ផ្អែកតាមប្រភពបានឲ្យដឹងថា ដីធ្លីនោះមានទំហំប្រមាណ ១៤ហិកតារ ស្ថិតនៅក្នុងភូមិ១ សង្កាត់៣ ខណ្ឌមិត្តភាព ក្រុងព្រះសីហនុ ដែលមានចុះនៅក្នុងបញ្ជីសារពើភណ្ឌរបស់មន្ទីរព័ត៌មានក្រុងព្រះសីហនុ ហើយនឹងមានបង្គោលអង់តែនវិទ្យុនៅទីនោះផង។
លោក ម៉ម ម៉ាលី ជាប្រធានមន្ទីរព័ត៌មានក្រុងព្រះសីហនុ ក្រោមការគ្រប់គ្រងរបស់ក្រសួងព័ត៌មាននៃប្រទេសកម្ពុជា បានមានប្រសាសន៍ថា មានគ្រឿងចក្រជាច្រើននិងកម្មករជាច្រើន កំពុងតែបន្តការឈូសឆាយយកដីនោះធ្វើជាកម្មសិទ្ធិផ្ទាល់ខ្លួន ចាប់តាំងពីដើមខែវិច្ឆិកា រហូតដល់ពេលបច្ចុប្បន្ននេះ ដោយមិនទាន់ដឹងថា ក្រុមហ៊ុននោះជារបស់នរណា។
លោក ម៉ម ម៉ាលី មានប្រសាសន៍ដូច្នេះថា ៖ «អ្នកដែលគេទទួលថា ជាម្ចាស់ដីហ្នឹង គេកំពុងដំណើរការឈូសឆាយ អ៊ីចឹងមន្ទីរអត់មានលទ្ធភាពឃាត់ឃាំងគេបាន ប៉ុន្តែគ្រាន់តែបានធ្វើរបាយការណ៍ទៅអភិបាលក្រុង ហើយនិងទៅក្រសួងប៉ុណ្ណឹង។ មាននៅក្នុងបញ្ជីសារពើភណ្ឌរបស់រដ្ឋរបស់មន្ទីរព័ត៌មាន។ គេឈូសអាហ្នឹង គេថា ក្នុងការគ្រប់គ្រងក្នុងកម្រិតគ្រប់គ្រងរបស់គេ តែវាអាចប៉ះពាល់ទៅដល់អង់តែន»។
លោកបានឲ្យដឹងថា ក្រុមហ៊ុនកំពុងតែឈូសឆាយដើម្បីរឹបយកដីទំហំ ១៤ហិកតារនោះ មានលិខិត ស.ជ.ណ. មួយរបស់ទីស្តីការគណៈរដ្ឋមន្រ្តីជាសំអាងក្នុងការរឹបយកដីធ្លីនោះ។
គ្មានប្រភពណាមួយអះអាងថា ក្រុមហ៊ុនកំពុងតែឈូសឆាយយកដីធ្លីរបស់មន្ទីរព័ត៌មាននៅក្នុងក្រុងព្រះសីហនុនោះ មានឈ្មោះអ្វី ជារបស់នរណា ហើយដីទំហំ ១៤ហិកតារនោះ គេមានគម្រោងយកធ្វើអ្វីទេ?
វិទ្យុអាស៊ីសេរីមិនអាចទាក់ទងតំណាងក្រុមហ៊ុននិងអាជ្ញាធរមូលដ្ឋាននៅក្រុងព្រះសីហនុដើម្បីសុំសេចក្តីបំភ្លឺជុំវិញការឈូសឆាយរឹបយកដីធ្លី១៤ហិកតារនោះបានភ្លាមៗទេ។
លោក ខៀវ កាញារីទ្ធ រដ្ឋមន្រ្តីក្រសួងព័ត៌មាន បានមានប្រសាសន៍ប្រតិកម្មថា លោកបានជំទាស់នឹងការរឹបអូសយកដីធ្លីរបស់មន្ទីរព័ត៌មាននៅក្រុងព្រះសីហនុនោះ។
លោកបានសន្យាថា នឹងធ្វើលិខិតមួយនៅសប្តាហ៍នេះជូនលោកនាយករដ្ឋមន្រ្តី ហ៊ុន សែន ដើម្បីលុបចោលការអនុញ្ញាតនានាដើម្បីប្រគល់ដីធ្លីនោះមកឲ្យក្រសួងព័ត៌មានវិញ។ លោកបានចាត់ទុកថា ការរឹបយកដីនោះជាការខុសឆ្គងធ្ងន់ធ្ងរមួយ។
លោកស្រី ជៀប សុធាវី អ្នកសម្របសម្រួលរបស់អង្គការសិទ្ធិមនុស្ស អាដហុក នៅក្រុងព្រះសីហនុ បានមានប្រសាសន៍ថា ដីធ្លីនោះធ្លាប់មានការបង្រ្កាបរួចម្តងទៅហើយកាលឆ្នាំ២០០១កន្លងទៅ លើប្រជាពលរដ្ឋជាច្រើនដែលរងការចោទប្រកាន់ថា បានចូលមកចាប់យកដីធ្លីសង់ជាខ្ទមតូចៗ។ ប៉ុនែ្តការឈូសឆាយរឹបយកដីនាពេលថ្មីៗនេះ លោកស្រីមិនទាន់បានដឹងថា ជាក្រុមហ៊ុនណាទេ។
លោកស្រី ជៀប សុធាវី មានប្រសាសន៍ដូច្នេះថា ៖ «កាលមុន ប្រជាពលរដ្ឋគាត់ចូលទៅកាន់កាប់ មានបោះរបងដាំកូនឈើអីហ្នឹង ដល់នេះខាងសាលាក្រុងនាំកម្លាំងទៅឈូសកាប់កូនខ្នុរអីចេញថា ដីហ្នឹងរបស់សាលាក្រុង ហើយសម្រាប់ការសាងសង់មន្ទីរមួយចំនួន ហើយក្នុងហ្នឹងដូចមានព័ត៌មានដែរ»។
បញ្ហាជម្លោះដីធ្លីនៅក្នុងក្រុងព្រះសីហនុ អ្នកសម្របសម្រួលនៃអង្គការសិទ្ធិមនុស្ស អាដហុក កត់សម្គាល់ឃើញថា មានការកើតមានទ្បើងច្រើននឹងញឹកញាប់ជាងបណ្តាខេត្តនានាក្នុងប្រទេសកម្ពុជា៕