តំណាងក្រុមហ៊ុនឯកជនមួយរូបដែលសុំមិនបញ្ចេញឈ្មោះ បានថ្លែងនៅថ្ងៃច័ន្ទ ទី១៦ ខែវិច្ឆិកាថា ថ្វីត្បិតការដោះដូរពាណិជ្ជកម្មរវាងខ្មែរ-ថៃនៅមានដំណើរការជាធម្មតា ប៉ុន្តែក្នុងរយៈពេលចុងក្រោយនេះ ម្ចាស់ទំនិញជាច្រើនក្នុងប្រទេសកម្ពុជា បានកាត់បន្ថយការបញ្ជាទិញពី១០០% មកនៅត្រឹម៧០% សម្រាប់មុខទំនិញគ្រប់ប្រភេទ។
តំណាងក្រុមហ៊ុនឯកជនសុំមិនបញ្ចេញឈ្មោះមានប្រសាសន៍ដូច្នេះ ៖ «ការដោះដូរធម្មតា តែម្ចាស់ទំនិញគេមិនសូវកុម្ម៉ង់។ កាណាគេដាក់លុយច្រើន ឧបមាបិទព្រំដែនទៅ លុយហ្នឹងគេខាត។ ខ្សត់ខ្សោយជាងមុនខ្លះ កាត់បន្ថយខ្លះ ព្រោះម្ចាស់ទំនិញគេអត់សូវហ៊ានកុម្ម៉ង់ច្រើន ពីព្រោះខ្លាចមានបញ្ហាទៅធ្វើឲ្យខាតបង់លុយច្រើន ដូច្នេះកុម្ម៉ង់តិច»។
ប្រភពដដែលបានបន្តថា ក្រុមហ៊ុនធំៗជិត១០ដែលកំពុងរកស៊ីទទួលដឹកទំនិញចេញចូលពីប្រទេសថៃមកកម្ពុជា បានទទួលរងការកាត់បន្ថយការបញ្ជាទិញប្រហែលជា៣០% ដូចគ្នានឹងរយៈពេលចុងក្រោយនេះ ក្រោយពីប្រទេសទាំងពីរកាត់បន្ថយចំណងការទូត បញ្ហាព្រំដែន និងវិបត្តិសេដ្ឋកិច្ចសកលលោកផង។
ចំណែកឯលោក ខុង មិញ ជាប្រជាពលរដ្ឋម្នាក់រស់នៅស្រុកសំរោង ខេត្តឧត្តរមានជ័យ បានថ្លែងថា ប្រជាពលរដ្ឋនៅតាមតំបន់ព្រំដែនខ្មែរ-ថៃ បានពឹងផ្អែកស្ទើរទាំងស្រុងលើការនាំចូលទំនិញនានាពីប្រទេសថៃ។
លោក ខុង មិញ បានឲ្យដឹងដូច្នេះ ៖ «និយាយរួមទៅ ខ្មែរយើងមិនដឹងថា រកផលិតផលពីណាដែលអាចទិញបាន នៅតែបន្តទិញផលិតផលមកពីថៃហ្នឹង»។
លោក អ៊ុក វណ្ណចាន់ ប្រធានសាខាគយខេត្តប៉ៃលិន បានថ្លែងថា នៅច្រកផ្សារព្រំ ការដោះដូរពាណិជ្ជកម្មរវាងខ្មែរ-ថៃ នៅតែមានដំណើរការជាធម្មតា បើទោះបីកន្លងមកនេះមានបញ្ហាមួយចំនួនរវាងខ្មែរ-ថៃ បានកើតមានឡើងក៏ដោយ។
លោក អ៊ុក វណ្ណចាន់ បានថ្លែងដូច្នេះ ៖ «ទំនិញក៏ចេញចូលជាធម្មតា តាមស្ថានភាពតម្រូវការ។ វាថយនៅខាងប៉ោយប៉ែត ប៉ុន្តែខាងយើងនេះវាអត់ថយអីទេ»។
លោក ប្រាក់ សាំ ប្រធានប៉ុស្តិ៍នគរបាលច្រកបឹងត្រកួន បានថ្លែងដែរថា នៅច្រកបឹងត្រកួន ស្ថិតក្នុងឃុំគោករមៀត ខេត្តបន្ទាយមានជ័យ ថ្វីត្បិតស្ថានភាពទូទៅមានសភាពស្ងាត់ជាងមុនបន្តិច ប៉ុន្តែការដោះដូរទំនិញមានចូលតិចតួចជាធម្មតា ៖ «វាមានដូចអីវ៉ាន់ចាប់ហ៊ួយ យូរៗមកមួយឡានអ៊ីចឹងទៅ»។
តាមតួលេខការដោះដូរទំនិញខ្មែរ-ថៃ របស់ក្រសួងពាណិជ្ជកម្មកម្ពុជា ហើយត្រូវបានប្រកាសជាសាធារណៈ ដោយលោកនាយករដ្ឋមន្ត្រី ហ៊ុន សែន កាលពីពេលថ្មីៗនេះ នៅឯព្រលានយន្តហោះអន្តរជាតិភ្នំពេញ ទំនិញគ្រប់ប្រភេទរបស់ថៃ ដែលនាំចូលកម្ពុជាកាលពីឆ្នាំ២០០៨ មានរហូត២.០០០លានដុល្លារ និងទំនិញកម្ពុជានាំទៅថៃមានតែ៩០លានដុល្លារទេ៕