ភរិយារបស់មន្រ្តីយោធាថ្នាក់ក្រោមមួយរូបតំណាងឲ្យគ្រួសារយោធាថ្នាក់ក្រោមដទៃទៀតបានថ្លែងប្រាប់វិទ្យុអាស៊ីសេរីឲ្យដឹងថា ពួកគេមានការសប្បាយចិត្តក្រោយពីការបើករបបប្រាក់ខែនោះមក ៖ «គ្នាអរដែរ... ឮថាបើកនេះ ជួយអរ។ ប្រាក់ខែបានចាត់ចែងធ្វើបុណ្យធ្វើអីអ៊ីចឹងទៅ តែកូនទាហានតែ១៣ម៉ឺន៨ពាន់ទេ។ គ្រាន់បើបានគេបើកមុនអ៊ីចឹង យើងវាធូរ មុនដំបូងគិតថា ពិបាកចិត្តដែរឮថាអត់ទាន់បើក ដល់បើកអ៊ីចឹងយើងអរយើងសប្បាយចិត្ត»។
កាលពីមុនរដូវបុណ្យភ្ជុំបិណ្ឌឈានមកដល់ តំណាងក្រុមគ្រួសារយោធាថ្នាក់ក្រោមទាំងនោះបានសម្ដែងការត្អូញត្អែរប្រាប់វិទ្យុអាស៊ីសេរីឲ្យដឹងថា គ្រួសារយោធាថ្នាក់ក្រោមបានទន្ទឹងរង់ចាំបើកប្រាក់ខែរបស់ខ្លួនជាច្រើនខែមកហើយ។
លោក កឹម កុសល នាយការិយាល័យហិរញ្ញវត្ថុនៃកងពលតូចអន្តរាគមន៍លេខ១១ដែលឈរជើងនៅក្នុងឃុំបាក់នឹម ស្រុកជុំគិរី ខេត្តកំពត បានធ្វើដំណើរមកទីក្រុងភ្នំពេញដើម្បីបំភ្លឺជុំវិញការចោទប្រកាន់កន្លងទៅនេះ។
លោកបានមានប្រសាសន៍ថា ក្រោយពីវិទ្យុអាស៊ីសេរីបានចាក់ផ្សាយការត្អូញត្អែររបស់ក្រុមគ្រួសារយោធាទាំងនោះ មានប្រតិកម្មភ្លាមៗពីរដ្ឋមន្រ្តីក្រសួងការពារជាតិ លោក ទៀ បាញ់ និងមានគម្រោងការបញ្ជូនក្រុមអធិការកិច្ចមកស៊ើបអង្កេត។
លោកបានបំភ្លឺថា ៖ «ប្រាក់ខែគឺខ្ញុំបានទទួលពីថ្នាក់លើនៅថ្ងៃទី២៥ ថ្ងៃទី២៦ ខ្ញុំទម្លាក់ភ្លាម ជាពិសេសឯកឧត្ដមមេបញ្ជាការកងពល ពេលប្រាក់ខែទៅដល់គាត់បញ្ជាឲ្យបើកទាន់ពេលវេលាដល់ដៃកម្មាភិបាល យុទ្ធជន នៅមុនរដូវភ្ជុំបិណ្ឌ បានទទួលទាំងអស់ គឺមិនជាការពិតដែលជនរងគ្រោះជម្រាបជូនខាងអាស៊ីសេរី»។
លោកមិនបានឲ្យដឹងអំពីចំនួនសរុបនៃយោធាចំនួនប៉ុន្មានទេនៃកងពលតូចអន្តរាគមន៍លេខ១១នោះ ប៉ុន្តែលោកបានបង្ហើបឲ្យដឹងថា យុទ្ធជនម្នាក់ៗបានទទួលរបបប្រាក់ខែរបស់ខ្លួនរវាង១៣ម៉ឺនរៀលដល់១៤ម៉ឺនរៀល ហើយមន្រ្តីយោធាថ្នាក់កណ្តាលបានទទួលរបបប្រាក់ខែរបស់ខ្លួនរវាង១៨ម៉ឺនរៀល ១៩ម៉ឺនរៀល ទៅ ២០ម៉ឺនរៀល និងរហូតដល់ ៣០ម៉ឺនរៀលក្នុងមួយខែៗ។
លោកបានឲ្យដឹងថា អង្គភាពរបស់លោកត្រូវការសាច់ប្រាក់ចំនួនប្រមាណរវាង៤ម៉ឺនដុល្លារនិង៥ម៉ឺនដុល្លារ ដើម្បីបើករបបប្រាក់ខែឲ្យយោធានិងមន្រ្តីនានាក្នុងកងពលទាំងនោះ។
លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ ដែលតែងតែតាមដានអំពីស្ថានការណ៍ជីវភាពរបស់មន្រ្តីរាជការស៊ីវិលនិងកងប្រដាប់អាវុធ បានមានប្រសាសន៍ថា ៖ «ការដែលបងប្អូនទាហានយើងបានទទួលបានប្រាក់ខែ ជាដំណឹងល្អសម្រាប់បងប្អូនទាហានយើងដែលអត់បានទទួលអស់រយៈពេលជាច្រើនខែ»។
លោកបានធ្វើការរិះគន់ថា ការយឺតយ៉ាវក្នុងការបើកប្រាក់ខែឲ្យមន្រ្តីរាជការនិងកងប្រដាប់អាវុធបានញ៉ាំងឲ្យពួកគេមានការបាក់ទឹកចិត្តចំពោះការងាររបស់ខ្លួន៕