លោកស្រី សុន សំអាត រស់នៅភូមិដំណាក់ដង្កោ ឃុំក្តុលតាហែន ត្រូវជាប្រពន្ធជនរងគ្រោះបានចោទថា កាលពីថ្ងៃទី១ ខែវិច្ឆិកា វេលាម៉ោង៦:៣០នាទីល្ងាច លោក ស៊ីម ប៊ុនជឿន មេបញ្ជាការរងគ៣នៃវរសេនាតូច៥៣៣ នៅស្រុកភ្នំព្រឹក ខេត្តបាត់ដំបង បានវាយក្បាលប្តីលោកស្រីបណ្តាលឲ្យរបួសធ្ងន់។
លោកស្រីបញ្ជាក់ថា ប្តីគាត់គ្រាន់តែតពាក្យសម្ដីក្នុងរឿងសុំបើកប្រាក់ខែនិងការសុំដូរមនុស្សមកជំនួសវេនយាមប៉ុណ្ណោះ។
លោកស្រី សុន សំអាត បានឲ្យដឹងថា ៖ «គាត់(ប្ដី)ថា បើសិនជាថ្ងៃទី១០ហ្នឹងខ្ញុំអត់បានមកទេ ប្រពន្ធខ្ញុំឈឺ ឥឡូវខ្ញុំសុំបងសួរឈ្មោះគេដាក់ប្រចាំការជំនួស បានដែរឬអត់? រួចទៅ ស៊ីម ប៊ុនជឿន ឆ្លើយមកគាត់វិញថា អ្ហែងប្រយ័ត្នអញដកឈ្មោះចេញ! គាត់ថាអ្ហែងអាងអី? ប្តីខ្ញុំថា ខ្ញុំធ្វើទាហានយូរណាស់ហើយ ខ្ញុំអត់ដែលអាងអ្នកណាទេ! ប្តីខ្ញុំក៏ក្រោកដើរចេញមកវិញមក គេដើរតាមពីក្រោយមក គេវ៉ៃបណ្តោយហ្នឹង»។
លោក ស៊ីម ប៊ុនជឿន មេបញ្ជាការរងគ៣នៃវរសេនាតូច៥៣៣ មិនអាចទាក់ទងសុំការបំភ្លឺជុំវិញរឿងនេះបានទេ។ ប៉ុន្តែលោក សេះ ស ហៅ តាម៉ៅ ជាមេបញ្ជាការនោះបានថ្លែងថា ៖ «អានោះវាមិនសូវចូល ដល់ពេលណែនាំទៅវាចេះតែតមាត់។ វ៉ៃហើយចុងក្រោយវាថា សងសឹកទេ? សងសឹក អានោះថែមបីដៃទៀត»។
លោក យិន ម៉េងលី មន្ត្រីស៊ើបអង្កេតសមាគមអាដហុកបានថ្លែងថា ការតវ៉ារបស់លោក ឃិន សង គឺជាការតវ៉ាត្រឹមត្រូវ។
លោក យិន ម៉េងលី បានបញ្ជាក់ថា ៖ «បទបញ្ជាឬវិន័យរបស់កងយោធពលខេមរភូមិន្ទមិនមែនវ៉ៃរបៀបនេះទេ អ៊ីចឹងអ្នកដែលប្រព្រឹត្តត្រូវតែសងនូវសំណង និងត្រូវតែធ្វើការផ្តន្ទាទោសតាមផ្លូវច្បាប់»។
លោក ឃិន សង មានឋានៈជាពលបាលឯកនៃអង្គភាពខាងលើ កំពុងសម្រាកព្យាបាលនៅមន្ទីរពេទ្យយោធភូមិភាគ៥។ ក្រោយពីបញ្ជូនចេញមកពីមន្ទីរពេទ្យបង្អែកស្រុកបវេល លោកបានបញ្ជាក់ថា លោកមានអាការៈឈឺក្បាល ស្រវាំងភ្នែកមើលមិនឃើញ៖ «វ៉ៃដៃឡើងបែកអំពិលអំពែក សន្លប់រួចហើយកាច់កទៀត...»។
ភរិយាលោក ឃិន សង បានថ្លែងថា មេបញ្ជាការយោធាចំណុះឲ្យយោធភូមិភាគ៥ បានប្រាប់លោក ស្រីកុំឲ្យផ្សព្វផ្សាយរឿងខាងលើនេះជាសាធារណៈ បើពុំដូច្នេះទេគេនឹងដកលុយ៦០ម៉ឺនរៀលនិងអង្ករបីការ៉ុង ដែលក្រុមមេបញ្ជាការយោធាបានប្រគល់ឲ្យនោះយកទៅវិញ។
លោក យិន ម៉េងលី បានថ្លែងថា សមាគមអាដហុកនឹងបើកការស៊ើបអង្កេតជួយគ្រួសារជនរងគ្រោះដាក់ពាក្យបណ្តឹងទៅលោក ប៊ុន សេង មេបញ្ជាការយោធភូមិភាគ៥ នៅថ្ងៃទី១០ ខែវិច្ឆិកា ទាមទារឲ្យមានការចាត់ការតាមផ្លូវច្បាប់ចំពោះលោក ស៊ីម ប៊ុនជឿន មានឋានៈជាមេបញ្ជាការរង និងផ្តល់យុត្តិធម៌ឲ្យជនរងគ្រោះ៕