ប្រភពពីឈ្មួញរកស៊ីជួញដូរស្រូវបានថ្លែងនៅថ្ងៃសុក្រ ទី២៧ ខែវិច្ឆិកា ថា ការនាំស្រូវទៅលក់ក្នុងប្រទេសថៃមួយថ្ងៃមានប្រហែលជា៣០តោន ត្រូវបានគេដឹកចេញតាមច្រករបៀងនានា ក៏ប៉ុន្តែស្រូវខ្មែរដែលនាំទៅលក់ក្នុងដីថៃ ១គីឡូក្រាមបានថ្លៃ១១បាត ថោកជាងស្រូវថៃដែលមានតម្លៃ១គីឡូក្រាម ១៣បាត ៖ «ថៃគ្នាគេ គេទិញ១៣(បាត) គេទិញខ្មែរយើង គេទិញតែ១១ទេ»។
ទាក់ទិននឹងបញ្ហានេះ លោក ប្រាក់ សាំ ប្រធានប៉ុស្តិ៍នគរបាលច្រកបឹងត្រកួន បានថ្លែងថា មូលហេតុឈ្មួញថៃទិញស្រូវខ្មែរថោកជាងស្រូវថៃ គឺដោយសារមានការតវ៉ាពីពលរដ្ឋថៃដែលជាម្ចាស់កសិផលក្នុងស្រុក។
លោក ប្រាក់ សាំ បានបញ្ជាក់ថា ៖ «ដោយឡែករឿងច្រករបៀងការឆ្លងកាត់ អាហ្នឹងសមត្ថកិច្ចភាគីថៃគេថា មានការហាមឃាត់មួយចំនួន មានការលួចលាក់ចូលមួយចំនួន វាអ៊ីចឹងណា៎!»។
ប្រភពពីក្រុមអ្នករកស៊ីស្រូវបានឲ្យដឹងថា ពួកគេបានប្រមូលទិញស្រូវពីកសិករខ្មែរក្នុង១គីឡូក្រាមថ្លៃ១០បាត ហើយការយកស្រូវទៅលក់ក្នុងប្រទេសថៃគឺនៅតែបន្ត ទោះបីក្រុមឈ្មួញថៃឲ្យតម្លសស្រូវខ្មែរថោកជាងស្រូវរបស់ថៃក៏ដោយ។
លោក ហេង ប៊ុនហោ ប្រធានមន្ទីរកសិកម្មខេត្តបន្ទាយមានជ័យ បានថ្លែងថា ប្រជាកសិករខ្មែរបានចាប់ផ្តើមប្រមូលផលស្រូវស្រាលច្រូតកាត់ស្ទើរតែទាំងស្រុង ចំណែកឯក្រុមឈ្មួញនៅតែបន្តដឹកទៅលក់នៅក្នុងប្រទេសថៃជាធម្មតា។
លោក ហេង ប៊ុនហោ បានមានប្រសាសន៍ថា ៖ «អ៊ីចឹងវាមានការលក់ចេញតាមច្រករបៀងហ្នឹង ជាធម្មតាទេ អត់មានអ្វីជាការកត់សម្គាល់អីធំដុំនៅឡើយទេ»។
លោក ភូ ពុយ ប្រធានសមាគមរោងម៉ាស៊ីនកិនស្រូវកម្ពុជា បានថ្លែងថា សមាគមរោងម៉ាស៊ីនកិនស្រូវកម្ពុជាបានប្រមូលទិញស្រូវក្នុងស្រុកបានតែប្រមាណពី២៥%ទៅ៣០%ប៉ុណ្ណោះ។
លោក ភូ ពុយ បានថ្លែងថា ៖ «យើងប្រមូលស្តុកប្រហែលជា២៥ទៅ៣០% យើងប្រមូលចូលស្តុកនៅក្នុងស្រុក រីឯ ៧០%ទៀតវានឹងហូរចេញ»។
លោកប្រធានសមាគមបានបន្តថា តម្លៃស្រូវសើមគឺសមាគមទិញក្នុង១តោនថ្លៃ១.១៥០.០០០រៀល ចំណែកឯតម្លៃស្រូវស្ងួតក្នុង១តោនស្រូវ ទិញក្នុងតម្លៃ១លាន៣សែនរៀល។
ទិន្នផលស្រូវក្នុងប្រទេសកម្ពុជាដែលបញ្ជាក់ដោយសមាគមរោងម៉ាស៊ីនកិនស្រូវកាលពីឆ្នាំ២០០៨ មានជាង៧លានតោន។
លោក ភូ ពុយ ប្រធានសមាគមរោងម៉ាស៊ីនកិនស្រូវកម្ពុជា បានថ្លែងថា នៅឆ្នាំ២០១០ខាងមុខនេះ សមាគមមានគម្រោងប្រមូលទិញស្រូវពីកសិករខ្មែរឲ្យច្រើន ដើម្បីកែច្នៃនាំចេញទៅទីផ្សារពិភពលោក ហើយទប់ស្កាត់ការនាំស្រូវចេញទៅលក់នៅប្រទេសជិតខាង។
ចំណែកកសិករខ្មែរវិញ បញ្ហាដែលកំពុងព្រួយបារម្ភគឺតម្លៃស្រូវដែលឈ្មួញទិញក្នុងស្រុកនិងក្រៅស្រុកនៅតែមានតម្លៃទាប មិនស្មើនឹងតម្លៃស្រូវក្នុងទីផ្សារពិភពលោកឡើយ៕