ប្រទេសឥណ្ឌូនេស៊ី បានបិទការប្រកួតកីឡាស៊ីហ្គេម លើកទី២៦ របស់ខ្លួនជាស្ថាពររួចហើយ កាលពីទី២២ ខែវិច្ឆិកា។ ការប្រកួតនេះបានចាប់ផ្ដើមពីថ្ងៃទី១១ ខែវិច្ឆិកា ឆ្នាំ២០១១។
លោក ថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការជាតិអូឡាំពិកកម្ពុជា។ លោកមានប្រសាសន៍នៅថ្ងៃទី២៣ ខែវិច្ឆិកា ថា ស៊ីហ្គេមឆ្នាំនេះកីឡាករកម្ពុជា ទទួលបានមេដាយសរុបចំនួន ៥០ គឺមេដាយមាស ៨ ប្រាក់ចំនួន ១៧ និងសំរឹទ្ធចំនួន ២៥មេដាយ។
លោក ថោង ខុន ឲ្យដឹងបន្ថែមដូច្នេះ៖ «យើងបានមេដាយទាំងអស់ចំនួន ៥០មេដាយ គឺកើនលើសឆ្នាំ២០០៩ នៅប្រទេសឡាវ ទីក្រុងវៀងចាន់ ១០មេដាយ។ មេដាយមាសបានចំនួន ៨ កើនលើស ៥។ មេដាយប្រាក់ចំនួន ១៧ កើនលើស ៧ និងមេដាយសំរឹទ្ធទទួលបាន ២៥មេដាយ»។
ទោះយ៉ាងណា ចំនួនមេដាយដែលលោក ថោង ខុន បានអះអាង គឺខុសគ្នាទៅនឹងតារាងចំណាត់ថ្នាក់នៃការប្រកួតកីឡាស៊ីហ្គេម របស់ឥណ្ឌូនេស៊ី ដែលបង្ហាញក្នុងវ៉ឹបសាយ ដែលថា កម្ពុជាទទួលបានមេដាយចំនួន៣៩។ មេដាយមាស ៤ ប្រាក់ ១១ និងសំរឹទ្ធចំនួន ២៤។
ការប្រកួតកីឡាស៊ីហ្គេមឆ្នាំនេះ កម្ពុជាបានបញ្ជូនកីឡាករចំនួន ១៦៣នាក់ ទៅចូលរួមប្រកួតលើប្រភេទកីឡាចំនួន ២០ប្រភេទ និងឈ្នះលើវិញ្ញាសាចំនួន៩។ វិញ្ញាសាទាំងនេះរួមមាន កីឡាយូដូ ចំបាប់ ប្រដាល់ វាយកូនបាល់ វូស៊ូ វ៉ូវីណាម សូរីងហ្ស៊ី-ខេមប៉ូ ប៉េតង់ និងតេក្វាន់ដូ។
លោក តែម ម៉ឺន ជាប្រធានសហព័ន្ធកីឡាប្រដាល់កម្ពុជាស្ម័គ្រចិត្ត។ លោកមានប្រសាសន៍ថា ការប្រកួតកីឡាស៊ីហ្គេមលើកទី២៦ នៅឥណ្ឌូនេស៊ី សហព័ន្ធលោកបានបញ្ជូនកីឡាករទៅប្រកួតចំនួន ៦នាក់ ដោយទទួលបានមេដាយសំរឹទ្ធចំនួន ៣ ក្នុងប្រភេទទម្ងន់ ៨១គីឡូក្រាម ៧៥គីឡូក្រាម និង៦៤គីឡូក្រាម។ លោកមានជំនឿថា កីឡាប្រដាល់កម្ពុជា នឹងរីកចម្រើនទៅថ្ងៃអនាគត ព្រោះបើពិនិត្យលើសន្ទុះកីឡាប្រដាល់សព្វថ្ងៃនេះមានការរីកចម្រើនទាំងកម្លាំង និងបច្ចេកទេសជាបន្តបន្ទាប់។
ប្រទេសកម្ពុជា បានបង្កើតឲ្យមានអនុក្រឹត្យមួយ ដើម្បីផ្ដល់រង្វាន់ដល់កីឡាករ ដែលប្រកួតឈ្នះបានមេដាយមាស ប្រាក់ ឬសំរឹទ្ធ ក្នុងការប្រកួតកីឡាស៊ីហ្គេម។ ក្នុងនោះមេដាយមាស១ ទទួលបានថវិកាចំនួន ៦ពាន់ដុល្លារ។ មេដាយប្រាក់ទទួលបាន ៤ពាន់ដុល្លារ និងមេដាយសំរឹទ្ធទទួលបានថវិកា ២ពាន់ដុល្លារ។
ទាក់ទងបញ្ហានេះ លោកនាយករដ្ឋមន្ត្រី ហ៊ុន សែន បានប្រកាសផ្ដល់ប្រាក់ឧបត្ថម្ភបន្ថែមទៅលើកីឡាករដែលទទួលបានមេដាយមាស ប្រាក់ និងសំរឹទ្ធ ក្នុងរង្វង់ទឹកប្រាក់ចាប់ពី ១ពាន់ដុល្លារ ដល់ ៣ពាន់ដុល្លារសម្រាប់កីឡាករម្នាក់។
លោកមានប្រសាសន៍ដូច្នេះក្នុងវេទិកាលើកទី១៦ រវាងរដ្ឋាភិបាល និងផ្នែកឯកជន នាវិមានសន្តិភាព ព្រឹកថ្ងៃទី២៣ ខែវិច្ឆិកា ឆ្នាំ២០១១៖ «ខ្ញុំថា បើសិនជាក្មួយៗទៅប្រកួតទទួលបានមេដាយមាស ខ្ញុំផ្ដល់ជូនមេដាយមាស ៣ពាន់ដុល្លារ។ មេដាយប្រាក់ ២ពាន់ដុល្លារ និងសំរឹទ្ធ ១ពាន់ដុល្លារអាមេរិក»។
តារាងចំណាត់ថ្នាក់ចំនួនមេដាយនៃការប្រកួតកីឡាស៊ីហ្គេម លើកទី២៦ នៅឥណ្ឌូនេស៊ី ដែលវិទ្យុអាស៊ីសេរីទទួលបានតាមវ៉ឹបសាយ បានបង្ហាញថា ប្រទេសឥណ្ឌូនេស៊ី ឈរក្នុងលំដាប់លេខ១ ទទួលបានមេដាយសរុបចំនួន ៤៧៦ (មេដាយមាស ១៨២ ប្រាក់១៥១ និងសំរឹទ្ធ ១៤៣)។ ប្រទេសថៃ លំដាប់ទី២ ទទួលបានមេដាយចំនួន ៣២៩ (មេដាយមាស ១០៧ ប្រាក់ ១០០ និងសំរឹទ្ធ ១២០) និងប្រទេសវៀតណាម ជាប់លំដាប់ទី៣ ទទួលបានមេដាយសរុបចំនួន ២៨៨ (មេដាយមាស ៩៦ មេដាយប្រាក់ ៩២ និងមេដាយសំរឹទ្ធ ១០០)៕