សមាជិកព្រឹទ្ធសភាទាំងអស់មានចំនួន ៦១រូប ដែលភាគច្រើនមកពីគណបក្សកំពុងកាន់អំណាច។
សមាជិកព្រឹទ្ធសភាខាងគណបក្សប្រឆាំងសមរង្ស៊ី លោក គង់ គាំ និងជាអនុប្រធានគណបក្សសមរង្ស៊ី ដែលមិនបានលើកដៃគាំទ្រអនុម័តលើសេចក្ដីព្រាងច្បាប់នោះ បានមានប្រសាសន៍បញ្ជាក់ប្រាប់វិទ្យុអាស៊ីសេរី នៅថ្ងៃសៅរ៍ ទី២០ មីនានេះថា ព្រឹទ្ធសភាបានសម្រេចអនុម័តក្នុងរយៈពេលតែមួយថ្ងៃប៉ុណ្ណោះ មិនបានពិភាក្សាយូរទេ។
លោក គង់ គាំ មានប្រសាសន៍ដូច្នេះ ៖ «អត់បន្តទេ គឺថា កាលពីព្រឹកថ្ងៃ១៩ ហ្នឹងមួយព្រឹក ព្រឹទ្ធសភាបានអនុម័តចប់ច្បាប់ប្រឆាំងអំពើពុករលួយហ្នឹងហើយ។ ប្រឆាំងមានតែមួយសំឡេងគឺខ្លួនខ្ញុំ ចំណែកឯព្រឹទ្ធសភាហ្នឹង គ្រាន់តែសភាដែលធ្វើត ធ្វើតាមរដ្ឋសភាភាគច្រើនមិនមានអីប្រែប្រួលទេ»។
លោក នី ចរិយា ប្រធានក្រុមស៊ើបអង្កេតនៃអង្គការការពារសិទ្ធិមនុស្សក្រៅរដ្ឋាភិបាលអាដហុក បានមានប្រសាសន៍អត្ថាធិប្បាយថា ៖ «យើងឃើញថា ព្រឹទ្ធសភាមិនមែនត្រឹមតែលើកនេះទេ គឺរាល់លើក គ្រប់ច្បាប់ទាំងអស់ឲ្យតែសភាអនុម័តមក គឺព្រឹទ្ធសភាកម្រនឹងឃើញមានការកែប្រែនូវខ្លឹមសារអត្ថបទច្បាប់ទាំងឡាយណាដែលសភាអនុម័តណាស់»។
វិទ្យុអាស៊ីសេរីមិនទាន់អាចទាក់ទងដើម្បីសុំការពន្យល់ពីសមាជិកព្រឹទ្ធសភាខាងគណបក្សកាន់អំណាចបានទេ ប៉ុន្តែតំណាងរបស់រដ្ឋាភិបាល លោក សុខ អាន ជាឧបនាយករដ្ឋមន្ត្រី និងជារដ្ឋមន្ត្រី ទទួលបន្ទុកទីស្ដីការគណៈរដ្ឋមន្ត្រី បានមានប្រសាសន៍ការពារសេចក្ដីព្រាងច្បាប់នេះនៅក្នុងសភាជាតិកាលពីសប្ដាហ៍កន្លងទៅនេះថា ៖ «ការចេញច្បាប់នេះជាជំហានថ្មីធំណាស់ នឹងធ្វើឲ្យស្ថាប័នប្រឆាំងអំពើពុករលួយ ធ្វើឲ្យអង្គភាពប្រឆាំងអំពើពុករលួយទៅជាឧបករណ៍យ៉ាងមុតស្រួចរបស់រាជរដ្ឋាភិបាលនៅក្នុងការងារប្រឆាំងអំពើពុករលួយហ្នឹង។ ច្បាប់នឹងកែលម្អហូរហែបន្តទៅមុខទៀត។ ចំពោះមុខយើងបានដាក់នូវមុខសញ្ញាប្រកាសទ្រព្យសម្បត្តិ។ រាប់ទៅវាមិនក្រោមជាងសែននាក់ទេ»។
សេចក្ដីព្រាងច្បាប់ប្រឆាំងអំពើពុករលួយដែលមាន ៩ជំពូក និង ៥៧មាត្រា ត្រូវបានសភាជាតិកម្ពុជាបានអនុម័តកាលពីថ្ងៃទី១១ ខែមីនា កន្លងទៅនេះ ក្នុងសំឡេងភាគច្រើនគាំទ្រ ៨២លើ៨២សំឡេង ដែលភាគច្រើនមកពីគណបក្សកាន់អំណាចនៅមុនការដាក់ជូនព្រឹទ្ធសភាអនុម័ត កាលពីថ្ងៃសុក្រ ទី១៩ មីនានេះ។
តំណាងរាស្ត្រគណបក្សប្រឆាំងសមរង្ស៊ី និងសកម្មជនការពារសិទ្ធិមនុស្សក្រៅរដ្ឋាភិបាល អង្គការសហប្រជាជាតិកន្លងមក បានជំទាស់ចំពោះការអនុម័តច្បាប់ប្រឆាំងអំពើពុករលួយដោយតក់ក្រហល់នោះ ដោយសារតែមានមាត្រាមួយចំនួនត្រូវគេសុំឲ្យកែប្រែ។
ការរិះគន់នោះទៀត បានផ្ដោតលើការប្រកាសទ្រព្យសម្បត្តិ មិនបានចែងឲ្យប្រកាសទ្រព្យសម្បត្តិជាសាធារណៈ សមាជិកស្ថាប័នប្រឆាំងអំពើពុករលួយមិនឯករាជ្យពីគណបក្សនយោបាយ ដែលងាយការពារផលប្រយោជន៍បក្សពួកខ្លួន។
ក្រោយពីព្រឹទ្ធសភាបានអនុម័តលើសេចក្ដីព្រាងច្បាប់ប្រឆាំងអំពើពុករលួយនោះហើយ គេមានគម្រោងការបញ្ជូនមកឲ្យសភាជាតិវិញ ដើម្បីដាក់ជូនឲ្យក្រុមប្រឹក្សាធម្មនុញ្ញកម្ពុជាពិនិត្យនៅមុនការបញ្ជូនឲ្យប្រមុខរដ្ឋស្ដីទីចុះហត្ថលេខា ឬថ្វាយព្រះមហាក្សត្រឡាយព្រះហស្តលេខា ដើម្បីក្លាយជាច្បាប់ចូលជាធរមាន៕