ក្រុមយោធាបន្តដុតបំផ្លាញផ្ទះអ្នកភូមិក្នុងជម្លោះដីនៅខែត្រកំពត
ដោយ អ៊ុក សាវបូរី
2008-11-19
ក្រុមយោធាបន្តដុតផ្ទះសេសសល់ជាង២០០ខ្នងចោលទាំងស្រុងក្នុងភូមិអន្លង់ក្រោម ឃុំតាកែន ស្រុកឈូក ខេត្តកំពត បន្ទាប់ពីពួកគេបានបណ្តេញអ្នកស្រុកឲ្យចេញពីដីដោយប្រើហិង្សាក្នុងវិវាទដីធ្លី។
ស្រ្តី (ឆ្វេង) និងកូន (ស្ដាំ) ឈរក្បែរផ្ទះរបស់ខ្លួនដែលត្រូវអាជ្ញាធរខេត្តកំពតដុតបំផ្លាញ នាថ្ងៃទី១៧ វិច្ឆិកា ២០០៨។
ប្រធានក្រុម៥០ខ្នង ភូមិអន្លង់ក្រោម លោក ហុង ចាន់ថា អះអាងនៅថ្ងៃអង្គារ ទី១៨ ខែវិច្ឆិកាថា ផ្ទះអ្នកស្រុកត្រូវកងយោធាដុតឲ្យឆេះគ្មានសល់នៅថ្ងៃនេះ ៖ «ឥឡូវនេះឆេះទាំងស្រុង សរុបប្រហែលជាជាង២០០ខ្នង»។
លោក ហុង ចាន់ថា បន្តថា ភូមិអន្លង់ក្រោមនេះជាតំបន់ត្រីកោណដែលមានព្រំប្រទល់ជាប់បីខេត្ត រួមមានខេត្តកំពត ខេត្តកំពង់ស្ពឺ និងខេត្តកោះកុង។ ភូមិនោះបានកើតពីមុនឆ្នាំ២០០០ មានប្រជាជនរស់នៅដំបូងជាង១២០គ្រួសារ ក្រោយពីលោក ហ៊ុន សែន បានកសាងទំនប់តាកែន កោះស្លាមក ប្រជាជនបានចូលទៅរស់នៅថែមទៀតកើនចំនួនដល់ទៅជាង៣០០គ្រួសារ។
លោកថា អ្នកដែលចូលទៅនៅក្នុងតំបន់នោះភាគច្រើនគ្មានដីសម្រាប់រស់នៅក្នុងបណ្តាខេត្តផ្សេងៗ ខ្លះជាអតីតយោធារត់ចោលជួរ ខ្លះជាយោធារំសាយដែលរដ្ឋមិនចែកដីឲ្យ បានចូលទៅប្រមូលគ្នារស់នៅភូមិនោះ។
លោកអះអាងថា ដីភូមិអន្លង់ក្រោមនោះជាដីឧទ្យានជាតិបូកគោដែលមានជីជាតិអាចឲ្យអ្នកស្រុកដាំដុះកសិកម្មបានផលច្រើន។ អ្នកស្រុកចេះតែចូលទៅរស់នៅទីនោះ ហើយក៏មានការបណ្តេញចេញជាបន្តបន្ទាប់ ប៉ុន្តែមនុស្សគ្មានជម្រកចេះតែទ្រាំរស់នៅរហូតមកទល់ពេលនេះ។
បុរសឈ្មោះ វុត្ថា មានប្រសាសន៍ថា គាត់គ្មានដីរស់នៅក្នុងស្រុកគិរីវង់ ខេត្តតាកែវ បន្ទាប់ពីកូនៗបែកមានប្តីប្រពន្ធត្រូវចែកដីឲ្យគេរស់នៅ។ គាត់បានចូលទៅរស់នៅភូមិអន្លង់ក្រោមនោះ សង់ផ្ទះ ដាំដំណាំ រស់នៅបានជាងបីឆ្នាំហើយ។ នៅថ្ងៃនេះផ្ទះគាត់ត្រូវយោធាបានដុតចោលទាំងស្រុង ឆេះអស់ទាំងស្បៀង អស់ទាំងទ្រព្យសម្បត្តិសន្សំទុកយូរមកហើយគ្មានសល់ឡើយ។
លោក វុត្ថា បានឲ្យដឹងថា ៖ «គេមកប្រើអំណាច ហើយដុត អត់មានឲ្យដំណឹងប្រជាពលរដ្ឋ អង្វរតថ្លៃអីក៏មិនបាន មិនទាំងសួរផងហើយចាប់វ៉ៃ ចាប់ដុត»។
ក្រុមអ្នករបួសធ្ងន់បីនាក់ដែលកំពុងសម្រាកក្នុងមន្ទីរពេទ្យខេត្តកំពង់ស្ពឺអះអាងថា គាត់រស់នៅតាមចិញ្ចើមផ្លូវផ្សារពិចនិល។ នៅពេលឃើញដីទំនេរក្នុងតំបន់ឧទ្យានជាតិបូកគោបាននាំគ្នាទៅរស់នៅទីនោះ ស្រាប់តែរងនូវការបណ្តេញចេញពីក្រុមបរិស្ថាននិងកងយោធារហូតប្រើហិង្សាកាលពីថ្ងៃច័ន្ទ ទី១៧ ខែវិច្ឆិកា ឆ្នាំ២០០៨ ឲ្យពួកគាត់មានរបួសធ្ងន់ ក្បាល ភ្នែក ជើង ឆ្អឹងជំនីរ បាក់ធ្មេញ គ្រាំក្នុងស្ទើរមិនអាចទ្រាំរស់បាន ៖ «បែកក្បាលហូរឈាម ប្រហែលជាប៉ះពាល់ដល់ភ្នែក ត្រូវគេបុកមួយកាំភ្លើងចំឆ្អឹងជំនីរ»។
មន្រ្តីការពារសិទ្ធិមនុស្សខេត្តកំពត អ្នកស្រី ទ្រី ឈូន និងមន្រ្តីការពារសិទ្ធិមនុស្សខេត្តកំពង់ស្ពឺ លោក រត្ថាវី ឲ្យដឹងថា នឹងបន្តឃ្លាំមើលជម្លោះដីនៅភូមិអន្លង់ក្រោមតទៅទៀត ៖ «ពួកក្រុមយោធាដែលបណ្ដេញពួកគាត់ហ្នឹង គឺគាត់យកលេសពាក្យអភិវឌ្ឍន៍មកដាក់ពីមុខទេ តាមពិតទៅគឺដីដែលគេរឹបអូសយកពីប្រជាជនហ្នឹង គឺដើម្បីយកទៅបែងចែកឲ្យបក្សពួករបស់ពួកគេដែលជាអ្នកដែលមានអំណាចក្នុងជួរកងទ័ពតែប៉ុណ្ណោះទេ»។
វិទ្យុអាស៊ីសេរីមិនអាចទាក់ទងក្រុមយោធារងនូវការចោទខាងលើសុំការបំភ្លឺបានឡើយនៅថ្ងៃនេះ៕
អត្ថបទដែលទាក់ទង
ក្រសួងមហាផ្ទៃស្នើសុំឲ្យអាជ្ញាធរខែត្រសៀមរាបអនុញ្ញាតឲ្យពលរដ្ឋចូលធ្វើស្រែ
ជនប្រដាប់អាវុធបាញ់គំរាមនិងដុតបំផ្លាញផ្ទះអ្នកភូមិ៣ខ្នងនៅបាត់ដំបង
ក្រុមសិទ្ធិមនុស្សគ្រោងស្នើសុំឲ្យអាជ្ញាធរអនុញ្ញាតឲ្យពលរដ្ឋចូលច្រូតកាត់ស្រូវ
អាជ្ញាធរខែត្រកំពង់ធំចាប់ខ្លួនពលរដ្ឋ៤នាក់បន្ថែមទៀតក្នុងរឿងជម្លោះដី
ជនជាតិភាគតិចនៅមណ្ឌលគិរីបារម្ភថាក្រុមហ៊ុនធ្វើឲ្យបាត់ដីចម្ការវិលជុំ
ពលរដ្ឋមានជម្លោះដីនៅឧត្ដរមានជ័យបន្តតវ៉ានៅទីស្ដីការគណៈរដ្ឋមន្រ្តី
ស្ថានភាពបញ្ហាជម្លោះដីនៅស្រុកសន្ទុកខេត្តកំពង់ធំ
សង្គមស៊ីវិលស៊ើបអង្កេតករណីក្រុមហ៊ុនរំលោភបំពានលើជនជាតិភាគតិច
សមត្ថកិច្ចខែត្រកំពង់ធំចាប់ខ្លួនពលរដ្ឋ៣នាក់ក្នុងរឿងជម្លោះដី
សមត្ថកិច្ចខែត្រកំពង់ធំបាញ់បង្រ្កាបការតវ៉ារបស់ពលរដ្ឋក្នុងរឿងជម្លោះដី
មតិ
អ្នកអាចបញ្ចេញមតិដោយបំពេញទម្រង់ខាងក្រោមនេះក្នុងទម្រង់ជាអក្សរសុទ្ធ។. មតិត្រូវតែអនុញ្ញាតដោយអ្នកសម្របសម្រួលនិងមិនបង្ហាញភ្លាមៗនៅលើទំព័រនេះទេ។ សូមអញ្ជើញត្រឡប់មកបើកទំព័រនេះម្ដងទៀតដើម្បីមើលថាតើមតិរបស់អ្នកត្រូវបានចុះផ្សាយឬអត់។
មើលមតិទាំងអស់.