ស្ថានភាពសន្តិសុខក្នុងឱកាសព្រះរាជពិធីបុណ្យអុំទូក
ដោយ ហ្សាការីយ៉ា
2009-11-03
មន្រ្តីនាំពាក្យនៃក្រសួងមហាផ្ទៃបានថ្លែងឲ្យដឹងនៅថ្ងៃ៣ វិច្ឆិកា ថា ស្ថានភាពសន្តិសុខក្នុងឱកាសព្រះរាជពិធីបុណ្យអុំទូក សំពះព្រះខែនិងអកអំបុក រយៈពេល៣ថ្ងៃកន្លងមក គឺមានលក្ខណៈប្រសើរជាងឆ្នាំមុនៗ បើទោះបីជាមានឧប្បត្តិហេតុកើតឡើងបន្តិចបន្តួចក្តី។
០១-វិច្ឆិកា-០៩: សមត្ថកិច្ចប៉ូលិសនិងប៉េអឹមឈរការពារសន្តិសុខដល់ក្រុមឥស្សរជនជាន់ខ្ពស់ខ្មែរដែលចូលរួមក្នុងពិធីបុណ្យអុំទូកនៅរាជធានីភ្នំពេញ។
លោក ខៀវ សុភ័គ មន្រ្តីនាំពាក្យក្រសួងមហាផ្ទៃមានប្រសាសន៍ថា ទាំងសន្តិសុខសាធារណៈនិងចរាចរណ៍មានលក្ខណៈល្អប្រសើរជាងឆ្នាំមុន។
លោក ខៀវ សុភ័គ មានប្រសាសន៍ដូច្នេះ ៖ «គ្មានភេវរកម្ម គ្មានការបង្កៃគ្រាប់បែក គ្មានអត្តឃាតអីដូចប្រទេសគេទេស្រុកយើង ល្អប្រសើរមែនទែន»។
លោក ខៀវ សុភ័គ បានឲ្យដឹងទៀតថា នៅថ្ងៃទី២នៃពិធីបុណ្យអុំទូក គឺមានគ្រោះថ្នាក់លិចទូកង បាត់ខ្លួនកីឡាករម្នាក់និងករណីតួចៗមួយចំនួន ដូចករណីចោរឆក់ខ្សែក ខ្សែដៃជាដើម ប៉ុន្តែខាងសមត្ថកិច្ចបានបង្រ្កាបទាន់ពេលវេលា។ លោកបានបន្ថែមថា លោកមិនទាន់ធ្វើរបាយការណ៍សរុបថា តើគ្រោះថ្នាក់ចរាចរណ៍ និងការឆក់ខ្សែក ខ្សែដៃមានប៉ុន្មានករណីនោះទេ។
លោក ខៀវ សុភ័គ មានប្រសាសន៍បន្ថែមដូច្នេះ ៖ «វាមានបន្តិចបន្តួច យើងមិនចង់ឲ្យមានសោះ យើងមិនអាចធ្វើបាន វាមានបាត់នេះបាត់នោះ បាត់កាបូប»។
លោក ចាន់ សុវ៉េត មន្រ្តីស៊ើបអង្កេតអង្គការសិទ្ធិមនុស្សអាដហុក បានបញ្ជាក់ដែរថា នៅក្នុងព្រឹត្តិការណ៍ពិធីបុណ្យអុំទូកឆ្នាំនេះ ចំពោះសន្តិសុខសាធារណៈមានលក្ខណៈល្អប្រសើរ ប៉ុន្តែលោកបន្ថែមថា ចំពោះបញ្ហាគ្រោះថ្នាក់ចរាចរណ៍គឺនៅតែកើតមាននៅឡើយ ដោយសារតែពលរដ្ឋមិនសូវបានយល់ដឹងអំពីច្បាប់ចរាចរណ៍ច្បាស់លាស់នៅឡើយ ពិសេសអ្នកពីតាមបណ្តាខេត្ត។
លោក ចាន់ សុវ៉េត មានប្រសាសន៍ថា ៖ «ឃើញកើតមានគ្រោះថ្នាក់ចរាចរណ៍ ថ្វីត្បិតតែមានការការពារអ៊ីចឹងក៏ដោយ ក៏យើងឃើញថា ច្រកចូលមកទីក្រុងភ្នំពេញនេះ មានវិបត្តិចរាចរណ៍ច្រើន»។
លោក ចាន់ សុវ៉េត បានបន្ថែមថា ថ្វីត្បិតតែពិធីបុណ្យអុំទូកបានប្រព្រឹត្តទៅដោយរលូនក៏ពិតមែន លោកកត់សម្គាល់ឃើញថា ប្រជាពលរដ្ឋមកចូលរួមក្នុងឆ្នាំនេះមានតិចជាងមុន ប៉ុន្តែលោកក៏មិនបានដឹងដែរថា តើមកពីមូលហេតុប្រជាពលរដ្ឋជួបនឹងវិបត្តិសេដ្ឋកិច្ច ឬយ៉ាងណានោះទេ?
លោក ចាន់ សុវ៉េត មានប្រសាសន៍បន្ថែមដូច្នេះ ៖ «យើងឃើញឆ្នាំកន្លងទៅប្រជាជនមកច្រើន គិតទៅប្រហែលជាជាងលាននាក់ ដល់ពេលឥឡូវយើងគិតថា លាននាក់ស្ទើរតែមិនបានទេតាមមើល ក្នុងមួយយប់ៗ។ អ្វីដែលជាការកត់សម្គាល់មួយទៀត យើងឃើញថា ការមិនសូវកកស្ទះនោះមិនមានការចូលរួមច្រើន»។
លោក ទូច ណារ៉ុថ ស្នងការនគរបាលរាជធានីភ្នំពេញ បានឲ្យដឹងកាលពីថ្ងៃទី២ វិច្ឆិកា ថា ក្រុមសមត្ថកិច្ចចម្រុះសរុបមានជាង៦.០០០នាក់ សម្រាប់ការពារសន្តិសុខនិងសណ្តាប់ធ្នាប់សាធារណៈ។ ក្នុងនោះមានកាណូតលឿន ឬអូប័រ ចំនួន១៦គ្រឿង និងកងអន្តរាគមន៍សង្រ្គោះបន្ទាន់ប្រមាណ២០០នាក់។
ក្រៅពីកងកម្លាំងសមត្ថកិច្ចរៀបចំសណ្តាប់ធ្នាប់ និងការពារសន្តិសុខ គេសង្កេតឃើញថា មានអង្គការមួយចំនួនបានផ្សព្វផ្សាយអំពីការការពារនៃការឆ្លងជំងឺផ្តាសាយប្រភេទថ្មី A(H1N1) ផ្តាសាយបក្សី និងជំងឺអេដស៍ ដូចជាការចែកស្រោមអនាម័យជាដើម៕
អត្ថបទដែលទាក់ទង
អតីតប្រធានាធិបតីអាមេរិកសម្ពោធផ្ទះសម្រាប់ជនក្រីក្រនៅខែត្រកណ្ដាល
ទីតាំងផលិតប្រេងម្រះព្រៅភ្នំ២កន្លែងនៅពោធិ៍សាត់ត្រូវបានកម្ទេច
គណៈកម្មការខ្មែរម្ចាស់ស្រុកនឹងរៀបចំកិច្ចប្រជុំស្ដីពីបញ្ហានៅកម្ពុជា
អាជ្ញាធរខេត្តឧត្ដរមានជ័យរារាំងរថយន្តដឹកព្រះពុទ្ធបដិមារបស់ម៉មសូណង់ដូ
ប្រជានេសាទប្រតិកម្មចំពោះការកំណត់ប្រភេទឧបករណ៍នេសាទ
បញ្ហាធូលីហុយនៅតាមផ្លូវជាតិលេខ៣ប៉ះពាល់ដល់សុខភាពអ្នកស្រុក
ពលរដ្ឋនៅព្រៃវែងត្អូញពីបញ្ហាសមត្ថកិច្ចស្ទាក់ទារប្រាក់តាមផ្លូវ
ក្រសួងសុខាភិបាលបារម្ភចំពោះការចរាចរឱសថក្លែងក្លាយ
អ្នកភូមិនៅខេត្តកណ្ដាលនិងកំពង់ស្ពឺបារម្ភពីបញ្ហាសុខភាព
សមាជិកអាស៊ានប្រជុំគ្នារកវិធានការប្រឆាំងឧក្រិដ្ឋកម្មឆ្លងដែន
មតិ
អ្នកអាចបញ្ចេញមតិដោយបំពេញទម្រង់ខាងក្រោមនេះក្នុងទម្រង់ជាអក្សរសុទ្ធ។. មតិត្រូវតែអនុញ្ញាតដោយអ្នកសម្របសម្រួលនិងមិនបង្ហាញភ្លាមៗនៅលើទំព័រនេះទេ។ សូមអញ្ជើញត្រឡប់មកបើកទំព័រនេះម្ដងទៀតដើម្បីមើលថាតើមតិរបស់អ្នកត្រូវបានចុះផ្សាយឬអត់។
I think the boat sponsor should not put their name as the boat name. Some of the TV announcer, they forget to mention the origin of the boat, where they come from, just say the name of its sponsor. I think doing this lose tradtional image and value of Water Festival and it brings bad habit to the next generation. It should mention the original boat name and the name of the sponsor, no need to put their name as boat name.
2009-11-04 20:06
មើលមតិទាំងអស់.