គ្រួសារប្រជាពលរដ្ឋមួយគ្រួសារនៅក្នុងភូមិត្រពាំងឈើទាល ឃុំច្រេស ស្រុកជុំគិរី ខេត្តកំពត បានអះអាងថា ក្រុមយោធាមួយក្រុមមានគ្នាចំនួន៤នាក់ មកពីកងពលអន្តរាគមន៍លេខ១១ បានមកកាប់បំផ្លាញដើមស្វាយនិងដើមឈើហូបផ្លែជាច្រើនដើមនៅថ្ងៃច័ន្ទ (១ កុម្ភៈ)នេះ ដើម្បីគំរាមរឹបអូសយកដីធ្លីចំនួន២ហិកតារបស់គាត់។ បន្ថែមលើនេះទៀត ក្រុមយោធាទាំងនោះបានគំរាមដុតផ្ទះសម្បែងនិងចាប់រំលោភនៅថ្ងៃណាមួយលើស្ត្រីម្ចាស់ដីនិងផ្ទះសម្បែងនោះ។
ប្រជាពលរដ្ឋរងគ្រោះមួយគ្រួសារនៅក្នុងភូមិត្រពាំងឈើទាល ឃុំច្រេស ស្រុកជុំគិរី ខេត្តកំពត ឈ្មោះ ណាន ណាង អាយុ៣៩ឆ្នាំ បានថែ្លងប្រាប់វិទ្យុអាស៊ីសេរីនៅថៃ្ងច័ន្ទនេះថា ៖ «ទាហានមកកាប់ដើមស្វាយខ្ញុំអស់៤៩ដើម ត្របែក២១ដើម ដូង៧ដើម ក្រូងថ្លុងមួយដើម ក្រូចសើចមួយដើម។ មូលហេតុវាចង់ដណ្ដើមដីខ្ញុំហ្នឹង។ ដីខ្ញុំ២ហិកតា។ គេគំរាមរកចាប់រំលោភ រកវះពោះ។ ទាហានមក៤នាក់ អត់មានអាវុធទេមានតែពូថៅ»។
លោកស្រីកំពុងតែរៀបចំពាក្យប្តឹងរឿងនេះទៅអាជ្ញាធរមូលដ្ឋានភូមិឃុំឲ្យបានដឹងឮនិងជួយដោះស្រាយរឿងនេះ ប៉ុន្តែនៅមិនទាន់មានវិធានការភ្លាមៗទេ។
មន្រ្តីអង្កេតនៃមជ្ឈមណ្ឌលសិទ្ធិមនុស្សកម្ពុជានៅក្នុងខេត្តកំពត លោក ព្រំ ពិសិដ្ឋ ដែលកំពុងតែតាមដានករណីគំរាមនេះបានមានប្រសាសន៍ថា ៖ «ជាករណីមួយដែលរំលោភបំពានលើសិទ្ធិរស់នៅរបស់ពលរដ្ឋ។ ខាងគាត់ជនរងគ្រោះក៏បានដាក់ពាក្យបណ្ដឹងមួយទៅសាលាឃុំដើម្បីបញ្ជូនទៅលោកអភិបាលស្រុក ដើម្បីឲ្យគាត់ចាត់ជំនាញគាត់មកពិនិត្យផ្ទាល់តែម្ដង។ រឿងនេះអាចនឹងគ្រោះថ្នាក់ដល់អាយុជីវិតគាត់ បើមកគំរាមចាប់រំលោភ វះពោះ ដុតផ្ទះដុតអីអ៊ីចឹង»។
វិទ្យុអាស៊ីសេរីមិនទាន់អាចទាក់ទងក្រុមយោធាដែលរងការចោទប្រកាន់ ឬលោក យឿង សុខុន ជាប្រធានកងពលអន្តរាគមន៍លេខ១១ បាននៅទ្បើយទេ ដោយទូរស័ព្ទរបស់លោកគ្មានអ្នកទទួលឆ្លើយជុំវិញរឿងអាស្រូវចោទប្រកាន់ខាងលើនេះ។
លោក ឈឹម សាវុធ ជាមន្រ្តីស៊ើបអង្កេតនៃមជ្ឈមណ្ឌលសិទ្ធិមនុស្សកម្ពុជា បានមានប្រសាសន៍ថា ៖ «យោងលើប្រសាសន៍នាយករដ្ឋមន្រ្តី សម្ដេចតេជោ ហ៊ុន សែន ព្រមានថ្មីៗនេះ គាត់ឈប់ឲ្យទាហានទាំងអស់ហ្នឹងលូកដៃចូលពាក់ព័ន្ធនឹងករណីដីធ្លីហើយ បើសិនជាករណីហ្នឹងកើតឡើង ខ្ញុំគិតថា ជាអំពើមួយដែលជាកំហុសធ្ងន់ធ្ងរ»។
មេឃុំច្រេស ស្រុកជុំគិរី ខេត្តកំពត លោក អ៊ូ យឿន បានមានប្រសាសន៍ថា លោកមិនទាន់បានទទួលពាក្យបណ្ដឹងនៅទ្បើយទេពីគ្រួសារជនរងគ្រោះនោះ។
លោក អ៊ូ យឿន មានប្រសាសន៍ដូច្នេះ ៖ «អត់ទាន់ដឹងផង។ បើសិនជាទទួលបានពាក្យបណ្ដឹងខ្ញុំនឹងជួយអន្តរាគមន៍ ប៉ុន្តែឥឡូវអត់ទាន់ដឹងផង»។
រឿងវិទាទដីធ្លីរវាងប្រជាពលរដ្ឋជាង៣០០គ្រួសារនិងកងពលអន្តរាគមន៍លេខ១១ នៅខេត្តកំពតនោះ បានចាប់ផ្តើមកើតមានតាំងពីឆ្នាំ២០០១មក ក្នុងការដណ្តើមដីធ្លីជាច្រើនរយហិកតា ដែលបានញ៉ាំងឲ្យមានអំពើហិង្សាជាច្រើនលើកកន្លងមក៕