ប្រធានមន្ទីរកសិកម្មក្រុងប៉ៃលិន លោក ផាន់ ពេជ្រ មានប្រសាសន៍កាលពីថ្ងៃព្រហស្បតិ៍ថា មូលហេតុដែលឈ្មួញថៃបញ្ចុះតម្លៃនេះគឺបណ្តាលពីវិបត្តិនយោបាយរបស់ថៃ និងផ្លូវដឹកជញ្ជូនក្នុងក្រុងប៉ៃលិនមានស្ថានភាពមិនល្អ។
លោក ផាន់ ពេជ្រ បានឲ្យដឹងថា ៖ «ទី១ ដោយសភាពកាណ៍នៅស្រុកថៃ។ ទី២ ដោយសារតែកសិផលរបស់យើង ការដឹកជញ្ជូនវានៅភ្លៀង ផ្លូវនៅពិបាក អ៊ីចឹងតម្លៃវាចុះថោក»។
លោកបានបន្តថា ការស្រុតតម្លៃនេះបានចាប់ផ្តើមឡើងនារយៈពេលចុងឆ្នាំ២០០៨ បន្ទាប់ពីប្រទេសថៃមានការជ្រួលច្របល់ ហើយថា កាលពីដើមឆ្នាំ២០០៨ ពោតមានតម្លៃ៦០០រៀលក្នុងមួយគីឡូគ្រាម បច្ចុប្បន្នធ្លាក់មកនៅត្រឹមតែ៣៨០រៀល។
ប្រជាពលរដ្ឋ៩០%នៅក្រុងប៉ៃលិនបានចាប់យកមុខរបស់កសិកម្មដាំពោតលក់ទៅឲ្យប្រទេសថៃ ហើយក្រៅពីនោះមានការដាំសណ្តែក ល្ង ដំឡូង ទៅតាមរដូវកាល។
លោក ម៉ឹង គឹមសេង មេភូមិអូរគន្ធៀងវ៉ា សង្កាត់ស្ទឹងត្រង់ ក្រុងប៉ៃលិន បានមានប្រសាសន៍ថា អ្នកភូមិដែលបានដាំពោតបានជួបការលំបាកដោយសារការចំណាយដើមទុនច្រើន ក្នុងនោះគ្រាន់តែទិញគ្រាប់ពូជ១៥គីឡូក្រាមថ្លៃជាង១៧ម៉ឺនរៀល ប៉ុន្តែបានផលលក់មានតម្លៃថោក។
លោក ម៉ឹង គឹមសេង បានបញ្ជាក់ថា ៖ «ទិញគេមកពូជក៏វាថ្លៃ ហើយយើងភ្ជួរដីម៉ាសូតក៏វាថ្លៃ ដល់ពេលលក់វិញវាថោក អ៊ីចឹងវាខាត ខាតច្រើន។ គិតធ្វើយ៉ាងម៉េចវិញអ៊ីចឹង?»។
លោក សូ នី ប្រធានក្រុមហ៊ុនរុងរឿងដែលជាក្រុមហ៊ុនប្រមូលទិញផលកសិកម្មគ្រប់ប្រភេទនៅក្រុងប៉ៃលិនយកទៅលក់ក្នុងប្រទេសថៃ បានថ្លែងថា កសិករដាំពោតជាច្រើនបានទទួលរងផលប៉ះពាល់ចំពោះការធ្លាក់ថ្លៃនេះ។ លោកបន្តថា សូម្បីតែក្រុមហ៊ុនរបស់លោកក៏រងផលប៉ះពាល់ដែរ។
លោក សូ នី បានមានប្រសាសន៍ថា ៖ «ប៉ះពាល់ដល់កសិកម្មរបស់យើង។ យើងពិបាកទិញដូរ មួយថ្ងៃទិញប៉ុណ្ណេះ មួយថ្ងៃទិញប៉ុណ្ណោះ ដល់អ៊ីចឹងយើងតាមទីផ្សារវាអត់ទាន់»។
ពាក់ព័ន្ធទៅនឹងការធ្លាក់ថ្លៃពោតនេះ លោក អ៊ី ឈាន អភិបាលក្រុងប៉ៃលិនបានមានប្រសាសន៍ថា លោកបានបង្កើតគណៈកម្មការមួយត្រួតពិនិត្យធ្វើការជាមួយភាគីថៃ និងរាយការណ៍ទៅក្រសួងកសិកម្ម រុក្ខាប្រមាញ់ និងនេសាទ រួចរាល់ហើយពីបញ្ហានេះ ដើម្បីរកវិធានការដោះស្រាយ។
លោក អ៊ី ឈាន បានមានប្រសាសន៍ថា ៖ «ខ្ញុំក៏ខំយកចិត្តទុកដាក់ដែរ គឺថាទំនាក់ទំនងជាមួយថៃ គឺថាសុំឲ្យធ្វើការត្រួតពិនិត្យឡើងវិញពីតម្លៃ រឿងអីបានចុះតម្លៃ អាហ្នឹងបញ្ហាទី១។ បញ្ហាទី២ ក៏រាយការណ៍ទៅខាងក្រសួងដែរដើម្បីឲ្យក្រសួងជួយរកវិធី»។
អាជ្ញាធរក្រុងប៉ៃលិនបានឲ្យដឹងថា ក្នុងមួយថ្ងៃៗមានពោត១៥ទៅ២០ឡាន មួយឡានៗមានទម្ងន់២០តោនត្រូវបានដឹកចេញពីក្រុងប៉ៃលិនទៅលក់ឲ្យឈ្មួញថៃតាមច្រកផ្សារព្រហ្មខ្មែរនិងច្រកបាកាតថៃ៕