លោក ង៉ាន់ ចន្ថា នាយកកម្មវិធីប្រយុទ្ធប្រឆាំងជំងឺគ្រុនឈាននៃក្រសួងសុខាភិបាល មានប្រសាសន៍ថា បើប្រៀបធៀបពេលវេលាដូចគ្នាក្នុងរយៈពេល៤៤អាទិត្យក្នុងឆ្នាំ២០០៩នេះឃើញថា ជំងឺគ្រុនឈាមដែលកើតមានទៅលើកុមារ គឺមានចំនួនកើនឡើងជាង៣០% ប៉ុន្តែអត្រានៃការស្លាប់បាត់បង់ជីវិតរបស់កុមារ គឺមានការថយចុះប្រមាណ៤៥% បើប្រៀបធៀបពេលវេលាដូចគ្នាក្នុងឆ្នាំ២០០៨ កន្លងទៅ។
លោក ង៉ាន់ ថន្ថា មានប្រសាសន៍ដូច្នេះ ៖ «រយៈពេល៤៤អាទិត្យយើងឃើញថា មានចំនួនច្រើនជាងឆ្នាំ២០០៨កន្លងទៅ គឺច្រើនជាងប្រហែលជា៣០% ប៉ុន្តែចំនួនករណីស្លាប់គឺតិចជាងប្រហែលជា៤៥% គឺមានតែ៣៤នាក់ទេដែលបានស្លាប់បាត់បង់ជីវិតហ្នឹង»។
លោក ង៉ាន់ ចន្ថា បញ្ជាក់ឲ្យដឹងផងដែរថា សប្តាហ៍ទី៤៤ក្នុងឆ្នាំ២០០៩នេះ ជំងឺគ្រុនឈាមកើតមានចំនួន១១.២១៣ករណី និងស្លាប់ចំនួន៣៤នាក់។ ៤៤អាទិត្យដូចគ្នាក្នុងឆ្នាំ២០០៨ ជំងឺគ្រុនឈាមកើតមានចំនួន៨.២៥៦ករណីនិងស្លាប់ចំនួន៦០នាក់។
លោកបន្តឲ្យដឹងថា ដើម្បីទប់ស្កាត់ជំងឺគ្រុនឈាមកាត់បន្ថយការស្លាប់របស់កុមារបច្ចុប្បន្ននេះ ក្រសួងសុខាភិបាលបានបញ្ជូនមន្ត្រីជំនាញនៃកម្ពុជា វិធីប្រយុទ្ធប្រឆាំងជំងឺគ្រុនឈាមថ្នាក់ជាតិ ក៏ដូចជាថ្នាក់កណ្តាលចុះអប់រំប្រជាពលរដ្ឋនៅតាមមូលដ្ឋានខេត្តក្រុង ដែលបានជួបគ្រោះទឹកជំនន់ពេលកន្លងទៅនេះ ដើម្បីធ្វើការអប់រំនិងចែកជូនថ្នាំអាបែត សម្រាប់សម្លាប់ដង្កូវទឹកដែលជាភ្នាក់ងារចម្លងជំងឺគ្រុនឈាម ដើម្បីកាត់បន្ថយជំងឺគ្រុនឈាមនេះដោយមិនព្រងើយកន្តើយឡើយ។
លោកបញ្ជាក់ថា បច្ចុប្បន្ននេះមន្ត្រីកម្មវិធីប្រឆាំងជំងឺគ្រុនឈាម ក្រសួងសុខាភិបាលបានកំពុងបើកយុទ្ធនាការដាក់ថ្នាំអាបែតជំហានទី២ ដែលមានថ្នាំអាបែតចំនួន៩០តោនសម្រាប់ចែកជូនបងប្អូនប្រជាពលរដ្ឋនៅតាមខេត្តក្រុង ដែលងាយរងគ្រោះដោយជំងឺគ្រុនឈាមយ៉ាងសកម្មបំផុត។
លោក ង៉ាន់ ចន្ថា បានបញ្ជាក់ដូច្នេះ ៖ «យើងប្រើប្រាស់អាបែតប្រមាណជា៩០តោន។ ជំហានទី១យើងប្រើប្រាស់អស់១២៦តោន»។
ក្រសួងសុខាភិបាលបានឲ្យដឹងថា ជំងឺគ្រុនឈាមដែលរាតត្បាតធ្ងន់ធ្ងរជាងគេនៅកម្ពុជា គឺនៅក្នុងឆ្នាំ២០០៧ ដោយបានកើតមានចំនួន៣៨.៧៤២ករណី និងសម្រាប់សម្លាប់អស់ចំនួន៣៩៧នាក់៕