លោក ទូច ណារ៉ុថ ស្នងការប៉ូលិសក្រុងភ្នំពេញ បានមានប្រសាសន៍ឲ្យដឹងថា ការផ្សព្វផ្សាយនេះបានទទួលការយល់ព្រមពីលោកអគ្គស្នងការប៉ូលិសជាតិ ហុក ឡងឌី និងដើម្បីទទួលបានការសហការពីប្រជាពលរដ្ឋក្នុងការចាប់ឃាតករមកផ្ដន្ទាទោសតាមច្បាប់។
លោក ទូច ណារ៉ុថ មានប្រសាសន៍ដូច្នេះថា ៖ «ករណី ឃឹម សម្បូរណ៍ យើងបានសហការជាមួយ អេហ្វ.ប៊ី.អាយ (FBI) ឥឡូវ អេហ្វ.ប៊ី.អាយ បានត្រឡប់ទៅវិញ ហើយក៏នៅបន្តដែរ ជាពិសេស យើងបានធ្វើការផ្សព្វផ្សាយជារូបគំនូរដែល អេហ្វប៊ីអាយ បានសហការជាមួយយើងក្នុងការគូរនេះ ទៅតាមកាសែត ក៏ដូចជាទូរទស្សន៍ដើម្បីផ្សព្វផ្សាយឲ្យប្រជាពលរដ្ឋយើងចូលរួមសហការជាមួយយើងក្នុងការស្រាវជ្រាវតាមដានរកមុខសញ្ញាដែលគេចខ្លួន»។
លោក ដាំ សិទ្ធិ ចាងហ្វាងកាសែតមនសិការខ្មែរ បានមានប្រសាសន៍ឲ្យដឹងថា មកទល់ពេលនេះ រូបលោកនៅតែមានការភ័យខ្លាចចំពោះសន្តិសុខផ្ទាល់ខ្លួន ព្រោះអាជ្ញាធរមិនទាន់បានរកឃើញនិងចាប់ខ្លួនឃាតករដែលបានបាញ់សម្លាប់លោក ឃឹម សម្បូរណ៍ ដែលជាអ្នកសរសេរព័ត៌មានឲ្យកាសែតមនសិការរបស់លោកនៅឡើយ។
លោក ដាំ សិទ្ធិ ថ្លែងដូច្នេះថា ៖ «មកដល់ពេលនេះ ខ្ញុំនៅតែមានការព្រួយបារម្ភអំពីសន្តិសុខនិងសុវត្ថិភាពរបស់ខ្ញុំ ក៏ដូចជាសន្តិសុខ សុវត្ថិភាពរបស់សហការីដែលធ្វើការនៅកាសែតមនសិការខ្មែរជានិច្ច ដោយសារករណីលោក ឃឹម សម្បូរណ៍ ធ្វើឲ្យមានការចងចាំនូវការភ័យខ្លាចអំពីសុវត្ថិភាពសន្តិសុខគ្រប់ៗគ្នានៅក្នុងកាសែតមនសិការខ្មែរ»។
លោក ដាំ សិទ្ធិ បានមានប្រសាសន៍ឲ្យដឹងថា ក្នុងពេលមន្រ្តីស៊ើបអង្កេតរបស់ FBI មកកម្ពុជានោះ រូបលោកបានជួបជាមួយ ហើយបានផ្តល់ព័ត៌មានមួយចំនួនដែលលោកបានដឹងទាក់ទងនឹងលោក ឃឹម សម្បូរណ៍ ឲ្យទៅភ្នាក់ងារនោះផងដែរ ៖ «គាត់បានជួបខ្ញុំ លោក FBI គាត់បានមកជាមួយប៉ូលិសខណ្ឌ៧មករាម្នាក់ ហើយនិងម្នាក់ទៀត បើខ្ញុំមើលទៅ ប្រហែលជាប៉ូលិសក្រុង គឺប៉ូលិសខ្មែរពីររូប និង FBI ម្នាក់ ហើយនិងអ្នកបកប្រែស្ថានទូតអាមេរិកម្នាក់»។
លោក ឃឹម ឡូរ៉ង់ ដែលជាប្អូនបង្កើតរបស់លោក ឃឹម សម្បូរណ៍ បានមានប្រសាសន៍ឲ្យដឹងថា មកទល់ពេលនេះ លោកមិនទាន់បានទទួលព័ត៌មានអ្វីថ្មី ទាក់ទងនឹងការបាញ់សម្លាប់បងប្រុសរបស់លោកនៅឡើយទេ។
លោក ឃឹម សម្បូរណ៍ ជាមួយកូនប្រុស បានត្រូវឃាតករបាញ់សម្លាប់កាលពីថ្ងៃទី១១ កក្កដា ឆ្នាំ២០០៨ នៅក្បែរពហុកីឡដ្ឋានអូឡាំពិក នៅពេលលោកជាមួយនឹងកូនប្រុសបានចេញពីហាត់ប្រាណពេលល្ងាច។
ប៉ូលិសបានសន្និដ្ឋានជាជំហានដំបូងថា ការបាញ់សម្លាប់លោក ឃឹម សម្បូរណ៍ ទាក់ទងជាមួយគំនុំផ្ទាល់ខ្លួន ចំណែកមតិប្រជាពលរដ្ឋមួយចំនួនយល់ថា ការបាញ់សម្លាប់នេះដោយសារលោក ឃឹម សម្បូរណ៍ ហ៊ានសរសេរអត្ថបទក្នុងកាសែតប្រឆាំងរិះគន់និងប៉ះពាល់សកម្មភាពខុសច្បាប់របស់អ្នកមានអំណាច៕