លោកមេធាវី ស សូវ៉ាន បានមានប្រសាសន៍នៅក្នុងសន្និសីទកាសែតមួយនៅព្រឹកថ្ងៃទី១៥ ខែកញ្ញានេះថា ជាមួយនឹងការប្តឹងទៅព្រះមហាក្សត្រនោះ លោកបានប្តឹងទៅអង្គការសិទ្ធិមនុស្ស ក្នុងករណីដែលលោក សួស ឡា ចៅក្រមអនុវត្តន៍សាលាដំបូងខេត្តសៀមរាប ឃុបឃិតក្លែងក្លាយ បន្លំដើម្បីប្លន់យកភោជនីយដ្ឋានមួយ ស្របច្បាប់តាមរយៈដីកាសម្រេចចុះអនុវត្តបង្ខំ។
លោកមេធាវី ស សូវ៉ាន់ មានប្រសាសន៍ដូច្នេះថា ៖ «នៅក្នុងរឿងនេះ ខ្ញុំបានប្ដឹងក្រុមប្រឹក្សាអង្គចៅក្រម លើរឿងអាកប្បកិរិយាចៅក្រម សួស ឡា ។ នៅក្នុងរឿងនេះ ខ្ញុំបានប្ដឹងអង្គការសិទ្ធិមនុស្ស ពីព្រោះអំពើប្លន់ទាំងកណ្ដាលថ្ងៃ នៅខេត្តសៀមរាប ប្លន់យកហាងកាហ្វេ យកទៅឲ្យមនុស្សដែលឆបោកលុយនាងហ្នឹងទៀត។ ខ្ញុំប្ដឹងអង្គការសិទ្ធិមនុស្ស ខ្ញុំនឹងប្ដឹងព្រះមហាក្សត្រទៀត។ សួស ឡា ហ្នឹង ប្លន់តាមរយៈដីកាសម្រេចតុលាការ យកតុលាការមកធ្វើជាអំពើប្លន់កណ្ដាលថ្ងៃ នៅខេត្តសៀមរាប»។
ក្រៅពីការប្តឹងលោកចៅក្រម សួស ឡា នោះ លោកមេធាវី ស សូវ៉ាន បានប្តឹងពីមន្ត្រីជំនួយការរបស់ចៅក្រមមន្ត្រីកងរាជអាវុធហត្ថ ខេត្តសៀមរាប និងអាជ្ញាធរឃុំស្វាយដង្គុំ ក្នុងខេត្តសៀមរាប រួមជាមួយអ្នកដែលពាក់ព័ន្ធផ្សេងទៀត សរុបចំនួន ១២នាក់។
ចំណែកឯលោក សួស ឡា ចៅក្រមសាលាដំបូងខេត្តសៀមរាប បានមានប្រសាសន៍បកស្រាយថា លោកមិនបានដឹងថា ការប្តឹងនោះក្នុងករណីអ្វីនោះទេ ហើយលោក ស សូវ៉ាន មិនមានសុពលភាពស្របច្បាប់ក្នុងការប្តឹងនោះទេ។
លោក សួស ឡា ថ្លែងដូច្នេះថា ៖ «ក្នុងសំណុំរឿងគាត់ប្ដឹងខ្ញុំហ្នឹង ក្នុងភាគីហ្នឹង អត់មានភាគីណាមួយជាកូនក្ដីរបស់គាត់ទេ។ គាត់អត់បានបំពេញសិទ្ធិជាអ្នកតំណាងស្របច្បាប់ដាក់ក្នុងសំណុំរឿងទេ បានន័យថា គាត់មិនមែនជាមេធាវីតំណាងឲ្យអាណត្តិនៅក្នុងសំណុំរឿងដែលគាត់ប្ដឹងហ្នឹងទេ អ៊ីចឹងគាត់គ្មានសិទ្ធិធ្វើសកម្មភាពក្នុងបណ្ដឹងហ្នឹងទេ។ អ៊ីចឹងបណ្ដឹងរបស់គាត់ទាំងអស់ហ្នឹង សុទ្ធតែបណ្ដឹងខុសច្បាប់ ពីព្រោះគាត់គ្មានសិទ្ធិប្ដឹងខ្ញុំទេ គាត់ចង់ប្ដឹងខ្ញុំ លុះត្រាតែគាត់ជាមេធាវីតំណាងដោយអាណត្តិ ឲ្យកូនក្ដីគាត់មួយ ដែលជាភាគីក្នុងរឿងហ្នឹង អ៊ីចឹងគាត់មានសិទ្ធិប្ដឹង»។
សូមបញ្ជាក់ថា ករណីដែលបណ្តាលឲ្យមេធាវីប្តឹងចៅក្រមនេះ គឺបណ្តាលមកពីរឿងក្តីមួយ នៅឯខេត្តសៀមរាប លើករណីការទាមទាមចែកទ្រព្យសម្បត្តិនិងការគ្រប់គ្រងហាងកាហ្វេមួយ ឈ្មោះ ឡឺ ហ្ក្រង់ កាហ្វេ (Le Grand Cafe) ដែលលោកចៅក្រម សួស ឡា បានចេញដីកាសម្រេច ចាត់ការចុះអនុវត្តដោយបង្ខំឲ្យឈ្មោះ ផាន់ សង្វាលី គ្រប់គ្រង់ធ្វើអាជីវកម្មជាបណ្តោះអាសន្ននោះ ដែលលោកមេធាវី ស សូវ៉ាន គិតថា ជារឿងដែលអយុតិធម៌៕