ប្រធានសហព័ន្ធខ្មែរកម្ពុជាក្រោម លោក ថាច់ ង៉ុកថាច់ មានប្រសាសន៍កាលពីយប់ថ្ងៃទី២៧ កញ្ញានេះ ថា ឲ្យវិទ្យុអាស៊ីសេរីដឹងអំពីល្បិចកលដែលជាយុទ្ធសាស្រ្តថ្មីរបស់វៀតណាមនោះ។
លោក ថាច់ ង៉ុកថាច់ បានមានប្រសាសន៍ថា ៖ «ស្ថានភាពថ្មីរបស់លោកគ្រូ ទឹម សាខន បច្ចុប្បន្ននេះមានការប្រែប្រួល។ ក្នុងរយៈពេលមួយសប្ដាហ៍កន្លងមកហើយនេះ គឺរដ្ឋអំណាចយួនបានយកលោកចេញពីផ្ទះរបស់ឪពុកធំលោក ដើម្បីទៅនៅកន្លែងសណ្ឋាគារមួយដែលសម្រាប់អ្នកទេសចរណ៍ ព្រោះមានមិត្តភក្ដិហើយនិងអ្នកស្រុកទៅសួរច្រើនពេក ម៉្លោះហើយគេខ្លាចដំណឹងហ្នឹងលេចឮចេញមកក្រៅ អាហ្នឹងទី១។ ទី២ បីថ្ងៃមុនគេបាននាំលោកគ្រូ ខន ទៅទិញដីសម្រាប់សង់ផ្ទះ ហើយនិងព្យាយាមទិញស្រែទិញអីជូនលោកគ្រូ ខនហ្នឹងទៀត។ ប៉ុន្តែផ្ទុយទៅវិញយើងបានទទួលដំណឹងពីក្នុងស្រុកមកថា អ្វីៗទាំងអស់ហ្នឹងគឺរដ្ឋាភិបាលយួនបង្ខំឲ្យលោកគ្រូ ខនហ្នឹង សរសេរឆ្លើយដាក់អ្នកនេះអ្នកនោះគ្រប់ ព្រមទាំងគេបង្ខំឲ្យលោកគ្រូ ទឹម សាខន និយាយចោទបន្ទោសរឿងរ៉ាវអស់ហ្នឹងគឺដោយសាររដ្ឋាភិបាលកម្ពុជាបានជាលោកមានទោសមានស្អីហ្នឹងរហូតដល់ពេលបច្ចុប្បន្នហ្នឹង»។
ផ្ទះដែលលោក ទឹម សាខន នៅនោះ គឺនៅក្នុងភូមិខ្លាគ្រហឹម ស្រុកស្វាយទង ហើយដែលលោកត្រូវវៀតណាមប្តូរឲ្យទៅនៅឯសណ្ឋាគារថ្មីនោះ គឺស្ថិតនៅក្នុងភូមិបន្ទាយដែក ក្នុងស្រុកស្វាយទងដដែល នៅខេត្តមាត់ជ្រូក នៃដែនដីកម្ពុជាក្រោម។
បើតាមលិខិតផ្លូវការរបស់អាជ្ញាធរវៀតណាមដែលចុះថ្ងៃទី៣០ ខែមិថុនា ឆ្នាំ២០០៨ បានបញ្ជាក់ថា ព្រះសង្ឃ ទឹម សាខន ត្រូវបានចាប់ខ្លួនកាលពីថ្ងៃទី៣០ ខែមិថុនា ឆ្នាំ២០០៧ ជាប់ចោទបទឧក្រិដ្ឋថាបានបំបែកបំបាក់គោលនយោបាយបង្រួបបង្រួមជាតិ គឺត្រូវជាប់ឃុំឃាំងរយៈពេល១ឆ្នាំ និងថា ប៉ុន្តែលោក ទឹម សាខន បានទទួលទោសនៅក្នុងមន្ទីរឃុំឃាំងបានចប់សព្វគ្រប់ទៅតាមកាលកំណត់ហើយនោះ ទើបលោកត្រូវបានអនុញ្ញាតឲ្យមានសេរីភាពក្នុងការវិលទៅរស់នៅឯស្រុកភ្នំដិន នៅខេត្តតាកែវនៃប្រទេសកម្ពុជាវិញ គឺលោកត្រូវបង្ហាញមុខនៅខេត្តតាកែវដល់អាជ្ញាធរខ្មែរឲ្យបាននៅមុនថ្ងៃទី២ ខែកក្កដា ឆ្នាំ២០០៨។
តែអង្គការការពារសិទ្ធិមនុស្សលីកាដូចេញសេចក្តីថ្លែងការណ៍ក្នុងសប្តាហ៍នេះថា ព្រះសង្ឃ ទឹម សាខន ជាសកម្មជនដែលលេចធ្លោជាងគេក្នុងការការពារសិទ្ធិពលរដ្ឋខ្មែរក្រោមទាំងនៅដែនដីកម្ពុជាក្រោមនិងនៅកម្ពុជាទើបត្រូវបានអាជ្ញាធរកម្ពុជាចោទប្រកាន់អំពីការធ្វើឲ្យខូចខាតប៉ះពាល់ដល់ទំនាក់ទំនងរវាងរដ្ឋាភិបាលកម្ពុជានិងរដ្ឋាភិបាលវៀតណាម និងថាប៉ុន្តែការចោទប្រកាន់នោះមិនត្រឹមត្រូវឡើយ ព្រះអង្គមិនគួរត្រូវចាប់ឃុំឲ្យនៅក្នុងផ្ទះបន្តទៀតនោះទេ៕