យោធាម្នាក់នៅខែត្រស្ទឹងត្រែងចោទថាមេបញ្ជាការដកតួនាទី
ដោយ សុខ សេរី
2009-11-10
មន្រ្តីយោធាព្រំដែនម្នាក់នៃវរ៧០១ ដែលមានតួនាទីជានាយរងប៉ុស្តិ៍រដ្ឋបាលនៅឃុំកោះឫស្សី ស្រុកសៀមប៉ាង ខេត្តស្ទឹងត្រែង បានចោទប្រកាន់ថា មេបញ្ជាការរបស់លោកបានដកតួនាទីឬព្យួរការងាររបស់លោក ដោយសារតែលោកបានបាញ់គំរាមមិនឲ្យឈ្មួញជនជាតិលាវនិងខែ្មរមួយចំនួនចូលកាប់ឈើខុសច្បាប់នៅក្នុងតំបន់សរវាងកម្ពុជានិងលាវកន្លងទៅថ្មីៗនេះ។
មន្រ្តីយោធាដែលរងការចោទប្រកាន់នោះបានពន្យល់ថា លោកមិនបានដកឬព្យួរការងារនោះទេ ដោយសារតែកម្លាំងយោធារូបនោះបានដើរចោលការងារជាច្រើនឆ្នាំដោយគ្មានមូលហេតុ។
មន្រ្តីយោធាដែលសុំមិនបញ្ចេញឈ្មោះបានប្រាប់វិទ្យុអាស៊ីសេរីថា កាលពីពេលថ្មីៗនេះលោកបានចាប់ឃាត់ខ្លួនជនជាតិលាវចំនួន៥នាក់សាកសួរចម្លើយ និងបានបាញ់ព្រមានចំពោះក្រុមផ្សេងទៀតមិនឲ្យកាប់ឈើខុសច្បាប់នៅទីនោះ ប៉ុន្តែលោកបានរងការព្យួរការងារទៅវិញ។
មន្ត្រីយោធាដដែលបានបញ្ជាក់ថា ៖ «ខ្ញុំប្រើប្រាស់របស់ដែលជារបស់តួនាទីជានាយរង ដូចជាតេអូ ឯកសារ អាវុធអីៗនៅក្នុងប៉ុស្តិ៍ហ្នឹង អត់ឲ្យយើងប្រើប្រាស់បានទេ។ គាត់ទៅប្រជុំជាមួយកូនចៅហ្នឹង គាត់ថាកុំឲ្យស្ដាប់បញ្ជារបស់ខ្ញុំ ថាគាត់មេបញ្ជាការអីបញ្ឈរជើង»។
សុខ សេរី ៖ ការដែលបញ្ឈរជើងហ្នឹងក្នុងខែណា? មន្ត្រីយោធា ៖ ក្នុងខែ១០។
លោក ស៊ុន បាន ជាមេបញ្ជាការនៃវរ៧០១នៅក្នុងភូមិអូរស្វាយ ឃុំអូរស្វាយ ស្រុកថាទ្បាបរិវ៉ាត់ ខេត្តស្ទឹងត្រែង ដែលរងការចោទប្រកាន់ខាងលើនេះ បានមានប្រសាសន៍បំភ្លឺថា កម្លាំងយោធារូបនោះបានដើរចេញពីការងារចំនួន២ឆ្នាំមកហើយដោយគ្មានមូលហេតុ និងមានការបាញ់គំរាមទៅលើអ្នកកាប់ឈើដោយមិនបានណែនាំជាមុន។
លោក ស៊ុន បាន មានប្រសាសន៍ថា ៖ «អត់ទេ មិនមែនខ្ញុំដកទេ គ្រាន់តែថាអ៊ីចេះ កន្លងមកហ្នឹងគាត់អវត្តមានពីការងារមួយរយៈ ប៉ុន្មានឆ្នាំហើយ។ អវត្តមានប៉ុន្មានឆ្នាំអ៊ីចឹង ដល់ពេលចូលធ្វើការវិញមានបញ្ហាបន្តិចបន្តួច ខ្ញុំអញ្ជើញគាត់មកនៅជាជំនួយការខ្ញុំនៅទីបញ្ជាការវរ។ មានបញ្ហាគាត់បានធ្វើអំពើបាញ់បោះអី បង្កចលាចលពេញហ្នឹង ដល់អ៊ីចឹងខ្ញុំអញ្ជើញគាត់មក មិនមែនខ្ញុំថាដកគាត់ទេ»។
លោក វ៉ា គឹមហុង ប្រធានគណៈកម្មការដោះស្រាយវិវាទព្រំដែនកម្ពុជា និងជាមន្រ្តីជំនាញព្រំដែន បានមានប្រសាសន៍ថា ប្រទេសកម្ពុជានិងលាវមានព្រំដែនជាប់គ្នាប្រវែងសរុបជាង៥០០គីឡូម៉ែត្រ មានតំបន់ខ្លះត្រូវបានដោះស្រាយរួចហើយ និងមានតំបន់ខ្លះទៀតរង់ចាំការដោះស្រាយជាបន្តទៀត។
លោក វ៉ា គឹមហុង បានថ្លែងថា ៖ «មិនទាន់បញ្ចប់ទេ យើងនៅមានបញ្ហាត្រូវដោះស្រាយច្រើនទៀត តាមផ្លូវទឹកនិងតាមផ្លូវគោក នៅច្រើនកន្លែង»។
សុខ សេរី ៖ បង្គោលឡាក់៩៩ ឮថាមានបញ្ហាកាប់ឈើកាប់អីពីជនជាតិលាវ? វ៉ា គឹមហុង ៖ ទេ ខ្ញុំដូចអត់មានរបាយការណ៍អ៊ីចឹងផង។
សុខ សេរី ៖ អ៊ីចឹងលោកនឹងពិនិត្យមើលទេបញ្ហាមានការកាប់ឈើនៅតំបន់ស? វ៉ា គឹមហុង ៖ អត់មានតំបន់សទេ... បោះបង្គោលគឺបោះបង្គោលហើយ! កន្លែងណាដែលមិនទាន់បោះបង្គោល យើងមិនត្រូវរ៉ូវគ្នា យើងនៅបន្តការចរចាទៅទៀត។
ប្រភពពីអតីតនាយរងប៉ុស្តិ៍រដ្ឋបាលព្រំដែនកម្ពុជានិងលាវបានឲ្យដឹងថា កន្លងមកក្នុងដែនគ្រប់គ្រងរបស់លោកប្រវែង៥៨គីឡូម៉ែត្រ គឺត្រង់ចំណុចបង្គោលលេខ៩៩ជាតំបន់ស គឺមានបញ្ហាជាច្រើនដូចជាជនជាតិលាវបានចូលមករុករករ៉ែ និងថ្មីៗនេះគេបានចូលមកកាប់ឈើប្រណីតខុសច្បាប់ជាក្រុមៗរវាងពី៤ទៅ៥នាក់៕
អត្ថបទដែលទាក់ទង
អ្នករត់តាក់ស៊ីនៅបន្ទាយមានជ័យប្ដឹងក្រុមហ៊ុនពីបទធ្វើឲ្យខូចខាតរថយន្ត
ពលរដ្ឋនៅកំពង់ឆ្នាំងត្រេកអរចំពោះការបង្រ្កាបវង់ល្បែង
បដិមាព្រះវិស្ណុនិងព្រះនាងលក្សី្មត្រូវគេប្រទះឃើញនៅកំពង់ចាម
កម្មការិនីម្នាក់ត្រូវគេសង្ស័យថាស្លាប់ដោយសារខំធ្វើការខ្លាំងពេក
អំពើហិង្សានិងការរំលោភផ្លូវភេទកើនឡើងក្នុងឆ្នាំ២០០៩
អ្នកភូមិនៅស្រុកកណ្ដាលស្ទឹងរង់ចាំលទ្ធផលពីការចរចាតម្លៃអគ្គិសនី
អាជ្ញាធរខែត្រកណ្ដាលរារាំងការតវ៉ាពីបញ្ហាភ្លើងឡើងថ្លៃ
ប៉ូលិសប៉ុស្តិ៍នៅអន្លង់វែងរងការចោទថាអនុវត្តច្បាប់មិនសមរម្យ
អ្នកភូមិស្នើសុំធ្វើស្រែលើដីដែលអាជ្ញាធរហាមឃាត់ឡើងវិញ
ស្រ្ដីម្នាក់អះអាងថាជាម្ដាយបង្កើតរបស់កុមារីដែលត្រូវម្ដាយចិញ្ចឹមធ្វើបាប
មតិ
បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួលនិងអាចចុះផ្សាយបានយោងតាមលក្ខខណ្ឌនៃការប្រើប្រាស់របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរីមិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។
មើលមតិទាំងអស់.