អាហ្នឹងសុំអស់លោកអភិបាលខេត្តស្ដាប់អាហ្នឹងឲ្យច្បាស់។ ទាំងគេ ទាំងយើង ឧបមាថា គេបាញ់យើងវិញ តើយើងវេទនាយ៉ាងណា យើងពិបាកប៉ុណ្ណា ក្នុងកំហុសតិចតួចដែលមិនសមថា គេបាញ់នោះ?»។
ប្រធានសហភាពការងារកម្ពុជា លោក អាត់ ធន បានមានប្រសាសន៍ថា លោកសាទរនឹងបទបញ្ជានេះ ដោយលោកសុំឲ្យនគរបាលនៅថ្នាក់មូលដ្ឋានអនុវត្តបទបញ្ជានេះឲ្យមានប្រសិទ្ធភាព៖ «យើងសុំកុំឲ្យមានការបង្ក្រាបនៅពេលដែលមានការធ្វើកូដកម្មដោយសន្តិវិធី អាហ្នឹងទី១។ ទី២ អាជ្ញាធរហ្នឹងត្រូវឈរនៅកណ្ដាលក្នុងការការពារសុវត្ថិភាព មិនលំអៀងទៅដល់ភាគីណាមួយ ជាពិសេសជាទូទៅគឺលំអៀងទៅលើនិយោជក នៅពេលគេឲ្យលុយថ្លៃបាយថ្លៃទឹកថ្លៃអីចឹងទៅ គឺចាប់ផ្ដើមលំអៀងទៅភាគីនិយោជកហើយ»។
សេចក្ដីព្រមានរបស់រដ្ឋមន្ត្រីក្រសួងមហាផ្ទៃ លោក ស ខេង នៅថ្ងៃទី២១ ខែកុម្ភៈ ឆ្នាំ២០១២ គឺក្រោយពេលដែលមានការបង្ក្រាបដោយហិង្សា និងបាញ់កម្មការិនីធ្វើកូដកម្មដោយសន្តិវិធីនោះ ឲ្យរងរបួសធ្ងន់ចំនួន ៣នាក់ នៅខេត្តស្វាយរៀង នៅថ្ងៃទី២០ ខែកុម្ភៈ ឆ្នាំ២០១២ ថ្មីៗនេះ។
ស្របពេលនេះដែលសហភាពការងារកម្ពុជា បានចេញសេចក្ដីថ្លែងការណ៍ថ្កោលទោសសុំឲ្យអាជ្ញាធរនគរបាលចាប់ខ្លួនជនល្មើស និងបានថ្កោលទោសការបាញ់ប្រហារនោះថា ជាអំពើកាចហាវ៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។