មន្ត្រីរដ្ឋាភិបាលកម្ពុជា បានឱ្យដឹងថា ស្របពេលដែលភ្ញៀវទេសចរបរទេសកាន់តែកើនឡើងនោះ រដ្ឋាភិបាលកំពុងធ្វើការទាក់ទាញអ្នកវិនិយោគទុនផ្នែកទេសចរណ៍ ឱ្យចូលមករកស៊ីកាន់តែច្រើនថែមទៀតដែរ ដើម្បីកាត់បន្ថយភាពក្រីក្ររបស់ប្រជាពលរដ្ឋខ្មែរ។
តើផែនការកាត់បន្ថយភាពក្រីក្រតាមរយៈវិស័យទេសចរណ៍នោះយ៉ាងណា?
អាជ្ញាធរខេត្តសៀមរាប បានអះអាងថា ការជួបប្រជុំវេទិកាទេសចរណ៍អន្តរតំបន់អាស៊ីបូព៌ា ដែលកំពុងដំណើរការរយៈពេល ៣ថ្ងៃមកហើយ នៅក្នុងខេត្តនេះ។ វេទិកាទេសចរណ៍នេះ គឺជាព្រឹត្តិការណ៍ដ៏សំខាន់មួយសម្រាប់ជួយដល់សណ្ឋាគារ ផ្ទះសំណាក់ ភោជនីយដ្ឋាន សិប្បកម្មខ្នាតតូច និងអ្នកប្រកបរបរសេវាកម្មទេសចរណ៍ ឱ្យកាន់តែមានដំណើរការល្អក្នុងការស្វែងរកចំណូលប្រចាំថ្ងៃថែមទៀត។
នៅស្របពេលដែលមានកិច្ចប្រជុំវេទិកាទេសចរណ៍អន្តរតំបន់អាស៊ីបូព៌ា (អ៊ីតូហ្វ = EATOF) នេះ អាជ្ញាធរខេត្តសៀមរាប កំពុងប្រឹងប្រែងលើការទាក់ទាញអ្នកវិនិយោគទុន ឱ្យចូលមករកស៊ីនៅក្នុងខេត្តនេះថែមទៀត ក្នុងគោលបំណងផ្សារភ្ជាប់វិស័យទេសចរណ៍ទៅនឹងគោលនយោបាយកាត់បន្ថយភាពក្រីក្រ។
លោក ស៊ូ ភិរិន្ទ ជាអភិបាលខេត្តសៀមរាប លោកបានថ្លែងបន្ទាប់ការអញ្ជើញជាគណៈអធិបតីបើកកិច្ចប្រជុំនោះថា ពេលបច្ចុប្បន្ន ចំណូលពីវិស័យទេសចរណ៍ក៏ជាកំណើនសេដ្ឋកិច្ចមួយផ្នែក ដែលបានជួយកាត់បន្ថយភាពក្រីក្ររបស់ប្រជាពលរដ្ឋនៅក្នុងខេត្តនេះដែរ។ លោកបានមានប្រសាសន៍ថា អាជ្ញាធរខេត្តកំពុងប្រឹងប្រែងធ្វើឱ្យផ្នែកសេវាកម្ម និងការទាក់ទងបណ្ដាប្រទេសជាច្រើន ឱ្យកាន់តែប្រសើរ ដើម្បីទាក់ទាញក្រុមអ្នកវិនិយោគទុនឱ្យបានកាន់តែច្រើនឡើងៗ។
លោក ស៊ូ ភិរិន្ទ៖ «យើងធ្វើនេះ គេមើលឃើញ គេសប្បាយពេញចិត្តណាស់ ថាមិនមានអ្នកណាលើសហ្នឹង ដែលគេធ្លាប់ដើរជាច្រើនប្រទេសដែរ។ អីចឹង ដែលគេសរសើរយើងហើយ គឺយើងខិតខំធ្វើឱ្យល្អថែមទៀត ទាំងប្រពៃណី ទំនៀមទម្លាប់ ទាំងការងារសេវា ទាំងទំនាក់ទំនង និងបរិស្ថាន ទាំងការងារបម្រើ។ ធ្វើម៉េចឱ្យកាន់តែប្រសើរឡើង ដើម្បីជាផលប្រយោជន៍ដល់អ្នកស្រុកយើងក្នុងខេត្តសៀមរាប ផង ក៏ដូចជាក្រៅៗខេត្តយើងផង ឱ្យកាន់តែប្រសើរឡើងក្នុងការវិនិយោគ ក្នុងការអភិវឌ្ឍតាមរយៈវិស័យទេសចរណ៍ធម្មជាតិរបស់យើងហ្នឹង។ ហើយនិងទេសចរណ៍វប្បធម៌របស់យើង មានប្រាង្គប្រាសាទអង្គរវត្តនេះឯង»។
ទន្ទឹមនឹងការប្រឹងប្រែងទាក់ទាញអ្នកវិនិយោគផ្នែកទេសចរណ៍នោះ គឺអាជ្ញាធរខេត្តសៀមរាប ក៏កំពុងប្រឹងប្រែងអនុវត្តន៍ទៅតាមយុទ្ធសាស្ត្រទេសចរណ៍របស់រដ្ឋាភិបាល ដែលមានការប្រឡងប្រណាំងទីក្រុងស្អាត ដោយមានពាក្យស្លោកទីក្រុងស្អាត រមណីយដ្ឋានស្អាត និងសេវាល្អផងដែរ។
ក្នុងរយៈពេល ១០ខែឆ្នាំ២០១២ ខេត្តសៀមរាប បានទទួលភ្ញៀវទេសចរបរទេសចំនួន ១លាន ៦សែននាក់ នៅក្នុងចំណោមអ្នកទេសចរសរុបប្រមាណ ២លាន ៨សែននាក់ ដែលបានចូលមកទស្សនានៅតាមតំបន់មួយចំនួនទៀតនៃប្រទេសកម្ពុជា។ ចំនួនអ្នកទេសចរបរទេសដែលចូលមកទស្សនានៅខេត្តសៀមរាប រយៈពេល ១០ខែឆ្នាំ២០១២ គឺកើនឡើងប្រមាណ ៥៧.៤% បើប្រៀបធៀបទៅនឹងរយៈពេលដូចគ្នា កាលពីឆ្នាំ២០១១ កន្លងទៅ។
លោក សុខ អាន ឧបនាយករដ្ឋមន្ត្រី និងជារដ្ឋមន្ត្រីទីស្ដីការគណៈរដ្ឋមន្ត្រី បានមានប្រសាសន៍ថា ប្រទេសកម្ពុជា មានប្រវត្តិសាស្ត្រយូរអង្វែងមកហើយ ដោយមានវប្បធម៌ និងអរិយធម៌ដ៏អស្ចារ្យ។ បន្ថែមលើនេះ មានធម្មជាតិដ៏សម្បូរបែប ហើយសម្បត្តិទាំងនេះធ្វើឱ្យកម្ពុជា មានឧត្តមភាពខ្លាំងក្លាក្នុងការទាក់ទាញទេសចរណ៍ ដែលជាផ្នែកមួយនៃការអភិវឌ្ឍឧស្សាហកម្ម និងសេវាកម្ម។
លោក សុខ អាន៖ «ប្រទេសកម្ពុជា មានរមណីយដ្ឋានជាច្រើន ដែលសក្ដិសមសម្រាប់ទេសចរណ៍វប្បធម៌។ សក្ដានុពលដ៏សម្បូរបែបមួយទៀត គឺការទាក់ទាញផ្នែកធម្មជាតិ និងបរិស្ថានស្រស់ត្រកាល ដូចជាមានព្រៃ ស្ទឹង ទន្លេ បឹងបួ ឆ្នេរសមុទ្រ កោះ និងសត្វព្រៃ ព្រមទាំងសត្វផ្សោតដ៏កម្រនៅទន្លេមេគង្គផង។ បច្ចុប្បន្ននេះ យើងកំពុងព្យាយាមអភិវឌ្ឍទេសចរណ៍ពីផ្នែកវប្បធម៌ឆ្ពោះទៅរកទេសចរណ៍ធម្មជាតិ និងអេកូទេសចរណ៍ ដើម្បីទាក់ទាញអ្នកទេសចរឱ្យចូលមកកម្ពុជា និងជាពិសេស ទៅខេត្តសៀមរាប ពីព្រោះខេត្តនោះ គឺមានសក្ដានុពលផ្នែកអេកូទេសចរណ៍ជាច្រើន»។
កាលពីឆ្នាំ២០១១ កន្លងទៅ កម្ពុជា បានទទួលភ្ញៀវទេសចរបរទេសប្រមាណជាង ២លាន ៨សែននាក់ ដោយបានចំណូលជាតិប្រមាណជាង ១.៩០០លានដុល្លារសហរដ្ឋអាមេរិក។
បើទោះបីជាចំណូលទេសចរណ៍បានកើនឡើងក៏ដោយ ក៏ប្រជាពលរដ្ឋនៅក្នុងតំបន់ទេសចរណ៍តិចតួចនៅឡើយ បានទទួលចំណូលនោះ។ គេដឹងថា ចំណូលមួយចំនួនបានធ្លុះធ្លាយទៅវិញ ដោយសារតែសណ្ឋាគារ និងភោជនីយដ្ឋានមួយចំនួន បានទិញម្ហូប សាច់សត្វ និងបន្លែជាដើម មកពីក្រៅប្រទេស ដោយសារតែកសិករខ្មែរនៅក្នុងតំបន់ មិនអាចផលិតម្ហូបអាហារ និងបន្លែ ឱ្យត្រូវស្តង់ដារ និងតាមតម្រូវការរបស់សណ្ឋាគារ និងភោជនីយដ្ឋាន សម្រាប់បម្រើទេសចរណ៍ទាំងនោះបាននៅឡើយ។
ក្នុងរយៈពេលប្រមាណ បីបួនឆ្នាំកន្លងទៅនេះ អាជ្ញាធរខេត្តសៀមរាប ដែលសហការជាមួយអង្គការអាល្លឺម៉ង់ មួយ ឈ្មោះ ជី.ធី.ហ្សេត (GTZ) ដើម្បីបណ្ដុះបណ្ដាលជំនាញដល់ប្រជាពលរដ្ឋដែលរស់នៅជុំវិញតំបន់ទេសចរណ៍ខេត្តសៀមរាប ឱ្យអាចមានសមត្ថភាព ដើម្បីទាញយកចំណូលពីទេសចរណ៍ឱ្យកាន់តែច្រើនឡើងៗ។
លោក ប៊ុន ថាឫទ្ធិ ជាអភិបាលរងខេត្តសៀមរាប បានមានប្រសាសន៍ថា បច្ចុប្បន្ននេះក្នុងចំណោមប្រជាពលរដ្ឋចំនួនជាង ៩០ម៉ឺននាក់ រស់នៅទូទាំងខេត្តសៀមរាប គឺមានប្រជាពលរដ្ឋប្រមាណតែជាង ៨.៥០០គ្រួសារប៉ុណ្ណោះ ដែលអាចស្រូបយកចំណូលប្រចាំថ្ងៃបានខ្លះពីទេសចរណ៍។ ប្រជាពលរដ្ឋទាំងនោះ អាចទទួលបានកម្រៃជាមធ្យមប្រមាណជាង ១៨០ដុល្លារអាមេរិកក្នុង ១ខែៗ។
លោក ប៊ុន ថាឫទ្ធិ៖ «ខេត្តសៀមរាប យើងសម្បូរដីបង្កបង្កើនផលដែរ។ ក៏ប៉ុន្តែ យើងអត់មានលក្ខណៈសម្បត្តិក្នុងការផ្គត់ផ្គង់នូវបន្លែ សាច់ សម្រាប់សណ្ឋាគារ ភោជនីយដ្ឋាន ផ្ទះសំណាក់អីអត់គ្រប់គ្រាន់នៅឡើយ។ អីចឹង រដ្ឋាភិបាលបានបង្កើតគម្រោងខ្សែក្រវាត់បៃតង គឺសំដៅលើកកម្ពស់ធ្វើយ៉ាងម៉េចឱ្យប្រជាពលរដ្ឋមានចំណេះដឹងខ្ពស់ ដើម្បីឱ្យចេះយកវត្ថុធាតុដើមទៅផលិត ឬក៏បង្កើនការដាំដុះ ការចិញ្ចឹមសត្វ ឱ្យក្លាយទៅជាស្តង់ដារមួយ អាចផ្គត់ផ្គង់បម្រើឱ្យវិស័យទេសចរណ៍បាន ក្នុងការជួយលើកកម្ពស់ជីវភាពរបស់គាត់»។
កាលពីពីរបីឆ្នាំមុន គម្រោងខ្សែក្រវាត់បៃតង បានចាប់ផ្ដើមបណ្ដុះបណ្ដាលជំនាញទៅលើប្រជាពលរដ្ឋក្នុងខេត្តសៀមរាប ចំនួន ៧ស្រុក ហើយមកដល់ឆ្នាំ២០១២ គម្រោងនេះបានចាប់ផ្ដើមបណ្ដុះទៅលើប្រជាពលរដ្ឋនៅក្នុងក្រុងចំនួន១ និងស្រុកចំនួន១១ ដើម្បីជួយឱ្យប្រជាពលរដ្ឋមានសមត្ថភាពទាញយកចំណូលពីទេសចរណ៍បានតាមរយៈការផលិតវត្ថុអនុស្សាវរីយ៍ ការដាំបន្លែ ផ្លែឈើ និងចិញ្ចឹមសត្វ លក់ទៅឱ្យបណ្ដាសណ្ឋាគារ និងភោជនីយដ្ឋានជាច្រើន ដែលកំពុងតែបម្រើសេវាកម្មទេសចរណ៍ជាប្រចាំថ្ងៃនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។