លោកស្រី មូរ សុខហួរ បានមានប្រសាសន៍តាមទូរស័ព្ទប្រាប់វិទ្យុអាស៊ីសេរីថា ការតម្កល់រឿងរបស់តុលាការនេះ គឺអាចធ្វើឡើងដោយមិនមានឯករាជភាពឡើយ ៖ «ខ្ញុំក៏កត់សម្គាល់មួយ គឺថា ម្សិលមិញ តុលាការទើបតែបានធ្វើការសម្ភាសសួរទៅសម្ដេចនាយក ហើយខ្ញុំចង់សួរថាតើតុលាការមានការស៊ើបអង្កេតរបៀបណា មានសាក្សីឬទេ។ល។ នេះត្រូវតែបង្ហាញឲ្យឃើញទាំងអស់ មុននឹងច្រានចោលនូវករណីនេះ»។
នៅព្រឹកថ្ងៃពុធ ទី១០ មិថុនានេះ លោក ហ៊ឹង ប៊ុនជា ព្រះរាជអាជ្ញារងនៃអយ្យកាអមសាលាដំបូងរាជធានីភ្នំពេញ បានចេញលិខិតជូនដំណឹងមួយដល់មេធាវីរបស់លោកស្រី មូរ សុខហួរ ដោយបញ្ជាក់ថា ពាក្យបណ្តឹងចុះថ្ងៃទី២៧ ខែមេសា ឆ្នាំ២០០៩ ដែលប្តឹងលោកនាយករដ្ឋមន្រ្តី ហ៊ុន សែន ពីបទបរិហារកេរ្តិ៍និងជេរប្រមាថនោះគឺសម្រេចតម្កល់សំណុំរឿងទុកឥតចាត់ការ។
មិនអាចទាក់ទងព្រះរាជអាជ្ញាសាលាដំបូងរាជធានីភ្នំពេញដើម្បីពន្យល់ពីមូលហេតុដែលតម្កល់រឿងក្តីមិនចាត់ការចំពោះពាក្យបណ្តឹងប្តឹងលោកនាយករដ្ឋមន្រ្តី ហ៊ុន សែន នៅថ្ងៃនេះបានទេ។
លោក គង់ សំអុន មេធាវីរបស់លោកស្រី មូរ សុខហួរ បានមានប្រសាសន៍ថា តាមនីតិវិធីគឺនឹងអាចធ្វើការប្តឹងឧទ្ធរណ៍ចំពោះករណីនេះ ប៉ុន្តែនៅមិនទាន់មានការសម្រចយ៉ាងណាទេ។
រីឯលោក គី តិច មេធាវីរបស់លោកនាយករដ្ឋមន្រ្តី ហ៊ុន សែន វិញ បានមានប្រសាសន៍ប្រាប់វិទ្យុអាស៊ីសេរីថា ពាក្យបណ្តឹងរបស់លោកនាយករដ្ឋមន្រ្តី ហ៊ុន សែន ប្តឹងលោកស្រី មូរ សុខហួរ ពីបទបរិហារកេរ្តិ៍នោះវិញ គឺមិនឈប់ដូច្នេះទេ ៖ «រឿងសម្ដេចប្ដឹងជំទាវ មូរ សុខហួរ កំពុងតែចាត់ការតទៅមុខ។ អត់ទាន់មានលទ្ធផលយ៉ាងម៉េចទេ ព្រោះតុលាការកំពុងដំណើរការនីតិវិធី»។
លោក នី ចរិយា ប្រធានផ្នែកស៊ើបអង្កេតនៃសមាគមសិទ្ធិមនុស្សឈ្មោះ អាដហុក បានមានប្រសាសន៍ចំពោះករណីនេះថា ៖ «ហ្នឹងហើយដែលជាបញ្ហាធ្វើឲ្យមានការមើលទៅ ឬក៏គេមើលទៅឃើញថា មានលក្ខណៈមិនទាន់ឯករាជនៅឡើយក្នុងការចាត់វិធានការរបស់តុលាការ»។
គួរបញ្ជាក់ថា លោកស្រី មូរ សុខហួរ បានប្តឹងលោកនាយករដ្ឋមន្ត្រី ហ៊ុន សែន ពីបទបរិហារកេរ្តិ៍ បន្ទាប់ពីលោកនាយករដ្ឋមន្ត្រីបានមានប្រសាសន៍នៅឯខេត្តកំពត កាលពីខែមេសា ដោយចំហ ដែលថា «មានស្រ្តីជើងខ្លាំងម្នាក់ពូកែរករឿងគេ គឺរត់ទៅឱបគេសោះ ថាគេប្រឡេះឡេវអាវ»។
នៅពេលជាមួយគ្នានេះដែរ លោកនាយករដ្ឋមន្រ្តី ហ៊ុន សែន ក៏បានប្តឹងលោកស្រី មូរ សុខហួរ ពីបទបរិហារកេរ្តិ៍វិញ ក្រោយពេលដែលលោកស្រីនិងមេធាវីបានធ្វើសន្និសីទកាសែតមួយដោយចោទប្រកាន់ពីកំហុសរបស់លោក មុនការដាក់ពាក្យបណ្តឹងទៅតុលាការនោះ៕